សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កាលពីពេលថ្មីៗនេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានមានប្រសាសន៍ណែនាំឱ្យមន្ត្រីពាក់ព័ន្ធរៀបចំ ឯកសារលើការបង្កើតតំបន់សេដ្ឋកិច្ចពិសេសដែលផ្ដោតលើវិនិយោគិនមកពីប្រទេសណាមួយឱ្យជាក់លាក់ ។ នៅទីបំផុតគម្រោងនេះ ត្រូវបានក្រុមប្រឹក្សាអភិវឌ្ឍន៍កម្ពុជាបើកកិច្ចប្រជុំរៀបចំឯកសារក្នុងការបង្កើតតំបន់សេដ្ឋកិច្ចពិសេសបែបនេះ គឺតំបន់សេដ្ឋកិច្ចពិសេសកម្ពុជា-ជប៉ុន ។
យោងតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា ក្រោយកិច្ចប្រជុំដឹកនាំដោយឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី១២ កុម្ភៈ ២០២៤ បានឱ្យដឹងថា កិច្ចប្រជុំពិភាក្សាលើការរៀបចំឯកសារទស្សនទានត្រៀមរៀបចំតំបន់សេដ្ឋកិច្ចពិសេសកម្ពុជា-ជប៉ុន នាពេលនេះ គឺអនុវត្តតាមគំនិតផ្ដួចផ្ដើមរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងអំឡុងពេលដំណើរទស្សនកិច្ចនៅក្នុងប្រទេសជប៉ុន កាលពីថ្ងៃទី១៥-១៩ ខែធ្នូ ឆ្នាំ ២០២៤កន្លងទៅនេះ ក្នុងគោលបំណងដើម្បីជំរុញលើទឹកចិត្តបណ្ដាវិនិយោគិនជប៉ុនឱ្យងាមកវិនិយោគនៅក្នុងប្រទេសកម្ពុជាបន្ថែម ។
វិនិយោគិនជប៉ុនគឺជាវិនិយោគិនមួយដែលមានគម្រោងផែនការច្បាស់លាស់មុននឹងបណ្ដាក់ទុនវិនិយោគនៅក្នុងប្រទេសណាមួយ ហើយការបង្កើតតំបន់សេដ្ឋកិច្ចពិសេសកម្ពុជា ជប៉ុន នៅក្នុងប្រទេសកម្ពុជានឹងអាចទទួលបានវិនិយោគិនជប៉ុនបន្ថែមចូលមកវិនិយោគនៅក្នុងប្រទេសកម្ពុជា ដោយក្នុងប្រទេសជប៉ុនមានសហគ្រាសធុនតូច និងមធ្យម រាប់លានសហគ្រាស ដូច្នេះ បើសិនជាសហគ្រាសទាំងនោះងាកមកវិនិយោគនៅក្នុងប្រទេសកម្ពុជានឹងអាចហុចផលដល់សេដ្ឋកិច្ចកម្ពុជាជាច្រើន ។
លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ីបានមានប្រសាសន៍លើកឡើងថា នៅប្រទេសជប៉ុនមានក្រុមហ៊ុនច្រើនណាស់ ជាពិសេសសហគ្រាសធុនតូច និងមធ្យម ហើយបើសិនជាកម្ពុជាទទួលបានការវិនិយោគពីប្រទេសជប៉ុន នោះកម្ពុជានឹងទទួលបានផលប្រយោជន៍ច្រើន ។
ក្នុងនាមជាសហគ្រិនមួយរូប និងជាស្ថាប័នដែលធំមួយក្នុងប្រទេសកម្ពុជា តែងតែរៀបចំវេទិកាដើម្បីទាក់ទាញវិនិយោគិនមកពីជប៉ុនដើម្បីសិក្សាវិនិយោគនៅក្នុងប្រទេសកម្ពុជា ដោយរាជរដ្ឋាភិបាលកម្ពុជាក៏បានសម្របសម្រួលដល់វិនិយោគិនមកពីគ្រប់ទិសទី ដើម្បីបណ្ដាក់ទុនវិនិយោគបង្កើតការងារជូនប្រជាពលរដ្ឋក្នុងស្រុកកាន់តែច្រើនថែមទៀត ។
គួរបញ្ជាក់ថា បច្ចុប្បន្ននេះ មានក្រុមហ៊ុនជប៉ុនធំៗជាច្រើនបានបោះទុនវិនិយោគនៅក្នុងតំបន់សេដ្ឋកិច្ចពិសេសរបស់កម្ពុជា ជាក់ស្ដែងតំបន់សេដ្ឋកិច្ចពិសេសរ៉ូយ៉ាល់គ្រុបរបស់អ្នកឧកញ៉ា គិត ម៉េង នៅក្នុងខណ្ឌកំបូល មានក្រុមហ៊ុនជប៉ុនជាច្រើនកំពុងវិនិយោគ ដូចជាក្រុមហ៊ុន Minebea , រោងចក្រដំឡើងរថយន្ត Toyota, រោងចក្រផលិតបង្គុំរថយន្តរបស់ក្រុមហ៊ុន Denso និងក្រុមហ៊ុនជប៉ុនជាច្រើនទៀត ។ ដូច្នេះការបង្កើតតំបន់សេដ្ឋកិច្ចពិសេសកម្ពុជា ជប៉ុននឹងអាចទាក់ទាញវិនិយោគិនជប៉ុនចូលមកបណ្ដាក់ទុនវិនិយោគនៅក្នុងប្រទេសកម្ពុជាបន្ថែមទៀត ៕
Account
Security
Favourite Content