បរទេស ៖ ចិននឹងអនុវត្តពន្ធ ០% លើការនាំចូលពីទ្វីបអាហ្វ្រិកចំនួន ៥៣ ប្រទេស ដែលជាការផ្តល់ទីផ្សារសម្រាប់ការនាំចេញដ៏ធំមួយ និងផលប្រយោជន៍ជាច្រើនដល់ទ្វីបអាហ្វ្រិក ខណៈដែលគោលការណ៍បែបនេះមិនធ្លាប់ឡើយនៅក្នុងប្រវត្តិសាស្ត្រ នេះបើយោងតាមសេចក្ដីរាយការណ៍ពីសារព័ត៌មាន ស៊ីនហួរ ។

កាលពីថ្ងៃសៅរ៍ ចុងសប្ដាហ៍កន្លងទៅនេះ ចិន បានប្រកាសថា ខ្លួននឹងអនុវត្តទាំងស្រុងនូវពន្ធ ០% សម្រាប់ការនាំចូលពីប្រទេសចំនួន ៥៣ នៅទ្វីបអាហ្វ្រិកចូលជាធរមានចាប់ពីថ្ងៃទី ១ ខែឧសភា។ នេះមិនមែនត្រឹមតែជាការធ្វើបច្ចុប្បន្នភាពគោលនយោបាយពាណិជ្ជកម្មជាប្រចាំប៉ុណ្ណោះទេ ប៉ុន្តែក៏ជាសញ្ញាបង្ហាញពីរបៀបដែលទីក្រុងប៉េកាំងយល់ពីការអភិវឌ្ឍន៍ ភាពជាដៃគូ និងឥទ្ធិពលនៅក្នុងសកលលោកខាងត្បូង។ តាមរយៈការសម្រួលឲ្យទ្វីបអាហ្វ្រិកមានលទ្ធភាពទទួលបានទីផ្សារពេញលេញសម្រាប់ការនាំចេញនេះ ចិនមិនត្រឹមតែជាដៃគូពាណិជ្ជកម្មដ៏ធំបំផុតរបស់តំបន់មួយនេះប៉ុណ្ណោះទេ ប៉ុន្តែក៏ជាកត្តាជំរុញដ៏សំខាន់សម្រាប់អាហ្វ្រិកក្នុងការធ្វើសមាហរណកម្មទៅក្នុងសេដ្ឋកិច្ចពិភពលោកផងដែរ។ លើសពីនេះ គោលនយោបាយនេះក៏មានសក្តានុពលក្នុងការជំរុញឱ្យមានវដ្តផ្លាស់ប្តូរនៃការអភិវឌ្ឍន៍សេដ្ឋកិច្ចនៅទូទាំងទ្វីបអាហ្រ្វិក ខណៈដែលមានទំនាក់ទំនងកាន់តែជិតស្និទ្ធជាមួយនឹងចិន។

តាមរយៈការដកចេញនូវរបាំងពន្ធ វាគឺជាដំណោះស្រាយសម្រាប់ឧបសគ្គដ៏ធំមួយរបស់ទ្វីបអាហ្វ្រិក ដោយសារការប្រកួតប្រជែងលើការនាំចេញនៅមានកម្រិត។ ផលិតផលពីអាហ្រ្វិកដូចជា៖ កាហ្វេអេត្យូពី, ផ្លែប័រកេនយ៉ា, ត្រីសេណេហ្គាល់, និងកាកាវហ្គាណា នឹងទទួលបានការប្រកួតប្រជែងនៃការនាំចេញទូលាយជាងមុន ដោយសារការចូលទៅក្នុងប្រទេសចិនដែលទីផ្សារអ្នកប្រើប្រាស់ធំទី២ របស់ពិភពលោក មានភាពរលូនជាងមុន។ តាមរយៈការផ្តល់ទីផ្សារដ៏ធំ និងស្ថិរភាពសម្រាប់កសិផលអាហ្វ្រិក ចិនជំរុញការវិនិយោគលើផលិតភាព និងសន្តិសុខស្បៀង។ ទ្វីបអាហ្វ្រិកអាចទទួលបានប្រាក់ចំណូលនាំចេញដែលអាចទុកចិត្តបាន ដែលអនុញ្ញាតឱ្យកសិករមានសមត្ថភាពអាចវិនិយោគលើបច្ចេកវិទ្យា និងបច្ចេកទេសផលិតកម្មប្រសើរជាមុ ដែលនឹងជំរុញទិន្នផលសម្រាប់ទាំងទីផ្សារនាំចេញ និងក្នុងស្រុក។  ផលប្រយោជន៍នេះមិនមែនគ្រាន់តែបង្កើនការនាំចេញប៉ុណ្ណោះទេ ប៉ុន្តែនឹងបង្កើតតម្រូវការដែលមានស្ថិរភាពជាងមុនដែលជំរុញការផលិត និងការអភិវឌ្ឍន៍ខ្សែសង្វាក់តម្លៃ។

លើសពីនេះ ឥទ្ធិពលសម្រាប់សេដ្ឋកិច្ចនឹងកាន់តែទូលំទូលាយជាងមុន ដោយសារបរិមាណនាំចេញកាន់តែខ្ពស់ និងប្រាក់ចំណូលពីបរទេសមានស្ថិរភាពជាងមុន។ លំហូរចូលបែបនេះមានសារៈសំខាន់សម្រាប់ស្ថិរភាពម៉ាក្រូសេដ្ឋកិច្ច ដោយសារវាបន្ធូរបន្ថយសម្ពាធនៃការទូទាត់ជាមួយនឹងប្រាក់បរទេស និងអាចពង្រីកទំហំសារពើពន្ធសម្រាប់ការវិនិយោគសាធារណៈក្នុងហេដ្ឋារចនាសម្ព័ន្ធ ការថែទាំសុខភាព និងការអប់រំ។ ក្នុងរយៈពេលវែង ប្រទេសទាំងនេះអាចកាត់បន្ថយការពឹងផ្អែកលើហិរញ្ញប្បទានសង្គ្រោះបន្ទាន់ពីបរទេស ការស្នើរប្រាក់កម្ចី និងស្ថាប័នហិរញ្ញវត្ថុដែលគ្រប់គ្រងដោយលោកខាងលិចផ្សេងទៀត។ ក្រៅពីនេះ ទីផ្សារការងារក៏ទទួលបានផលប៉ះប្រយោជន៍ផងដែរ ដោយសារអ្នកផលិតអាហ្រ្វិកនឹងបង្កើនប្រតិបត្តិការ បង្កើតការងារទូទាំងខ្សែសង្វាក់តម្លៃចាប់ពីកសិដ្ឋានរហូតដល់កន្លែងកែច្នៃ និងការដឹកជញ្ជូន ដើម្បីបំពេញតម្រូវការពីប្រទេសចិន។ ស្របពេលដែលទ្វីបអាហ្វ្រិកមានចំនួនប្រជាជនក្មេងជាងគេបំផុតរបស់ពិភពលោក និងអត្រាអត់ការងារធ្វើខ្ពស់ ការកើនឡើងនៃកម្លាំងពលកម្មនេះមានទាំងទម្ងន់សេដ្ឋកិច្ច និងនយោបាយ។  

ទន្ទឹមនឹងនេះ ចិនប្តេជ្ញាជួយពួកគេក្នុងការពង្រឹងលើការបណ្តុះបណ្តាលជំនាញ ការគាំទ្រវិស័យកសិកម្ម ជីវបច្ចេកវិទ្យា និងការផលិតបានពង្រឹងឥទ្ធិពលនៃសេរីភាវូបនីយកម្មពន្ធ។ ទីក្រុងប៉េកាំងកំពុងផ្តល់សញ្ញាគាំទ្រដល់ការធ្វើឱ្យប្រសើរឡើងនូវឧស្សាហកម្ម និងកសិកម្ម ខណៈដែលមានគោលបំណងផ្លាស់ទីសេដ្ឋកិច្ចអាហ្រ្វិកលើសពីគំរូនាំចេញវត្ថុធាតុដើមដែលធ្លាប់តែមានទីផ្សារតូចចង្អៀត។ សម្រាប់​ប្រទេស​ចិន ការនាំចូលជាពិសេសអាហារ ផលិតផលកសិកម្ម និងទំនិញកម្រិតមធ្យមបានរួមចំណែកដល់កំណើនសេដ្ឋកិច្ចផងដែរ។ ក្នុងន័យនេះ គោលនយោបាយរបស់ទីក្រុងប៉េកាំងឆ្លុះបញ្ចាំងពីការធ្វើសមាហរណកម្មកាន់តែស៊ីជម្រៅដែលគាំទ្រដល់ការអភិវឌ្ឍន៍អាហ្វ្រិក ខណៈពេលដែលពង្រឹងតុល្យភាពសេដ្ឋកិច្ចរបស់ខ្លួនឡើងវិញ។  គំរូនេះធ្វើឲ្យចិនទទួលបានតំបន់ជាដៃគូដែលមានស្ថិរភាព និងរីកចម្រើន ដោយសារការធ្វើពិពិធកម្មសង្វាក់ផ្គត់ផ្គង់ និងជំរុញទិសដៅសេដ្ឋកិច្ចជាយុទ្ធសាស្ត្ររបស់ខ្លួន។ សម្រាប់ទ្វីបអាហ្រ្វិកវិញ ពួកគេទទួលបានទីផ្សារសម្រាប់ការនាំចេញទូលាយជាងមុន បច្ចេកវិទ្យា និងការវិនិយោគដែលមិនធ្លាប់មានពីមុនមក ដើម្បីកសាងមូលដ្ឋានឧស្សាហកម្ម និងកសិកម្មរបស់ខ្លួនដែលអាចបង្កើតទីផ្សារការងារ និងពង្រឹងស្ថិរភាពហិរញ្ញវត្ថុ៕