សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ពោធិ៍សាត់ ៖ ការដាំបន្លែជាលក្ខណៈគ្រួសារនៅប្រទេសកម្ពុជា ហាក់ត្រូវបានប្រជាជនភាគច្រើនមើលរំលង ទាំងនៅទីក្រុង ទីប្រជិំជន ក៏ដូចជាតាមទីជនបទ ក៍ប៉ុន្តែការដាំដំណាំជាលក្ខណៈគ្រួសារនេះ ពិតជាមានអត្ថប្រយោជន៍ជាច្រើន ត្បិតថា អាចទទួលបានបន្លែសុវត្ថិភាពសម្រាប់ទទួលទានផង ហើយថែមទាំងអាចលក់ចេញរកចំណូលប្រចាំថ្ងៃទៀតផង។
លោក ឈុំ យឿន ជាគ្រូបង្គោល និងជាកសិករដាំដំណាំជាលក្ខណៈគ្រួសារ នៅក្នុងភូមិ ឈើទាលរូង សង្កាត់រលាភ ក្រុងពោធិ៍សាត់ ខេត្តពោធិសាត់ បានមានប្រសាសន៍ថា ដោយបានទទួលជំនួយបច្ចេកទេស បណ្តុះបណ្តាលចំណេះជំនាញពីអង្គការ មិត្តជួយមិត្ត ដើម្បីសួនដំណាំកម្ពុជា លោកបានរៀបចំសួនដំាដំណាំនៅក្បែរផ្ទះលើដីទំហំ ១០ម x ១០ម នៅក្នុងរបងផ្ទះដើម្បីដាំដំណាំគ្រប់ប្រភេទ មានដូចជា ត្រប់ ម្ទេស សណ្តែកគួរ ពោតបារាំង ផ្ទី ស្លឹកបាស់ជាដើម ដើម្បីទទួលទានខ្លួនឯងផង និងអាចលក់បានចំណូលចូលគ្រួសារប្រមាណ ២ម៉ឺនរៀល ទៅ ៣ម៉ឺនរៀល ជារៀងរាល់ថ្ងៃទៀតផងដែរ។
លោកថា ៖
«គ្រួសារខ្ញុំចាប់ផ្តើមដំាបន្លែអស់រយៈពេល ៧ឆ្នាំមកហើយ ដោយសារការរៀបចំសួនបន្លែនៅតាមផ្ទះពិតជាបានទទួលអត្ថប្រយោជន៍ច្រើន ហូបបន្លែសុវត្ថិភាពក្នុងគ្រួសារផង និងអាចរកចំណូលបានចាយប្រចាំថ្ងៃ សម្រាប់លៃលកឱ្យកូនចៅទៅរៀន និងទិញត្រីសាច់មកហូបបានទៀត ហើយពិសេស យើងមិនចំណាយពេលវេលាច្រើនទេ ស្រ្តីមេផ្ទះជាប់រវល់មើលចៅ ស្រ្តីម៉េម៉ាយ និងគ្រួសារក្រីក្រដទៃទៀត ក៍អាចរៀបចំសួនដំណាំតាមផ្ទះនេះបានដែរ»។
អ្នកនាង អ៊ិន សក្ករ៉ា នាយិការអង្គការ មិត្តជួយមិត្ត ដើម្បីសួនដំណាំកម្ពុជា មានប្រសាសន៍ថា គម្រោងនេះត្រូវបានបង្កើតឡើងតាំងពីឆ្នាំ២០១៩ ដោយតំណាក់កាលដំបូង អង្គការបង្រៀនកសិករប្រមាណជា១៧គ្រួសារ ឱ្យក្លាយជាគ្រូបង្គោលសម្រាប់ជួយបណ្តុះបណ្តាលដល់ពលរដ្ឋក្នុងភូមិបន្តទៀត។ ដោយមានជំនួយគាំទ្រថវិកាពីអង្គារនៅក្រៅប្រទេស ហើយមកទល់ឆ្នាំ២០២៥នេះ អង្គការបានបណ្តុះបណ្តាលពលរដ្ឋប្រមាណ ១២៥៤ គ្រួសារ សំដៅទៅលើពលរដ្ឋងាយរងគ្រោះ ដូចជាជនពិការ ស្រ្តីម៉េម៉ាយ មនុស្សចាស់ដែលចាំមើលកូនចៅនៅផ្ទះជាដើម។
អ្នកនាងបញ្ជាក់ថា ៖
«គម្រោងសួនដំណាំតាមផ្ទះនេះ ធ្វើឡើងគឺដើម្បីឱ្យពលរដ្ឋចេះប្រើប្រាស់ដីឱ្យអស់លទ្ឋភាព ចេះទុកដាក់នូវកាកសណល់ជុំវិញផ្ទះ និងកែច្នៃធ្វើជាជី ដោយកាប់ដើមកន្រ្ទាំងខេត្ត លាយជាមួយលាមកគោមកធ្វើជាជីកំប៉ុស្ត៍ដាក់ដំាណាំ ។ ពន្យល់ឱ្យពលរដ្ឋយល់ច្បាស់ថា ពួកគាត់មានបន្លែសុវត្ថិភាព មានប្រភពបន្លែច្បាស់លាស់សម្រាប់ទទួលទានក្នុងគ្រួសារ និងអាចលក់បានរកចំណូលចូលគ្រួសារទៀតផង»។
គួរបញ្ជាក់ថា រហូតមកទល់បច្ចុប្បន្ន អង្គការបានបណ្តុះបណ្តាលពលរដ្ឋបានចំនួន ១២៥៤គ្រួសារ នៅឃុំចំនួន៥ ក្នុងស្រុកចំនួន ៣ ដោយក្នុងនោះមានស្រុកកណ្តៀង ស្រុកបាកាន ក្រុងពោធិ៍សាត់ ខេត្តពោធិ៍។ អ្នកនាង អ៊ិន សក្ករ៉ា បន្តថា នៅថ្ងៃខាងមុខនេះ អង្គការនឹងខិតខំគៀងគរជំនួយសប្បុរសជនដទៃទៀត ដើម្បីធ្វើកិច្ចសហការជាមួយអាជ្ញាធរមូលដ្ឋាន ចុះបង្រៀនឱ្យប្រជាជនចេះដាំបន្លែតាមផ្ទះឱ្យបានកាន់តែច្រើន ជាគោលនយោបាយផ្តល់ផលចំណេញទាំងថវិកា ចំណេញទាំងសុខភាព កាត់បន្ថយការចំណាយ ជាពិសេស កាត់បន្ថយការកើតមានជំងឺដង្កាត់ផ្សេងៗថែមទៀត៕ វិន ឈុនហ៊ាត
Account
Security
Favourite Content