សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា ក្នុងរយៈពេល១១ខែ គិតចាប់ពីខែមករា ដល់ខែវិច្ឆិកា ឆ្នាំ២០២៥ ការនាំចេញសម្លៀកបំពាក់របស់កម្ពុជាទៅកាន់ទីផ្សារអន្តរជាតិមានទំហំជាង១០ពាន់លានដុល្លារ (១០,៤៥៩.១៩ ដុល្លារ) កើន១៧.០២ភាគរយ បើធៀបនឹងរយៈពេលដូចគ្នាក្នុងឆ្នាំ២០២៤ ដែលមានត្រឹម ៨, ៩៣៨. ៣២ ដុល្លារ។
តាមរយៈរបាយការណ៍ដដែលបានបង្ហាញទៀតថា ចំពោះមុខទំនិញដែលឈរនៅលំដាប់លេខ២ បន្ទាប់ពីសម្លៀកបំពាក់ គឺស្បែកជើង ដែលមានទំហំជាង ១,៩ពាន់លានដុល្លារ( ១,៩០៥. ៥៣ ដុល្លារ) កើន ២៦.៣៧ភាគរយ ធៀបនឹងរយៈពេលដូចគ្នាក្នុងឆ្នាំ២០២៤ ដែលមានត្រឹមជាង១៥០០លានដុល្លារ។ ចំណែកសម្ភារធ្វើដំណើរ និងកាបូប មានទំហំជាង ១,៨ពាន់លានដុល្លារ(១,៨៥៤.៩៥ដុល្លារ) កើនជាង ៦៦ភាគរយ។
ក្រៅពីទំនិញជាសម្លៀកបំពាក់ ស្បែកជើង និងសម្ភារៈធ្វើដំណើរ កម្ពុជាក៏បាននាំចេញនូវទំនិញសំខាន់ៗផ្សេងៗជាច្រើនទៀតដូចជា សំបកកង់រថយន្ត មានទំហំជាង១២០០លានដុល្លារ កើនជាង៥៧ភាគរយ និងស្រូវជាង៩០៨លានដុល្លារ ថយជាង២៩ភាគរយ។ ក្រៅពីនេះ កម្ពុជា ក៏បាននាំចេញគ្រឿងអេឡិចត្រូនិក មានទំហំជាង ៨៣៨លានដុល្លារ កើនជាង ៣៥% , គ្រាប់ស្វាយចន្ទី ជាង៨០៨លានដុល្លារ, វាយនភណ្ឌជាង៦១៧លាន, ដំឡូងមី ជាង៥៧៤លានដុល្លារ និងទោចក្រយាន ជាង៥៤១លានដុល្លារ។
ប្រភពទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា បានឱ្យដឹងទៀតថា ៖ ទំហំនាំចេញរបស់កម្ពុជាមានចំនួន ជាង២៨ពាន់លានដុល្លារអាម៉េរិក(២៨,៣៦៨.៣៤ ដុល្លារ)ក្នុងនោះនាំចេញទៅទីផ្សារ អាមេរិកជាង១១ពាន់លានដុល្លារ កើនជាង៤០%, អាស៊ានជាង៥ពាន់លានដុល្លារ កើនជាង១៨% ,សហភាពអឺរ៉ុបជាង៤ពាន់លានដុល្លារកើនជាង១៦% ចិនជាង១៥០០លានដុល្លារកើនជាង៥% ជប៉ុនជាង១៤០០លានដុល្លារ កើនជាង៥% ហើយក្រៅពីនេះនៅមានទំនិញបន្ទាប់បន្សំជាច្រើទៀតដែលមានតម្លៃសរុបប្រមាណជិត៥ពាន់លានដុល្លារអាម៉េរិក។
សូមបញ្ជាក់ដែរថា ចំពោះទំហំពាណិជ្ជកម្មសរុបរបស់កម្ពុជា ជាមួយទីផ្សារនានានៅលើពិភពលោកក្នុងរយៈពេល១១ខែ ឆ្នាំ២០២៥ កន្លងទៅនេះ មានទំហំជិត៦០ពាន់លានដុល្លារ កើនជាង ១៧ភាគរយបើធៀបនឹងរយៈពេលដូចគ្នាកាលពីឆ្នាំ២០២៤ ដែលក្នុងនោះការនាំចេញមានជាង២៨ពាន់លានដុល្លារ ហើយការនាំចូលមានជាង៣០ពាន់លានដុល្លារ៕
Account
Security
Favourite Content