បរទេស ៖ មនុស្សគ្រប់គ្នាសុទ្ធតែបានទទួលស្គាល់ និងដឹងគ្រប់ហើយថា សហរដ្ឋអាមេរិកមិនត្រឹមតែជាប្រទេសអភិវឌ្ឍកម្រិតខ្ពស់នោះទេ ថែមទាំងជាប្រទេសមហាអំណាចកំពូលលើពិភពលោកស្ទើរគ្រប់វិស័យទាំងអស់ មិនថាពាណិជ្ជកម្ម សេដ្ឋកិច្ច នយោបាយ និងអាវុធក្តី ប៉ុន្តែនេះមិនមែនមានន័យថាអាមេរិករវល់តែការងារសំខាន់ៗ ហើយមិនគិតពីសង្វាក់ផ្គត់ផ្គង់ចំណីអាហាររបស់ខ្លួន ដោយត្រូវតែពឹងផ្អែកលើការនាំចូលពីខាងក្រៅទាំងស្រុងនោះទេ។

គិតត្រឹមតែការចិញ្ចឹមសត្វគោ និងឧស្សាហកម្មផលិតសាច់គោប៉ុណ្ណោះ សហរដ្ឋអាមេរិកអាចទាញរកចំណូលបានទៅដល់រាប់ពាន់លានដុល្លារជារៀងរាល់ឆ្នាំ ហើយថែមទាំងមានឈ្មោះជាអ្នកផលិតសាច់គោច្រើនជាងគេបំផុតរបស់ពិភពលោកផងដែរ ដោយក្នុងនោះបូករួមទាំងប្រេស៊ីល និងចិនផងដែរ ដែលធ្វើឲ្យប្រទេសទាំង៣នេះមានចំណែកក្នុងការផ្គត់ផ្គង់សាច់គោដល់ទៅ៤០ភាគរយនៃទីផ្សារពិភពលោក។

ថ្វីត្បិតតែមានការធ្លាក់ចុះនៃការផលិតបន្តិចធៀបទៅនឹងឆ្នាំ២០២៣ដែលអាមេរិកធ្វើបានដល់ទៅ១៥,១ពាន់លានដុល្លារ ប៉ុន្តែនៅក្នុងឆ្នាំ២០២៤នេះ គេព្យាករណ៍ថា អាមេរិកនឹងអាចផលិតសាច់គោបានទៅដល់១២,៥ពាន់លានដុល្លារ។ ក្នុងនោះដែរ ចំនួនការងារដែលមាននៅក្នុងឧស្សាហកម្មផលិតសាច់គោរបស់សហរដ្ឋអាមេរិកមិនមានការធ្លាក់ចុះឡើយដោយកាលពីឆ្នាំ២០២៣ឧស្សាហកម្មនេះអាចផ្តល់កន្លែងការងារដល់មនុស្សរហូតទៅដល់ ៧៨៥ ២០៨នាក់។ នេះបើយោងតាមរបាយការណ៍ដែលធ្វើឡើងដោយ ibisworld.com។

អាមេរិកបានចាត់ទុកថា ការផលិតសាច់គោមិនត្រឹមតែបានផ្តល់ចំណូលសម្រាប់កសិករក្នុងស្រុកនោះទេ វាថែមទាំងអាចផ្តល់ផលិតផល និងផលអត្ថប្រយោជន៍ជាច្រើនទៀតដើម្បីជំរុញកំណើនសេដ្ឋកិច្ច និងលើកកម្ពស់សុវត្ថិភាពនៃប្រព័ន្ធអេកូឡូស៊ីតាមរយៈការចិញ្ចឹមគោច្រើនប្រភេទដូចជា Black Angus, Hereford, Limousin និង Charolais ជាដើម។

អាមេរិកមិនត្រឹមតែចិញ្ចឹមគោសម្រាប់យកតែសាច់នោះទេ ប៉ុន្តែគេក៏អាចទាញវាទៅជាការផលិតជារបស់របរប្រើប្រាស់ក្នុងផ្ទះ ផលិតផលសុខភាពមួយចំនួន បន្ថែមពីលើផលិតផលដែលប្រើក្នុងឧស្សាហកម្មផ្សេងទៀតដែលរបស់របរទាំងនេះរួមមាន គ្រឿងសំអាង ក្រដាស ប៊ូតុង និងថ្នាំសម្រាប់អាំងស៊ុយលីន កូលេស្តេរ៉ុល ហើយក្រៅពីនោះ ការចិញ្ចឹមគោក៏ជួយការពារភ្លើងឆេះព្រៃក្នុងស្ថានភាពអាកាសធាតុស្ងួតផងដែរ ព្រោះគោនឹងស៊ីបំផ្លាញស្មៅលើវាលស្មៅខ្ពស់ដែលអាចឆេះបាន។

គួរឲ្យដឹងដែរថា សាច់គោស្ថិតនៅក្នុងចំណោមអាហារជាសាច់ចាំបាច់ផ្សេងទៀតដែលត្រូវបានប្រើប្រាស់ជាប្រចាំនៅក្នុងសង្វាក់ផលិតចំណីអាហាររបស់ពិភពលោក ហើយគិតត្រឹមឆ្នាំ២០២១ទីផ្សារនេះមានទំហំដល់ទៅ ៣៩៥,២២ពាន់លានដុល្លារ និងបន្តកើនឡើងទៅដល់ជាង៤១០ពាន់លានដុល្លារកាលពីឆ្នាំ២០២ ហើយអាចនឹងបន្តកើនឡើងជាង៥០ភាគរយដល់ទៅ ៦៣៩,៩ពាន់លានដុល្លារនៅត្រឹមឆ្នាំ២០៣០ ឬស្ថិតនៅក្នុងអត្រាកើនឡើងប្រចាំឆ្នាំប្រមាណជា៥,៥ភាគរយសម្រាប់ឆ្នាំ២០២៣ដល់ឆ្នា២០៣០៕