ភ្នំពេញ ៖ កម្ពុជា​ បាន​ជាប់​ចំណាត់​ថ្នាក់​ទី​១​ក្នុង​សន្ទស្សន៍​ Greenfield FDI Performance Index ឆ្នាំ២០២៥ នៅ​ក្នុង​តំប​ន់​អាស៊ី​ប៉ាស៊ីហ្វិក និង​ទី៩ នៅ​ទូទាំង​ពិភពលោក ដែលសន្ទស្សន៍នេះតាមដាន និងចាត់ថ្នាក់ប្រទេសដោយផ្អែកលើសមត្ថភាពក្នុងការទាក់ទាញការវិនិយោគផ្ទាល់ពីបរទេស (FDI) ធៀបទៅនឹងទំហំនៃសេដ្ឋកិច្ច។

សន្ទស្សន៍ Greenfield FDI Performance Index ត្រូវបានបោះពុម្ពដោយ fDi Intelligence ជាផ្នែកមួយនៃកាសែត Financial Times ជាពិសេស វាផ្តោតលើ Greenfield FDI ដែលសំដៅលើការវិនិយោគថ្មីក្នុងមូលធនរូបវន្ត ឬហេដ្ឋារចនាសម្ព័ន្ធ។

ក្នុងរបាយការណ៍ fDi Intelligence បានលើកឡើងថា កម្ពុជាបានកត់ត្រាគម្រោង FDI ក្នុងស្រុកនាឆ្នាំ២០២៤ ជាមួយនឹងការវិនិយោគលើវិស័យជាច្រើន ដូចជា សេវាកម្ម អាជីវកម្ម ការដឹកជញ្ជូន ផលិតផលប្រើប្រាស់ យានយន្ត និងវាយនភណ្ឌ។

កម្ពុជា​​ ជា​ប្រទេស​មួយ​ក្នុង​ចំណោម​ប្រទេសដែល​ទទួល​រង​ផល​ប៉ះពាល់​បន្ទាប់​ពី​ពន្ធ​ដំបូង​របស់​លោក​ប្រធានាធិបតី Donald Trump​ បានដាក់តម្លៃក្នុងអត្រាចំនួន ៤៩ ភាគរយ​ក្រោយមក​ចុះ​មក​ត្រឹម១៩ ភាគរយ​នៅ​ថ្ងៃ​ទី ១ ខែ​សីហា​ឆ្នាំ២០២៥។

ប្រភពដដែលបានបន្តថា កម្ពុជាពឹងផ្អែកខ្លាំងលើការនាំចេញ ជាពិសេសក្នុងវិស័យកាត់ដេរ ដែលបង្កើតការងារសម្រាប់កម្មករប្រហែល ៩២៥ ០០០ នាក់ ដែលមាន ៧៥.៥ ភាគរយជាស្ត្រី។ នេះបើយោងតាមសមាគមវាយនភ័ណ្ឌ សំលៀកបំពាក់ ស្បែកជើង និងផលិតផលធ្វើដំណើរ (TAFTAC)។ ក្រៅពីនេះ fDi Intelligence ក៏បានសង្កត់ធ្ងន់លើភាពលេចធ្លោនៃការវិនិយោគរបស់ចិននៅកម្ពុជា ដោយបានបញ្ជាក់ថា ចិនគឺជាដៃគូវិនិយោគដ៏សំខាន់របស់កម្ពុជា ។

នៅឆ្នាំ២០២៤ ប្រទេសចិនមានច្រើនជាងមួយភាគបីនៃគម្រោងវិនិយោគពីបរទេសទាំងអស់មកកម្ពុជា ដោយផ្តោតជាពិសេសលើផលិតកម្ម និងក្នុងចំណោមគម្រោងផ្សេងទៀត រួមមានគម្រោងរបស់រោងចក្រផលិតរថយន្តអគ្គិសនីចិន BYD ដោយរដ្ឋាភិបាលកម្ពុជាបានប្រកាសអំពីផែនការរបស់ក្រុមហ៊ុនសម្រាប់ផែនការដំឡើងនៅក្នុងតំបន់សេដ្ឋកិច្ចពិសេសក្រុងព្រះសីហនុ កាលពីខែកក្កដា ឆ្នាំ២០២៤។

បន្ថែមពីនេះ កម្ពុជាក៏​បាន​ទាក់ទាញ​ការ​វិនិយោគ​​ចំនួន ៥,៨ ពាន់​លាន​ដុល្លារ​ក្នុង​ឆមាស​ទី១ ឆ្នាំ២០២៥ ​កើនឡើង ៧៧ ភាគរយ​ នេះ​បើ​តាម​ក្រុមប្រឹក្សា​អភិវឌ្ឍន៍​កម្ពុជា (CDC)។ កម្ពុជាបានអនុម័តគម្រោងវិនិយោគចំនួន៣៧៣ ក្នុងអំឡុងពីខែមករា ដល់ខែមិថុនា ឆ្នាំនេះ កើនឡើង៩៦ ភាគរយ ពី១៩០ គម្រោងក្នុងរយៈពេលដូចគ្នាកាលពីឆ្នាំមុនដែលបង្កើតការងារប្រហែល ២៥៥ ០០០កន្លែង។

គម្រោងធំៗរួមមាន រោងចក្រផលិតឧបករណ៍យានដ្ឋាន រោងចក្រដំឡើងរថយន្ត រោងចក្រផលិតសំបកកង់រថយន្ត រោងចក្រដំឡើងកង់បី រោងចក្រថាមពលពន្លឺព្រះអាទិត្យ រោងចក្រផលិតបន្ទះស្រូបពន្លឺព្រះអាទិត្យ ស្ថានីយ៍ថាមពលខ្យល់ រោងចក្រវារីអគ្គិសនី រោងចក្រកែច្នៃដែក និងអាលុយមីញ៉ូម កំពង់ផែស្ងួត និងរមណីយដ្ឋានទេសចរណ៍៕