បរទេស៖ យោងតាមប្រភពព័ត៌មានពី The Guardian បានរាយការណ៍ថា ប្រធានាធិបតីអាម៉េរិក Donald Trump បានចុះហត្ថលេខាដំឡើងពន្ធពី ២៥% ទៅ ៣៥% លើទំនិញនាំចូលពីប្រទេសកាណាដា។

កាលពីថ្ងៃព្រហស្បតិ៍ អាម៉េរិកបានប្រកាសពន្ធថ្មីសម្រាប់ការនាំចូលពីប្រទេសជាច្រើន ដែលចូលជាធរមាននៅថ្ងៃទី ១ ខែសីហា ប៉ុន្តែព​ន្ធភាគច្រើនត្រូវបានបន្ទាបពីការប្រកាសលើកមុន។ យ៉ាងណាមិញ កាណាដា ដែលជាដៃគូពាណិជ្ជកម្មធំមួយរបស់អាម៉េរិក ត្រូវបានដំឡើងពន្ធដល់ទៅ ៣៥% ហើយទំនិញដែលផ្ទេរទៅប្រទេសមួយផ្សេងទៀតដើម្បីគេចពីពន្ធថ្មីនឹងត្រូវដំឡើងពន្ធដល់ទៅ ៤០%។ ការសម្រេចចិត្តនេះកើតឡើងបន្ទាប់ពីមានការគំរាមកំហែងពន្ធជាច្រើនខែពីរដ្ឋបាល Trump និងការកើនឡើងនៃភាពតានតឹងពាណិជ្ជកម្មជាមួយនឹងប្រទេសកាណាដា។

Trump បានបង្ហោះលើ Truth Social ថា “Wow! កាណាដា ទើបតែបានប្រកាសថា ខ្លួនគាំទ្រភាពជារដ្ឋរបស់ប៉ាឡេស្ទីន។ វានឹងធ្វើឱ្យយើងពិបាកធ្វើកិច្ចព្រមព្រៀងពាណិជ្ជកម្មជាមួយពួកគេ។ អូ ‘កាណាដា !!!” គេយល់ឃើញថា Trump មិនធ្វើកិច្ចព្រមព្រៀងពាណិជ្ជកម្មជាមួយកាណាដាទេ ហើយថែមទាំងដំឡើងពន្ធគយ ដោយសារប្រទេសនេះទទួលស្គាល់រដ្ឋប៉ាឡេស្ទីន។

ទន្ទឹមនឹងនេះ សេតវិមានបានលើកឡើងថា Trump ដំឡើងពន្ធលើកាណាដា ដោយសារតែប្រទេសនេះបានបរាជ័យក្នុងការធ្វើសកម្មភាពលើវិបត្តិសុខភាពសាធារណៈដែលបណ្តាលមកពីសារធាតុញៀន fentanyl និងថ្នាំខុសច្បាប់ហូរឆ្លងកាត់ព្រំដែនភាគខាងជើងចូលទៅក្នុងទឹកដីអាម៉េរិក។  យ៉ាងណាមិញ មន្ត្រីនៅទីក្រុងអូតាវ៉ាបានបញ្ជាក់ដដែលៗថា សារធាតុ fentanyl ដែលមានប្រភពមកពីកាណាដា មានបរិមាណតិចតួចប៉ុណ្ណោះដែលចូលក្នុងទឹកដីអាម៉េរិក ប៉ុន្តែខ្លួននៅតែ​បន្ត​ចាត់​វិធានការ​ពង្រឹង​ព្រំដែន។

លេខាធិការពាណិជ្ជកម្មអាម៉េរិក លោក Howard Lutnick លើកឡើងថា Trump អាចពិចារណាឡើងវិញលើបញ្ហាពន្ធគយ ប្រសិនបើនាយករដ្ឋមន្រ្តីកាណាដា Mark Carney ចាប់ផ្តើមស្រុះស្រួលជាមួយគាត់វិញ និងបញ្ឈប់ការសងសឹករបស់គាត់។ កាលពីថ្ងៃពុធ នាយករដ្ឋមន្រ្តីកាណាដា Mark Carney និយាយថា កិច្ចចរចាពាណិជ្ជកម្មរវាងប្រទេសទាំងពីរមានលក្ខណៈស្ថាបនា ប៉ុន្តែប្រហែលជាមិនអាចបញ្ចប់ត្រឹមថ្ងៃកំណត់នោះទេ។ គួរឲ្យបញ្ជាក់ដែរថា ចាប់តាំងពីខែមីនាមក Trump បានដាក់ពន្ធគយ ២៥% លើការនាំចូលទំនិញ និងធនធានថាមពលជាច្រើនរបស់កាណាដា និងពន្ធ ៥០% លើការនាំចូលដែកថែប និងអាលុយមីញ៉ូមផងដែរ។ លោក Carney បញ្ជាក់ថា ប្រសិនបើប្រទេសទាំងពីរមិនឈានដល់កិច្ចព្រមព្រៀងពាណិជ្ជកម្មត្រឹមថ្ងៃទី ១ ខែសីហានោះទេ កាណាដាត្រៀមនឹងដំឡើងពន្ធលើការនាំចូលដែកថែប និងអាលុយមីញ៉ូមពីអាម៉េរិកដូចគ្នា៕