ភ្នំពេញ ៖ វេទិកាកិច្ចសហប្រតិបត្តិការសេដ្ឋកិច្ចឌីជីថលកម្ពុជា-ចិន ត្រូវបានរៀបចំឡើងនៅទីក្រុងភ្នំពេញ កាលពីថ្ងៃទី៤ ខែវិច្ឆិកា ឆ្នាំ២០២៤ ដោយផ្តល់ឱកាសដល់មន្ត្រីពាក់ព័ន្ធ និងវិស័យឯកជនកម្ពុជា-ចិន រិះរកមធ្យោបាយជំរុញកិច្ចសហប្រតិបត្តិការសេដ្ឋកិច្ចឌីជីថលឱ្យកាន់តែសកម្ម និងរឹងមាំរវាងប្រទេសទាំងពីរ។ វេទិកានេះរៀមចំឡើងក្រោមអធិបតីរបស់ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ព្រមទាំងឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំនៅកម្ពុជា។

អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា វេទិកានេះបានបង្ហាញពីការចូលរួមរបស់ភាគីពាក់ព័ន្ធ និងវិស័យឯកជនក្នុងដំណើរការកសាងសហគមន៍សេដ្ឋកិច្ចសង្គមឌីជីថលនៅកម្ពុជា។ បច្ចេកវិទ្យាឌីជីថលបានរីកចម្រើនយ៉ាងឆាប់រហ័ស និងក្លាយជាវេទិកាបន្ថែមសម្រាប់ការគាំទ្រកំណើន និងភាពធន់នឹងសេដ្ឋកិច្ច។

ឯកឧត្តម​បានបញ្ជាក់​ថា​៖

«​ ការដាក់ឱ្យអនុវត្តនូវប្រព័ន្ធវិក័យប័ត្រអេឡិចត្រូនិកនេះ នឹងបង្កភាពកាន់តែងាយស្រួល ដល់ការធ្វើពាណិជ្ជកម្មឆ្លងកាត់ព្រំដែន។ បច្ចុប្បន្ននេះ សេដ្ឋកិច្ចឌីជីថលរវាងចិន និងកម្ពុជា កំពុងមានភាពរីកច្រើន​យ៉ាងខ្លាំងក្លា ដោយចិនបានរួមចំណែកកសាងប្រព័ន្ធទូរស័ព្ទចល័តនៅកម្ពុជា។ ជាពិសេស ចិននឹងជួយកម្ពុជាសម្រេចនូវគោលដៅគ្រប់ដណ្តប់ប្រព័ន្ធអ៊ីនធឺណិតល្បឿនលឿននៅទីក្រុងឱ្យបាន១០០ភាគរយ និងនៅជនបទឱ្យបាន៧០ភាគរយនៅត្រឹមឆ្នាំ២០២៥»។

ក្នុងនាមជាជាអនុប្រធានប្រចាំការនៃក្រុមប្រឹក្សាជាតិសេដ្ឋកិច្ច និងសង្គមឌីជីថល អគ្គបណ្ឌិតសភាចារ្យ បានអះ​អាងថា នេះជាគ្រឹះ និងជាមធ្យោបាយដ៏សំខាន់ក្នុងការសម្រេចបាននូវចក្ខុវិស័យកម្ពុជា ឆ្នាំ២០៥០ សំដៅប្រែក្លាយកម្ពុជាទៅជាប្រទេសមានចំណូលខ្ពស់ ។ បន្ថែមលើនេះ ការដាក់ចេញនូវ «គោលនយោបាយអភិវឌ្ឍ បច្ចេកវិទ្យាហិរញ្ញវត្ថុ ២០២៣-២០២៨» និង «ផែនទីបង្ហាញផ្លូវអភិវឌ្ឍន៍ជំនាញឌីជីថល ២០២៤-២០៣៥» ក៏បានសបញ្ជាក់អំពីឆន្ទៈមោះមុត និងភាពបុរេសកម្មរបស់រាជរដ្ឋាភិបាលក្នុងការប្តេជ្ញាជំរុញការអភិវឌ្ឍសេដ្ឋកិច្ចឌីជីថលនៅកម្ពុជាឱ្យកាន់តែមានភាពរស់រវើក។ បច្ចេកវិទ្យាឌីជីថល ជាអាទិភាពគន្លឹះថ្មីមួយទៀតសម្រាប់ឆ្លើយតបទៅនឹងបដិវត្តឧស្សាហកម្មទី៤.០ និងបរិវត្តកម្មឌីជីថលនៃសេដ្ឋកិច្ច និងសង្គមកម្ពុជា ក៏ដូចជាឆ្លើយតបនឹងតម្រូវការ ក្នុងការលើកកម្ពស់ផលិតភាពសេដ្ឋកិច្ច។

ឯកអគ្គរដ្ឋទូតចិនប្រចាំកម្ពុជា ឯកឧត្តម វ៉ាង វិនពីន បានថ្លែងថា ក្រុមហ៊ុនចិនដែលវិនិយោគនៅកម្ពុជា កំពុងអភិវឌ្ឍន៍ខ្លាំងលើវិស័យផ្នែកបច្ចេកវិទ្យាដោយប្រើប្រាស់នូវបញ្ញាសិប្បនិម្មិត (AI) បច្ចេកវិទ្យាក្លោដ (Cloud Technology) និងការទូទាត់ប្រាក់ចល័ត…ជាដើម។ បច្ចេកវិទ្យាបែបថ្មីនៅគ្រប់មុខរបរ និងវិស័យនៅកម្ពុជា នឹងជួយប្រទេសកម្ពុជា ក្នុងការលើកកម្ពស់ និងម្រិតបច្ចេកវិទ្យាឌីជីថលឱ្យសម្រេចបានបរិវត្តកម្មឌីជីថល (Digital Transformation)ជាបន្តបន្ទាប់។

ឯកឧត្តម Wang Wenbin បានគូសបញ្ជាក់យ៉ាងដូច្នេះថា ៖

«យើងជឿជាក់យ៉ាងមុតមាំថា ជាមួយនឹងកិច្ចខិតខំប្រឹងប្រែងរួមគ្នា កិច្ចសហប្រតិបត្តិការសេដ្ឋកិច្ចឌីជីថលកម្ពុជា និងចិន នឹងផ្តល់លទ្ធផលជាផ្លែផ្កាបន្ថែមទៀត។ កិច្ចសហប្រតិបត្តិការសេដ្ឋកិច្ចឌីជីថលនេះ ក៏នឹងចាក់បញ្ចូលថាមពលកាន់តែខ្លាំងក្លាដល់កម្ពុជា ក្នុងការសម្រេចបាននូវបរិវត្តកម្មឌីជីថល និងការអភិវឌ្ឍខ្លាំងក្លា»។

សម្រាប់កម្ពុជា ការអភិវឌ្ឍសេដ្ឋកិច្ចឌីជីថល ត្រូវបានចាត់ទុកជាចលករដ៏សំខាន់មួយក្នុងដំណើរការអភិវឌ្ឍសេដ្ឋកិច្ច។ ជាក់ស្តែង បច្ចុប្បន្នកម្ពុជា​កំពុងអនុវត្តនូវ «ក្របខ័ណ្ឌគោលនយោបាយ សេដ្ឋកិច្ច និងសង្គមឌីជីថលកម្ពុជា ២០២១-២០៣៥» និង «គោលនយោបាយ រដ្ឋាភិបាលឌីជីថល ២០២២-២០៣៥» ហើយគឺជាឯកសារគោលនយោបាយរយៈពេលវែងសម្រាប់ធ្វើជាត្រីវិស័យ ក្នុងការរៀបចំបរិវត្តកម្មឌីជីថលរបស់កម្ពុជា ។

សូមបញ្ជាក់ថា សមាគមឧស្សាហកម្មសេដ្ឋកិច្ចឌីជីថល កម្ពុជា-ចិន នឹងដើរតួនាទីយ៉ាងសំខាន់ ក្នុងការបើកផ្លូវបន្ថែម សម្រាប់រៀបចំកិច្ចសហការរវាងវិស័យឯកជន និងរាជរដ្ឋាភិបាល ក៏ដូចជាក្នុងវិស័យឯនជនខ្លួនឯង។ កិច្ចការនេះ គឺសំដៅបង្កើត និងបង្កើននវានុវត្តន៍ឌីជីថលក្នុងវិស័យជំនាញ ជំរុញរំហូរនៃទេពកោសល្យឌីជីថល និងការបណ្តុះបណ្តាលជំនាញឌីជីថលថ្មីៗ លើកកម្ពស់ការប្រើប្រាស់បច្ចេកវិទ្យាឌីជីថលផងដែរ៕