សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្ត្រីបានលើកឡើងថា កម្ពុជា ជាប្រទេសមួយដែលផ្តល់ការលើកទឹកចិត្តជាច្រើនដល់វិនិយោគិនជាតិ និងអន្តរជាតិ ជាមួយនឹងឧត្តមភាពប្រកួតប្រជែង និងកាលានុវត្តភាពនានា ដែលធ្វើឱ្យកម្ពុជា ក្លាយជាគោលដៅដ៏ទាក់ទាញ ។
នៅក្នុងពិធីបើកសម្ពោធ“ពិព័រណ៍ពាណិជ្ជកម្មអន្តរជាតិកម្ពុជា ឆ្នាំ២០២៤”នាព្រឹកថ្ងៃទី១០ ខែឧសភាឆ្នាំ២០២៤នាមជ្ឈមណ្ឌលកោះពេជ្រ ឯកឧត្តមឧបនាយករដ្ឋមន្ត្រីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្ត្រី បានថ្លែងថា៖កត្តាធ្វើឱ្យកម្ពុជា ក្លាយជាគោលដៅដ៏ទាក់ទាញ រួមមាន ៖
ទី១.រាជរដ្ឋាភិបាល និងប្រជាជនកម្ពុជា ការពារយ៉ាងម៉ឺងម៉ាត់នូវសុខសន្តិភាព និងស្ថិរភាពនយោបាយ ដែលជាបុរេលក្ខខណ្ឌ ក្នុងការបង្កើតបរិយាកាសអំណោយផលសម្រាប់ធុរកិច្ចក្នុងរយៈពេលវែង។
២.រាជរដ្ឋាភិបាលកម្ពុជា រក្សាបាននូវកំណើនសេដ្ឋកិច្ចរឹងមាំក្នុងរង្វង់ ៧% ក្នុងមួយឆ្នាំ ដែលធ្វើឱ្យផលិតផលក្នុងស្រុកសរុប កើនឡើងជារៀងរាល់ឆ្នាំ។
៣.រាជរដ្ឋាភិបាលកម្ពុជា, ពីមួយនីតិកាលទៅមួយនីតិកាល, តែងតែប្រកាន់ខ្ជាប់នូវស្មារតីកំណែទម្រង់ តាមរយៈការដ្ឋានសំខាន់ៗ រួមមាន ការកែទម្រង់ការគ្រប់គ្រងហិរញ្ញវត្ថុសាធារណៈ, ការកែទម្រង់រដ្ឋបាលសាធារណៈ, ការកែទម្រង់វិស័យយុត្តិធម៌ និងការកែទម្រង់ច្បាប់ជាដើម។ល។
៤.រដ្ឋាភិបាលនៅតែបន្តយកចិត្តទុកដាក់លើវិស័យឯកជនតាមរយៈច្បាប់វិនិយោគថ្មី និងលិខិតបទដ្ឋានពាក់ព័ន្ធ,កិច្ចសម្រួលពាណិជ្ជកម្ម, ការលើកទឹកចិត្ត,ការផ្តល់អត្ថប្រយោជន៍ផ្សេងៗនិងជាពិសេសការដោះស្រាយបញ្ហាប្រឈម និងកង្វល់តាមយន្តការរាជរដ្ឋាភិបាល-ផ្នែកឯកជន។
៥.កម្ពុជាស្ថិតនៅទីតាំងយុទ្ធសាស្ត្រក្នុងតំបន់អាស៊ីអាគ្នេយ៍ ដែលនឹងអាចផ្តល់លទ្ធភាពងាយស្រួល ក្នុងការចូលទៅក្នុងទីផ្សារតំបន់។ ជាមួយគ្នានេះ កម្ពុជាមានប្រព័ន្ធសេដ្ឋកិច្ចបើកចំហ និងបានធ្វើសមាហរណកម្មយ៉ាងរហ័សទៅក្នុងទីផ្សារតំបន់ និងសកល ជាមួយនឹងកិច្ចព្រមព្រៀងពាណិជ្ជកម្មសេរី (FTAs) ទាំងទ្វេភាគី និងពហុភាគី ជាច្រើន ក្នុងនោះ រួមមាន៖ (១). កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP), (២). កិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) និង (៣). កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ (CKFTA)។ល។ និងទី៦-កម្ពុជាសម្បូរដោយកម្លាំងពលកម្មវ័យក្មេង ប្រកបដោយសក្តានុពល និងងាយស្រួលក្នុងការបំពេញតម្រូវការរបស់វិស័យឯកជន ស្របពេលដែលរាជរដ្ឋាភិបាលកាន់តែបន្តយកចិត្តទុកដាក់លើការកសាងមូលធនមនុស្ស និងការបណ្តុះបណ្តាលជំនាញវិជ្ជាជីវៈ ដល់យុវជនកម្ពុជា។
ឯកឧត្តមឧបនាយករដ្ឋមន្ត្រីប្រចាំការ បានលើកឡើងថា៖ចំពោះមុខ និងក្នុងរយៈពេលមធ្យម និងវែង, ពិភពលោកកំពុងតែប្រឈមនូវបញ្ហា និងភាពមិនប្រាកដប្រជាជាច្រើន ទាំងក្នុងទិដ្ឋភាពនយោបាយ សេដ្ឋកិច្ច ហិរញ្ញវត្ថុ និងសង្គម ដែលបណ្តាលមកពីការប្រែប្រួលភូមិសាស្ត្រនយោបាយ ស្របគ្នានឹងការបែកបាក់ប្រព័ន្ធសេដ្ឋកិច្ចនិងពាណិជ្ជកម្មពិភពលោក ដែលកំពុងបង្កផលប៉ះពាល់យ៉ាងធ្ងន់ធ្ងរដល់បរិយាកាសវិនិយោគ និងធុរកិច្ចអន្តរជាតិ។ ទោះស្ថិតក្នុងបរិកាណ៍បែបនេះក្តី, រាជរដ្ឋាភិបាលកម្ពុជានៅតែមានជំនឿ និងប្រកាន់ខ្ជាប់នូវ គោលនយោបាយសកលភាវូបនីយកម្ម ពហុភាគីនិយម និង គោលនយោបាយបើកចំហរ ក្នុងការជំរុញពាណិជ្ជកម្មនិងវិនិយោគដោយផ្ដល់ការស្វាគមន៍យ៉ាងកក់ក្ដៅចំពោះវិនិយោគិនទាំងអស់ក្នុងនិងក្រៅប្រទេសដែលមានចំណាប់អារម្មណ៍បណ្ដាក់ទុនវិនិយោគធ្វើធុរកិច្ចនៅកម្ពុជាដើម្បីទ្រទ្រង់កំណើនសេដ្ឋកិច្ចមានបរិយាបន្ន មានភាពធន់ និងចីរភាពក្នុងរយៈពេលវែង៕
Account
Security
Favourite Content