ភ្នំពេញ៖ ឯកឧត្តម ឧបនាយករដ្ឋមន្ត្រី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា បានអំពាវនាវឱ្យវិនិយោគិនចិនពិចារណា និងពិនិត្យលទ្ធភាពក្នុងការបោះទុនវិនិយោគនៅកម្ពុជាឱ្យកាន់តែច្រើនថែមទៀត ដោយសារកម្ពុជាស្ថិតនៅចំណុចកណ្តាលនៃតំបន់ និងមានអត្ថប្រយោជន៍លើកទឹកចិត្តជាច្រើនតាមរយៈច្បាប់វិនិយោគថ្មី។

នៅក្នុងការផ្តល់កិច្ចសម្ភាសន៍ពិសេសដល់ភ្នាក់ងារសារព័ត៌មាន China News Service (CNS) ដែលជាស្ថាប័នព័ត៌មានរដ្ឋដ៏ធំមួយរបស់ចិនកាលពីពេលថ្មីៗនេះ ឯកឧត្តមឧបនាយករដ្ឋមន្ត្រី ស៊ុន ចាន់ថុល បានលើកឡើងថា៖ ចិននៅតែជាប្រភពទុនវិនិយោគធំជាងគេបង្អស់នៅកម្ពុជា ខណៈដែលកម្ពុជា ស្វាគមន៍ជានិច្ចនូវរាល់ការវិនិយោគស្របច្បាប់ពីគ្រប់បណ្តាប្រទេសទាំងអស់ដោយគ្មានការរើសអើង។

ឯកឧត្តមបញ្ជាក់ថា ៖

«គំនិតផ្តួចផ្តើមខ្សែក្រវាត់ និងផ្លូវ (BRI) បានដើរតួនាទីយ៉ាងសំខាន់មិនអាចខ្វះបានក្នុងការជួយជំរុញការអភិវឌ្ឍសង្គម-សេដ្ឋកិច្ចរបស់កម្ពុជា តាមរយៈការកសាងហេដ្ឋារចនាសម្ព័ន្ធរូបវ័ន្តធំៗ ដែលជាសរសៃឈាមសេដ្ឋកិច្ចដ៏មានសារៈសំខាន់។ សម្រាប់ឆ្នាំ២០២៦នេះ កម្ពុជារំពឹងថានឹងទទួលបានភ្ញៀវទេសចរចិនកាន់តែច្រើន ដែលជានឹងក្លាយជាកម្លាំងចលករជួយដល់សេដ្ឋកិច្ចមូលដ្ឋាន»។

នៅក្នុងឱកាសនេះដែរ ឯកឧត្តមឧបនាយករដ្ឋមន្ត្រី បានអះអាងជាថ្មីនូវគោលជំហរដ៏រឹងមាំរបស់កម្ពុជា ក្នុងការគាំទ្រគោលនយោបាយចិនតែមួយ។ បន្ថែមលើនេះ ក្រោមការដឹកនាំដ៏ខ្ពង់ខ្ពស់របស់ សម្តេចធិបតី ហ៊ុន ម៉ាណែត ជានាយករដ្ឋមន្ត្រី កម្ពុជាមានការប្តេជ្ញាចិត្តយ៉ាងដាច់ខាតក្នុងការប្រយុទ្ធប្រឆាំង និងបង្ក្រាបរាល់សកម្មភាពខុសច្បាប់នានា ជាពិសេសបទល្មើសឆបោកតាមប្រព័ន្ធអនឡាញ (Online Scamming) ដើម្បីធានានូវបរិយាកាសវិនិយោគ និងទេសច​រណ៍ដ៏ស្រស់បំព្រង និងមានសុវត្ថិភាពនៅកម្ពុជាសម្រាប់គ្រប់ៗគ្នាទាំងភ្ញៀវទេសចរនិងអ្នកវិនិយោគ។

យោងតាមស្ថិតិពីក្រសួងទេសចរណ៍បានបង្ហាញថា ក្នុងរយៈពេល១២ខែ ឆ្នាំ២០២៥ កម្ពុជាទទួលបានភ្ញៀវទេសចរមកពីចិន មានចំនួនច្រើនជាង ១លាននាក់ (១ ១០៤ ៩៥២ នាក់) កើនឡើងជិត៤៤% ធៀបនឹងរយៈពេលដូចគ្នាក្នុងឆ្នាំ២០២៤ ដែលមានបរមាណ ៧៧ម៉ឺននាក់ប៉ុណ្ណោះ ។ ដោយឡែក ក្នុងរយៈពេល​ប៉ុន្មានឆ្នាំចុងក្រោយនេះ ចិន​ បានឈរ​លំដាប់ទី១​​ ដែលបានដាក់ទុនវិនិយោគនៅក្នុងប្រទេសកម្ពុជា​លើ​វិស័យ​នានា ដូចជា​ អចលនទ្រព្យ ឧស្សាហកម្ម ហិរញ្ញវត្ថុ និងហេដ្ឋារចនាសម្ព័ន្ធ ជាដើម ជាក់ស្ដែង​ ក្នុងឆ្នាំ២០២៥​កន្លងទៅនេះ កម្ពុជា​ទទួលបាន​ប្រភពទុនវិនិយោគពីប្រទេស​ចិនសរុបជាង​ ៦១០០លានដុល្លារអាម៉េរិក​ ។

តាមរយៈគណៈកម្មាធិការ​វិនិយោគនៃក្រុមប្រឹក្សា​​កម្ពុជាបានចុះបញ្ជី​វិនិយោគលើគម្រោង​ចំនួន​ ៦៣០គម្រោង ​ដែលមានទុនវិនិយោគប្រមាណ ១០ពាន់​លានដុល្លារអាម៉េរិក ក្នុងនោះ​ប្រភពទុនវិនិយោគមកពីប្រទេស​ចិនមានចំណែក​ប្រមាណ ៥៤,២៥ភាគរយ ឬប្រមាណ ៥ ៤២៥លាន​ដុល្លារអាម៉េរិក ដែលធ្វើឱ្យ​ប្រទេសចិនឈរ​នៅលំដាប់កំពូល​នៃការ​វិនិយោគនៅក្នុងប្រទេស​កម្ពុជា ។

ក្រៅពីប្រភពទុនដែល​វិនិយោគិនបានចុះបញ្ជីវិនិយោគនៅគណៈកម្មាធិការ​វិនិយោគ​នៃក្រុមប្រឹក្សាអភិវឌ្ឍន៍កម្ពុជា វិនិយោគិន​ក៏បាន​ចុះបញ្ជី​វិនិយោគជាមួយ​អនុគណៈកម្មាធិការ​វិនិយោគរាជធានី-ខេត្ត​​ជាមួយនឹង​ដើមទុនចំនួន ​៨២៨​លានដុល្លារអាម៉េរិក ដូច្នេះ ទឹកប្រាក់វិនិយោគសរុប​មកពីប្រទេស​ចិន​​ក្នុងឆ្នាំ២០២៥ មានចំនួន ៦ ១៥៣​លានដុល្លារអាម៉េរិក ដែលភាគច្រើនផ្ដោតលើ​វិស័យ​ឧស្សាហកម្ម និងហេដ្ឋារចនាសម្ព័ន្ធ ដែលធ្វើឱ្យ​តម្រូវ​ការ​ដីធ្លីសម្រាប់​បម្រើដល់ការ​វិនិយោគក្នុងវិស័យឧស្សាហកម្ម​មានកំណើន​ខ្ពស់ ជាពិសេស​នៅបណ្ដាខេត្ត​ជាប់រាជធានីភ្នំពេញ រួមមានកំពង់ស្ពឺ កណ្ដាល​ តាកែវ និង​បណ្ដាខេត្ត​ជាប់ព្រំដែនវៀតណាម​ រួមមាន​ក្រចេះ ស្វាយរៀង​​ ។

គួរ​បញ្ជាក់ថា កាលពី​ឆ្នាំ​២០២៤​កន្លងទៅ ​កម្ពុជា​អនុម័ត​គម្រោង​វិនិយោគ​សរុប​ចំនួន​៤១៤​គម្រោង​ ដែលមានទឹកប្រាក់​វិនិយោគ​ប្រមាណ ៦,៩​ពាន់លានដុល្លារអាម៉េរិក ក្នុងនោះប្រភពទុន​វិនិយោគ​ពី​ប្រទេស​ចិន​មានរហូតដល់ ៤៩,៨២ភាគរយឯណោះ ឬប្រមាណ ៣,៤៣ពាន់លានដុល្លារអាមេរិក៕