សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ពិព័រណ៍ «ធុរកិច្ចថ្មី នវានុវត្ដន៍ និងបច្ចេកវិទ្យា ក្នុងបរិបទសេដ្ឋកិច្ច និងសង្គមឌីជីថល» ត្រូវបានរៀបចំឡើងដោយមជ្ឈមណ្ឌលបណ្ដុះធុរកិច្ចថ្មី «តេជោ» ចាប់ពីថ្ងៃទី ២២ ហើយបញ្ចប់នៅថ្ងៃទី ២៣ ខែវិច្ឆិកា ឆ្នាំ២០២៣ នៅសណ្ឋាគារសូហ្វីតែលភូគីត្រា រាជធានីភ្នំពេញ។
ពិព័រណ៍នេះ មានការចូលរួមពីតំណាងថ្នាក់ដឹកនាំក្រសួង ស្ថាប័នពាក់ព័ន្ធ, ស្ថាប័នគាំទ្រសហគ្រិនភាព, គ្រឹះស្ថានធនាគារ, ធុរកិច្ចថ្មី, គ្រឹះស្ថានអប់រំ, ដៃគូអភិវឌ្ឍន៍, សហគ្រាស, សិស្ស-និស្សិត ក៏ដូចជាសាធារណជនសរុបចំនួន ជាង១ម៉ឺននាក់។
ពិព័រណ៍នេះត្រូវបានធ្វើឡើងក្រោមគោលបំណងចម្បងចំនួន ៥ គឺ១) ជំរុញបរិវត្តកម្មឌីជីថលសហគ្រាស និងលើកកម្ពស់សហគ្រិនភាព និងធុរកិច្ចថ្មី ២) បញ្ជ្រាបការយល់ដឹងអំពី ធុរកិច្ចថ្មីដល់តួអង្គពាក់ព័ន្ធ ជាពិសេសទៅដល់យុវជនដែលមានបំណងចង់បង្កើតធុរកិច្ចថ្មី, ៣) ផ្សព្វផ្សាយអំពីនីតិវិធីចុះបញ្ជីអាជីវកម្ម, នីតិវិធីស្នើសុំអាជ្ញាបណ្ណជំនាញ និងសេវាគាំទ្រផ្សេងៗ ពាក់ព័ន្ធនឹងការធ្វើអាជីវកម្ម និងការបង្កើតធុរកិច្ចថ្មី, ៤) ពង្រីកបណ្តាញគាំទ្រ និងកៀរគរតួអង្គពាក់ព័ន្ធក្នុងការពង្រឹងប្រព័ន្ធអេកូឡូស៊ីធុរកិច្ច និង ៥) ផ្សារភ្ជាប់សហគ្រិន និងនវានុវត្តន៍ជាមួយអ្នកជំនាញតាម វិស័យនីមួយៗ ។
ពិព័រណ៍នេះមានវេទិកាចំនួន ២ រួមមាន (១) វេទិកាធំ ដែលផ្តោតលើកិច្ចពិភាក្សាស្តីពីសេដ្ឋកិច្ចឌីជីថល និងការចាប់យកឌីជីថលរបស់សហគ្រាស និង (២) វេទិកាធុរកិច្ចថ្មី ដែលផ្តោតលើកិច្ចពិភាក្សា និងកម្មវិធីប្រកួតប្រជែងនានាក្រោមប្រធានបទពាក់ព័ន្ធនឹងធុរកិច្ចថ្មី។ ពិព័រណ៍នេះមាន សុន្ទរកថាចំនួន ៤, បទបង្ហាញចំនួន ២១ និងកិច្ចពិភាក្សាចំនួន ៨ ដែលផ្តោតលើប្រធានបទសំខាន់ៗ ដូចជា សេដ្ឋកិច្ចឌីជីថល, ធុរកិច្ចឌីជីថល, បរិវត្តកម្មសហគ្រាស, យុទ្ធសាស្ត្រជាតិដើម្បីគាំទ្រ, នីតិវិធីក្នុងការអនុលោមតាមផ្លូវច្បាប់, ធុរកិច្ចថ្មី និងប្រព័ន្ធអេកូឡូស៊ីធុរកិច្ចថ្មី។បន្ថែមលើនេះពិព័រណ៍នេះ ក៏មានស្តង់ចំនួន ៤០ សម្រាប់ដាក់បង្ហាញផលិតផល និងសេវាកម្មរបស់ក្រសួង និងស្ថាប័នសាធារណៈ, ស្ថាប័នគាំទ្រសហគ្រិនភាព, សហគ្រាស និងធុរកិច្ចថ្មី ផងដែរ។
ពិព័រណ៍នេះត្រូវបានចាប់ផ្ដើមឡើងដោយសុន្ទរកថាបើករបស់ ឯកឧត្តមបណ្ឌិត គង់ ម៉ារី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលនៃ មជ្ឈមណ្ឌលបណ្តុះធុរកិច្ចថ្មី “តេជោ” ដែលជាតំណាងដ៏ខ្ពង់ខ្ពស់របស់ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។ បន្ថែមពីនេះ ពិព័រណ៍នេះក៏មានសុន្ទរកថាស្វាគមន៍ ចំនួន ២ ដោយ ឯកឧត្តម កែវ សុទ្ធិ រដ្ឋលេខាធិការក្រសួងប្រៃសណីយ៍ និងទូរគមនាគមន៍ និង ឯកឧត្តម បណ្ឌិត តាំង ងួនលី នាយកមជ្ឈមណ្ឌលបណ្ដុះធុរកិច្ចថ្មី “តេជោ”។
ក្នុងពិព័រណ៍នេះ អ្នកចូលរួមបានទទួលចំណេះដឹង និងព័ត៌មានជាច្រើន តាមរយៈការចែក- រំលែកបទពិសោធន៍, កិច្ចពិភាក្សា និងបទបង្ហាញពីវាគ្មិនជាតិ និងអន្តរជាតិ។ ចំណេះដឹង និងព័ត៌មាន ទាំងនោះផ្ដោតទៅលើទិដ្ឋភាពសំខាន់ៗចំនួន ៥ រួមមាន (១) ស្ថានភាព, ការចូលរួមចំណែក, ការកំណត់អាទិភាព និងកាលានុវត្តភាពនៃសេដ្ឋកិច្ចឌីជីថល ដើម្បីជំរុញទៅដល់ការអភិវឌ្ឍសេដ្ឋកិច្ច និង សង្គម (២) យុទ្ធសាស្ត្រ និងនីតិវិធីក្នុងការចុះបញ្ជីអាជីវកម្ម តាមរយៈថ្នាលបច្ចេកវិទ្យាព័ត៌មានទាំងស្រុង, (៣) ស្ថានភាព និងតម្រូវការរបស់សហគ្រាស ក៏ដូចជាការគាំទ្រសហគ្រាសក្នុងការចាប់យកឌីជីថល, (៤) ស្ថានភាព, វឌ្ឍនភាព និងសេវាកម្មផ្សេងៗរបស់ធុរកិច្ចថ្មីនៅកម្ពុជា និង (៥) បញ្ហាប្រឈម, កាលានុវត្តភាព និងតម្រូវការ ក្នុងការអភិវឌ្ឍប្រព័ន្ធអេកូឡូស៊ីធុរកិច្ចថ្មីនៅកម្ពុជា។
យោងតាមសេចក្តីប្រកាសពត៌មានរបស់មជ្ឈមណ្ឌលបណ្ដុះធុរកិច្ចថ្មី “តេជោ” ពិព័រណ៍នេះបានប្រព្រឹត្តទៅយ៉ាងរលូននិងទទួលបានលទ្ធផលគាប់ប្រសើរដូចការរំពឹងទុកដោយមានអន្តរសកម្ម និងការពិភាក្សាគ្នាយ៉ាងផុសផុល ប្រកបដោយ ស្មារតីចែករំលែក និងយកចិត្ត- ទុកដាក់ខ្ពស់ តាមរយៈបទបង្ហាញ, កិច្ចពិភាក្សា និងការដាក់បង្ហាញផលិតផល និងសេវាកម្ម, មជ្ឈមណ្ឌលបណ្តុះធុរកិច្ច “តេជោ សង្ឃឹមយ៉ាងមុតមាំថា ពិព័រណ៍នេះបានចូលរួមចំណែកដល់ ការជំរុញការអភិ វឌ្ឍធុរកិច្ចឌីជីថល ក៏ដូចជាសេដ្ឋកិច្ច និងសង្គមឌីជីថលក្នុងប្រទេសកម្ពុជា តាមរយៈ ការផ្តល់ព័ត៌មាន, ចំណេះដឹងបន្ថែម និងឱកាសផ្សារភ្ជាប់រវាងតួអង្គពាក់ព័ន្ធទាំងអស់៕
Account
Security
Favourite Content