ភ្នំពេញ៖ ក្នុងពិធីបិទទិវាសហគ្រិនស្ត្រីកម្ពុជាឆ្នាំ២០២៤ ក្រោមប្រធានបទ “ការពង្រឹងភាពអង់អាចស្ត្រីក្នុងសេដ្ឋកិច្ចបៃតង” នៅរសៀលថ្ងៃទី១១ ខែវិច្ឆិកា ឆ្នាំ២០២៤ រដ្ឋមន្ត្រីក្រសួងឧស្សា​ហ​កម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងពីតួនាទីដ៏សំខាន់របស់សហគ្រាសធុនតូច និងមធ្យម ដែលដឹកនាំដោយស្រ្តីក្នុងការជំរុញកិច្ចអភិវឌ្ឍសង្គម និងសេដ្ឋកិច្ចរបស់កម្ពុជា។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សា​ហ​កម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរំលេចពីការរួមចំណែកកាន់តែសំខាន់របស់ស្ត្រីនៅក្នុងវិស័យធុរកិច្ច ជាពិសេសក្នុងសហគ្រា​ស​ធុនតូច និងមធ្យម បានលើកឡើងថា ៖

«ការលើកកម្ពស់សហគ្រិនភាពស្រី្តតម្រូវឱ្យមានការប្រឹងប្រែងរួមគ្នាពីគ្រប់ភាគីពាក់ព័ន្ធទាំងអស់ តាមរយៈសមាហរណកម្មអាជីវកម្មរបស់ពួកគេទៅក្នុងខ្សែច្រវាក់តម្លៃក្នុងតំបន់ និងសកលលោក ដោយប្រើប្រាស់ឱ្យអស់លទ្ធភាពនូវសក្តានុពលធនធានក្នុងស្រុក និងការទទួលយកការផ្ទេរបច្ចេកវិទ្យាថ្មីៗ»។

តាមលទ្ធផលជំរឿនឆ្នាំ២០២២ របស់ក្រសួងផែនការ អង្គភាពសេដ្ឋកិច្ចចំនួន ៦៩.២% នៅកម្ពុជា កំពុងដឹកនាំដោយសហគ្រិនស្ត្រី។ ជាមួយនឹងការព្យាករកំណើនសេដ្ឋកិច្ចកម្ពុជាក្នុងរង្វង់ ៦%សម្រាប់ឆ្នាំ២០​២​៤ ដោយមាន​ការគាំទ្រពីវិស័យសំខាន់ៗ ដូចជា ឧស្សាហកម្មនាំចេញសម្លៀកបំពាក់ កម្មន្តសាលមិនមែនកាត់ដេរ កសិកម្ម ទេសចរណ៍ និងពាណិជ្ជកម្មដែលកំពុងងើបឡើងវិញ ខណៈដែលសហគ្រិនស្ត្រីជាតួអង្គសំខាន់ក្នុងការរក្សានិន្នាការកំណើននេះ។

រាជរដ្ឋាភិបាលកម្ពុជា បាន និងកំពុងអនុវត្តកម្មវិធីគោលនយោបាយ និងយុទ្ធសាស្ត្រជាច្រើន សំដៅគាំទ្រសហគ្រិនស្ត្រីដោយផ្តោតលើការលើកកម្ពស់ផលិតភាព ការពង្រីកទីផ្សារ និងលទ្ធភាពទទួលបានហិរញ្ញប្បទានចាំបាច់ ដើម្បីកំណើនធុរកិច្ច។ ថ្នាលបច្ចេកវិទ្យាដូចជា ASEANAccess និង KhmerSME ត្រូវបានបង្កើតឡើងដើម្បីផ្តល់ព័ត៌មានអាជីវកម្មសំខាន់ៗក្នុងតំបន់ដល់សហគ្រាសធុនតូច និងមធ្យម ដោយផ្តល់ជូនពួកគេនូវឧបករណ៍ និងធនធានចាំបាច់សម្រាប់ភាពជោគជ័យ និងកំណើនប្រកបដោយនិរន្តរភាព។

ថ្លែងទៅកាន់អង្គពិធីនេះ ឯកឧត្តម ហែម វណ្ណឌី បានអំពាវនាវដល់សហគ្រាសធុនមីក្រូ តូច និងមធ្យម ឱ្យប្រើប្រាស់ការចុះបញ្ជី និងខិតខំបំពេញអនុលោមភាពដើម្បីពង្រីកលទ្ធភាពទទួលបានការគាំទ្រ, រួមចំណែ​ក​​ដល់ការបង្កើតគោលនយោបាយ និងវិធានការចំគោលដៅ, ព្រមទាំងបង្កើនភាពធន់ និងកំណើនអាជីវកម្មរយៈពេលវែងរបស់ខ្លួន។

លោកជំទាវ សុខ ច័ន្ទឆវី រដ្ឋលេខាធិការក្រសួងកិច្ចកានារី បានចាត់ទុកទិវាសហគ្រិនស្ត្រីកម្ពុជា២០២៤ ជាព្រឹត្តិការណ៍សំខាន់ និងអស្ចារ្យ ក្នុងការផ្តល់ឱកាសដល់ស្ត្រី ដើម្បីបង្ហាញពីស្នាដៃរបស់ខ្លួន ក្នុងការដឹកនាំធ្វើអាជីវកម្ម ខណៈសហគ្រាសធនតូច និងមធ្យមបានផ្តល់ការងារជាច្រើន ដល់ប្រជាពលរដ្ឋនៅទូទាំងប្រទេស រហូតដល់ជាង ៧៨ភាគរយក្នុង នោះភាគច្រើន ជាស្ត្រីផដែរ ។

លោកជំទាវ ក៏បានអះអាងថា ៖ទោះបីមានស្ត្រីចូលរួម និងទទួលបានការងារធ្វើពីសហគ្រិនស្ត្រីយ៉ាងណាក្តី ក៏ស្ត្រីនៅមានបញ្ហាប្រឈមមួយចំនួនផងដែរ។ ពោលគឺស្ត្រីបានប្រឈមបញ្ហាច្រើនជាងបុរស។ បញ្ហាប្រឈមមានដូចជាការទទួលបានឱកាសការគ្រប់គ្រង ការផលិត ការអភិវឌ្ឍអាជីវកម្មរបស់ខ្លួន និងបដិវត្តន៍កម្មឌីជីថល នៅមានកម្រិត ជាពិសេសនោះស្ត្រីរស់នៅតាមតំបន់ជនបទ ។

លោកជំទាវ ចាន់ ភារី ប្រធានសមាគមសហគ្រិនស្ត្រីកម្ពុជា បានមានប្រសាសន៍ថា៖ សមាគមសហគ្រិនស្ត្រីកម្ពុជាបានផ្តួចផ្តើមបង្កើត និងរៀបចំទិវាសហគ្រិនស្ត្រីកម្ពុជាប្រចាំឆ្នាំ២០២៤ និងកម្មវិធីប្រគល់ពានរង្វាន់ជូនសហគ្រិនស្ត្រីឆ្នើម ។ ទិវាសហគ្រិនស្ត្រីមានគោលបំណងបង្ហាញនូវភាពអង់អាចនៃអាជីវកម្មដែលដឹកនាំដោយស្ត្រី និងជាគំរូក្នុងការជំរុញលើកទឹកចិត្តដល់សហគ្រិនស្ត្រីដទៃទៀត បន្ថែមលើនោះគឺដើម្បីអបអរសាទរសហគ្រិនស្ត្រីទូទាំងប្រទេស ។

លោកជំទាវបានបន្ថែមថា៖ ទិវាសហគ្រិនស្ត្រី នឹងជំរុញបន្ថែមឱ្យមានទំនាក់ទំងជិតស្និទ្ធរវាងវិស័យឯកជនជាមួយស្ថាប័នរាជរដ្ឋាភិបាល និងចូលរួមយ៉ាងសកម្មក្នុងការពង្រឹងភាពអង់អាច បង្កើនសមត្ថភាពសហគ្រិនស្រី្តក្នុងការដឹកនាំអាជីវកម្ម និងការបង្កើតចំណូលដើម្បីរីកចម្រើនទាំងអាជីវកម្ម គ្រួសារក៏ដូចជាសេដ្ឋកិច្ចជាតិផងដែរ ជាពិសេស ភ្ជាប់បណ្តាញទំនាក់ទំនងសហគ្រិនដ៏ធំក្នុងប្រទេសកម្ពុជា និងផ្គូរផ្គងអាជីវកម្ម។

នៅក្នុងទិវានេះមានសកម្មភាពជាច្រើន រួមមានទាំងការដាក់តាំងបង្ហាញផលិ​ត​ផល និងសេវាកម្មរបស់សហគ្រិនស្ត្រី ជាពិសេសគឺមានកិច្ចពិភាក្សាក្រោមប្រធានបទ “សហគ្រិនស្ត្រីក្នុងសេដ្ឋកិច្ចបៃតង” ដែលមានវាគ្មិនជំនាញ និងបទពិសោធន៍ក្នុងគោលបំណងផ្សព្វផ្សាយសមភាពយេនឌ័រ និងលើកកម្ពស់សេដ្ឋកិច្ចសហគ្រិនស្ត្រី ពង្រឹងភាពអង់អាចក្លាហាន និងការធ្វើអាជីវកម្មរបស់ស្ត្រីដោយផ្តោតលើសេដ្ឋកិច្ចបៃតង (ធុរកិច្ចបៃតង) ក្នុងនេះការអភិវឌ្ឍសេដ្ឋកិច្ច បរិស្ថាន សង្គម និងវប្បធម៌ តាមរយៈការធ្វើធុរកិច្ច ដែលមានការយកចិត្តទុកដាក់ពីផលប៉ះពាល់បរិស្ថានការលើកកម្ពស់សុខុមាលភាព សង្គម ការថែរក្សា និងលើកស្ទួយសេដ្ឋកិច្ចបរិស្ថាន)៕