សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្របនឹងតំបន់សេដ្ឋកិច្ចពិសេសរបស់ជប៉ុនគ្រោងនឹងលេចរូបរាងនៅពេលឆាប់ៗនេះ កម្ពុជាក៏បានស្នើភាគីចិនជំរុញការបង្កើតតំបន់ពាណិជ្ជកម្មសេរី និងតំបន់សេដ្ឋកិច្ចពិសេសនៅកម្ពុជាបន្ថែម ដើម្បីទាក់ទាញការវិនិយោគផ្ទាល់មកពីប្រទេសចិន ដែលតំបន់សេដ្ឋកិច្ចពិសេសនេះនឹងផ្ដោតលើវិនិយោគិនមកពីចិនផ្ទាល់តែម្ដង។
នៅក្នុងជំនួបជាមួយឯកឧត្តម វ៉ាង យី រដ្ឋមន្ត្រីក្រសួងការបរទេសចិនកាលពីពេលថ្មីៗនេះ សម្ដេចមហាបវរធិបតី ហ៊ុន ម៉ាណែត បានស្នើឱ្យភាគី ចិនពិនិត្យលទ្ធភាពក្នុងការជំរុញ កិច្ចសហប្រតិបត្តិការក្នុងការបង្កើតតំបន់ពាណិជ្ជកម្មសេរីកម្ពុជា-ចិន និងតំបន់សេដ្ឋកិច្ចពិសេសបន្ថែមទៀតនៅកម្ពុជា ។
សម្ដេចធិបតីក៏បានលើកឡើងអំពីការរួមចំណែករបស់ចិនក្នុងការផ្ដល់លទ្ធភាពដល់កម្ពុជា ក្នុងការកសាងហេដ្ឋារចនាសម្ព័ន្ធ ដូចជាផ្លូវល្បឿនលឿនភ្នំពេញ ក្រុងព្រះសីហនុ និងអាកាសយានដ្ឋានអន្តរជាតិសៀមរាបអង្គរ ជាដើមដែលបានរួមចំណែកដល់កំណើនសេដ្ឋកិច្ចកម្ពុជា ។ តាមរយៈការកំណត់ការយកឆ្នាំ២០២៤ ជាឆ្នាំនៃការផ្លាស់ប្តូររវាងប្រជាជន និងប្រជាជន សម្ដេចធិបតីជឿថា កម្ពុជានឹងមានរំហូរវិនិយោគ និងអ្នកទេសចរមកពីប្រទេសចិននឹងកើនឡើងថែមទៀត ។
នៅក្នុងសេចក្ដីប្រកាសរួមស្ដីពីដំណើរទស្សនកិច្ចរបស់ឯកឧត្តម វ៉ាង យី រយៈពេល៣ថ្ងៃនៅក្នុងព្រះរាជាណាចក្រកម្ពុជា ដោយភាគីទាំងពីរបានឯកភាពថា កម្ពុជា និងចិន គឺជាមិត្តដែកថែបដែលតែងតែនៅក្បែរគ្នា និងជួយគ្នាក្នុងគ្រាលំបាក ។ ភាគីទាំងពីរក៏បានឯកភាព ធ្វើអានុភាវូបនីយកម្មតួនាទីសម្រួលរបស់គណៈកម្មាធិការសម្របសម្រួលអន្តរជាតិរដ្ឋាភិបាលកម្ពុជា ចិន ដើម្បីកសាងសហគមន៍វាសនារួម កម្ពុជា ចិន ក្នុងយុគសម័យថ្មីប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់ ព្រមទាំងរួមគ្នាជំរុញពហុភាគីនិយម និងសកលភាវូបនីយកម្មសេដ្ឋកិច្ច ដែលផ្ដល់ប្រយោជន៍រួមប្រកបដោយសេរី បើកចំហ សមភាព និងបរិយាបន្ន ។
ក្រលេកមកមើលការវិនិយោគរបស់វិនិយោគិនចិននៅកម្ពុជាវិញ បើតាមការកត់សម្គាល់ ក្នុងរយៈពេលប៉ុន្មានខែដើមឆ្នាំ២០២៤នេះ ឃើញថាបណ្ដាវិនិយោគិននានាមកពីប្រទេសចិនបានចូលមកកម្ពុជាជាហូរហែដើម្បីស្វែងរកឱកាសវិនិយោគ ជាពិសេស ទៅលើវិស័យអចលនទ្រព្យ និងឧស្សាហកម្ម ដោយរំពឹងថាការវិនិយោគមកពីចិននឹងកើនឡើងនៅក្នុងឆ្នាំ២០២៤នេះឡើងវិញដូចគ្រាមុនពេលមានវិបត្តិកូវីដ ។
គួរបញ្ជាក់ថា ការបង្កើតតំបន់សេដ្ឋកិច្ចពិសេសនៅក្នុងប្រទសកម្ពុជាក្នុងរយៈពេលប៉ុន្មានឆ្នាំកន្លងមកនេះឃើញថា ទទួលបានការចាប់អារម្មណ៍ពីបណ្ដាវិនិយោគិនក្នុង និងក្រៅប្រទេសជាច្រើន ដោយវិនិយោគិនមិនពិបាកក្នុងការស្វែងរកទីតាំងសម្រាប់ការវិនិយោគរបស់ខ្លួនឡើយ ដោយគេអាចដាក់ទីទាំងវិនិយោគនៅក្នុងតំបន់សេដ្ឋកិច្ចពិសេសដែលមានស្រាប់ ហើយចាប់ផ្ដើមដំណើរការវិនិយោគភ្លាមៗ ដោយមិនស្មុគ្រស្មាញឡើយ ៕
Account
Security
Favourite Content