សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័រ បានរាយការណ៍ថា ធនាគារកណ្តាលរុស្ស៊ីបានដំឡើងអត្រាការប្រាក់សំខាន់របស់ខ្លួនបន្ថែម ២ ភាគរយ ដោយសារកើនឡើងសម្ពាធពីអតិផរណា។
កាលពីថ្ងៃចុងសប្ដាហ៍មុននេះ និយ័តកររុស្ស៊ីបាននិយាយនៅក្នុងសេចក្តីថ្លែងការណ៍មួយថា តម្រូវការក្នុងស្រុកបានបន្តកើនឡើងលើសពីសមត្ថភាពរបស់សេដ្ឋកិច្ចក្នុងការផលិតទំនិញ និងសេវាកម្មដើម្បីផ្គត់ផ្គង់។ មិនត្រឹមតែប៉ុណ្ណោះ អតិផរណាបានបន្តកើនឡើងយ៉ាងខ្លាំងលើសពីការព្យាករណ៍របស់ធនាគារកណ្តាលកាលពីខែមេសា។ ជាលទ្ធផល ធនាគាររុស្ស៊ីបានដំឡើងអត្រាការប្រាក់ពី ១៦ ភាគរយឡើងដល់ ១៨ ភាគរយ ហើយបានកែសម្រួលការព្យាករណ៍របស់ខ្លួនថា អត្រាទាំងមូលស្ថិតនៅចន្លោះ ៦,៥ ភាគរយដល់ ៧ ភាគរយក្នុងឆ្នាំ។ កាលពីខែមិថុនា អតិផរណាមានកម្រិត ៨,៦ ភាគរយ ច្រើនជាងទ្វេដងនៃគោលដៅរបស់រដ្ឋាភិបាល ៤ ភាគរយ។
បន្ទាប់ពីការប្រកាសអំពីការដំឡើងអត្រាការប្រាក់ ប្រធានធនាគារកណ្តាលរុស្ស៊ី លោកស្រី Elvira Nabiullina បាននិយាយថា ប្រសិនបើអត្រាការប្រាក់មិនត្រូវបានដំឡើងទេនោះ ប្រទេសរុស្ស៊ីងាយនឹងធ្លាក់ចូលភាពជាប់គាំងសេដ្ឋកិច្ចជាមួយនឹងអតិផរណាខ្ពស់។ ធនាគារកណ្តាលរុស្ស៊ីរំពឹងថា ការដំឡើងអត្រាការប្រាក់ចុងក្រោយបំផុតនេះនឹងជួយធ្វើឱ្យអតិផរណាធ្លាក់ចុះដល់ ៤ ភាគរយ ឬ ៤,៥ ភាគរយនៅឆ្នាំ២០២៥ ។
កាលពីខែធ្នូកន្លងទៅនេះ ធនាគារកណ្តាលរុស្ស៊ីបានដំឡើងអត្រាការប្រាក់ដល់ ១៦ ភាគរយ ដែលជាការដំឡើងលើកទី ៥ ជាប់ៗគ្នាក្នុងឆ្នាំតែមួយ។ យ៉ាងណាមិញ ធនាគារកណ្តាលបានលើកឡើងពីសូចនាករសេដ្ឋកិច្ចក្នុងត្រីមាសទីពីរនៃឆ្នាំនេះ ដែលបង្ហាញថាសេដ្ឋកិច្ចរុស្ស៊ីបន្តមានកំណើនយ៉ាងឆាប់រហ័ស។ និយ័តករបាននិយាយថា សកម្មភាពរបស់អ្នកប្រើប្រាស់នៅតែមានកម្រិតខ្ពស់ ដោយសារការកើនឡើងនៃប្រាក់ចំណូលគ្រួសារ និងទំនុកចិត្តរបស់អ្នកប្រើប្រាស់។ កាលពីឆ្នាំ២០២៣ GDP របស់រុស្ស៊ីបានកើនឡើង ៣,៦ ភាគរយ បើធៀបនឹងឆ្នាំ ២០២២។ កាលពីខែមេសា មូលនិធិរូបិយវត្ថុអន្តរជាតិព្យាករណ៍ថា កំណើនសេដ្ឋកិច្ចរបស់រុស្ស៊ីអាចនឹងមានអត្រា ៣,២ ភាគរយសម្រាប់ឆ្នាំ ២០២៤៕
Account
Security
Favourite Content