ស្វាយរៀង ៖ ផ្សិតចំបើង ជាផ្សិតម្យ៉ាងដែលប្រជាជនខ្មែរនិយមទទួលទានមិនថាក្មេងចាស់ ប្រុសស្រី ដោយសារតែរសជាតិឆ្ងាញ់ និងមានភាពងាយស្រួលនៅក្នុងការបណ្ដុះ ខណៈដែលកសិករដែលជាអ្នកបណ្តុះភាគច្រើនមានការយល់ដឹងពីវិធីសាស្ត្រ ក៏ដូចជាបច្ចេកទេសដែលអាចទទួលបានទិន្នផលច្រើន និងលក់បានថ្លៃនៅលើទីផ្សារ។ ជាក់ស្ដែង ស្ត្រីម្នាក់ដែលជាកសិករមានជំនាញផ្នែកបណ្តុះផ្សិតចំបើងរស់នៅក្នុងខេត្តស្វាយរៀង កំពុងទទួលបានផលវិជ្ជមានពីអាជីពជាអ្នកបណ្តុះផ្សិត និងមានការកោតសរសើរពីសំណាក់អ្នករស់នៅក្នុងភូមិផងដែរ។

អ្នកស្រី ឡឹក សារឿន ជាសមាជិកបណ្តុំអាជីវកម្មផ្សិតចំបើង ដែលកំពុងទទួលបានភាពជោគជ័យលើការដាំផ្សិតចំបើង ជាមួយវិធីសាស្ត្រក្នុងការបណ្តុះ ស្ថិតនៅភូមិស្នាយគ្រៀង ឃុំធ្លក ស្រុកស្វាយជ្រុំ ខេត្តស្វាយរៀង បានស្ម័គ្រចូលមក​បង្ហាញពីរបៀបបណ្តុះផ្សិតចំបើងតាមបច្ចេកទេសថ្មីដែលទទួលបានកម្មវិធី ASPIRE និងអាចទទួលបានផលជាងការបណ្តុះតាមបែបប្រពៃណី។

ពាក់ព័ន្ធទៅនឹងបច្ចេកទេសនៃការបណ្តុះផ្សិតចំបើង ត្រូវបានស្ត្រីរូបនេះលើកឡើងថា សម្រាប់វត្ថុធាតុដើម កសិករអាចជ្រើសរើសទៅតាមតំបន់ដែលសម្បូរធនធាន និងងាយស្រួលរក ដូចជា ចំបើង កំប្លោក ដើមចេក សំបកសណ្ដែក កប្បាសជាដើម ប៉ុន្តែភាគច្រើនគេប្រើចំបើងធ្វើជាវត្ថុធាតុដើម ដោយត្រូវជ្រើសរើសចំបើងដែលស្ងួតល្អ ពុំមានដុះផ្សិតចង្រៃ មិនរលួយ ឬសើមខ្លាំងពេកនោះទេ។

បន្ទាប់ពីមានចំបើងហើយ គេត្រូវរៀបចំដុំល្បាយដែលត្រូវការកំបោរស និងទឹក ហើយត្រូវយកចំបើង កំបោរស និងជីអ៊ុយរេ ទៅត្រាំទឹកមួយយប់សិន ទើបស្រង់ចំបើងមករៀបចំដុំល្បាយ។ បន្ទាប់មក គេត្រូវពង្រាយចំបើង ផ្សើមទឹក ហើយមូជាដុំៗឱ្យហាប់ល្អ ដោយចំបើងមួយដុំទី ២-៣គីឡូក្រាម និងប្រវែង ៦០-៧០សង់ទីម៉ែត្រទៅតាមរោងដែលបានរៀបចំទុកជាមុន។

ដោយឡែកចំពោះទំហំរោង កសិករអាចធ្វើបានតាមទំហំ ទទឹង ៧ម៉ែត្រ បណ្ដោយ ៨ម៉ែត្រ និងរងទំហំទទឹង ៥ម៉ែត្រ ហើយបណ្ដោយ ៦ម៉ែត្រ ដោយបែងចែកជា ៥ រង ក្នុងមួយរោង និង ១រង មាន ៥ថ្នាក់ ដែលត្រូវការដុំល្បាយចំនួន១២០ដុំផងដែរ។ ក្រៅពីនេះអាហារបំប៉នសម្រាប់ល្បាយផ្សិតមានដូចជា សំបកសណ្ដែកបាយ កន្ទក់ កំបោរស និងជីអ៊ុយរេ ។

អ្នកស្រី ឡឹក សារឿន បានបញ្ជាក់ថា ៖

“យើងត្រូវរកសំបកសណ្ដែកដោយចាក់ទឹកឱ្យសើម និងបន្ថែមជីអ៊ុយរេដើម្បីឱ្យវាកាច់បានល្អ ទើបលាយច្របល់ចូលគ្នាឱ្យសព្វល្អ និងគ្របទុករយៈពេល៣យប់។ បន្ទាប់មកបើកមើល ជ្រោយល្បាយឱ្យសព្វល្អ មានសំណើមគ្រប់គ្រាន់ទើបផ្សិតយើងទទួលបានផលល្អ។ បន្ទាប់ពីគ្របទុករយៈពេល ៣យប់លើកទី២ហើយ យើងត្រូវជ្រោយលាយជាមួយនឹងម្សៅដំណើប ៥គីឡូក្រាម និងកន្ទក់៥០គីឡូក្រាមទៅក្នុងល្បាយដែលជាអាហាររបស់ផ្សិត។”

យកល្បាយទាំងនោះលាយច្របល់ចូលគ្នា ឆា និងទុកមួយយប់ ទើបយកទៅដាក់លើដុំចំបើងនៅលើរងជាការស្រេច។ ចំពោះកម្ដៅវិញ អ្នកស្រីបន្ថែមថា គេត្រូវដុតឱ្យក្នុងរោងមានសីតុណ្ហភាព ៧០អង្សារសេឡើងទៅរយៈពេល ៤ម៉ោង ទើបបន្ទាប់មករក្សាសីតុណ្ហភាពធម្មតា។

ចំពោះការថែទាំ គេត្រូវគិតពីសំណើម​ សីតុណ្ហភាពក្នុងរង ក្នុងបរិយាកាស និងក្នុងដុំល្បាយ ដោយសីតុណ្ហភាពក្នុងរងត្រូវរក្សាចន្លោះ ២៧-៣៦អង្សារសេ បើសំណើមខ្ពស់ពេកធ្វើឱ្យចំបើងឆាប់រលួយ។ បន្ទាប់ពីដាក់មេហើយរយៈពេល ១០ថ្ងៃ យើងអាចប្រមូលផលបានហើយ ដោយថ្ងៃប្រមូលផលទី១ ពុំអាចបានច្រើនប៉ុន្មានទេ លុះថ្ងៃទី៣ ទើបផ្សិតចាប់ផ្ដើមឡើងច្រើនដែលយើងអាចកាត់បានពី ៣០-៥០គីឡូក្រាមក្នុងមួយយប់និងកាត់បានជាបន្តបន្ទាប់រហូតដល់ថ្ងៃទី១៥ទើបអស់៕