ភ្នំពេញ ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា​ បានថ្លែងឱ្យដឹងថា ផលិ​តផលក្នុងស្រុកសរុប (ផ.ស.ស ) ត្រូវបានរំពឹងថា នឹងកើនឡើងដល់ ៥១,៣៩ពាន់លានដុល្លារអាម៉េរិកក្នុងឆ្នាំ២០២៥ ជាមួយនឹងប្រាក់ចំណូលសម្រាប់មនុស្សម្នាក់មានចំនួន ២ ៩២៤ដុល្លារអាម៉េរិក ដែលបានកើនពី ២ ៧១៣ដុល្លារអាម៉េរិកក្នុងឆ្នាំ២០២៤កន្លងទៅ ។ ការលើកឡើងបែបនេះត្រូវបានធ្វើឡើងតាមរយៈសារលិខិតអបអរសាទរទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៨ ឆ្នាំ២០២៥ នេះ ។

សម្តេចធិបតី ហ៊ុន ម៉ាណែត​ នៅក្នុងសារលិខិតដដែលបានរំលេចឱ្យដឹងថា កំណើន ផ.ស.ស បានបង្ហាញពីការធ្វើឱ្យប្រសើរឡើងនូវកម្រិតជីវភាពរស់នៅរបស់ប្រជាជនកម្ពុជា ។ ស្ថិតក្នុងបរិការណ៍ដែលសេដ្ឋកិច្ចសកលមានភាពមិនប្រាកដប្រជា ស្របពេលនៃការកើនឡើងនូវភាពប្រកួតប្រជែងផ្នែកភូមិសាស្ត្រនយោបាយ កម្ពុជា ស្ថិតនៅក្នុងរបត់មួយដែលត្រូវបន្តពង្រឹងស្មារតីសន្តិសហវិជ្ជមាន និងជាឱកាសមាស សម្រាប់កម្ពុជា ក្នុងការអភិវឌ្ឍ និងធ្វើឧស្សាហូបនីយកម្ម ការធ្វើពិពិធកម្មសេដ្ឋកិច្ច ការកើនឡើងនៃផលិតកម្ម និងសេវាកម្ម ក៏ដូចជាការបង្កើនការតភ្ជាប់សេដ្ឋកិច្ចកម្ពុជាទៅនឹងសេដ្ឋកិច្ចតំបន់ និងសកល ប្រកបដោយសក្ដានុពល ព្រមទាំងការធ្វើសមាហរណកម្មជាមួយនឹងសេដ្ឋកិច្ចនៃប្រទេសក្នុងតំបន់ដែលកំពុងមានជីវភាពខ្ពស់ផងដែរ ។

សម្ដេចធិបតីបានបន្តថា ច្បាស់ណាស់ ការរក្សាបាននូវភាពរឹងមាំនៃសុខសន្តិភាព និងស្ថិរភាពនយោបាយ បាន និងកំពុងបន្តបង្កើតបរិយកាសអនុគ្រោះដ៏ប្រសើរមិនអាចខ្វះបានក្នុងការជំរុញសន្ទុះនៃការអភិវឌ្ឍសង្គម សេដ្ឋកិច្ច ការរក្សាបានស្ថិរភាពម៉ាក្រូសេដ្ឋកិច្ច ការលើកកម្ពស់នៃការវិនិយោគឯកជន និងធុរកិច្ចដែលជាចន្ទល់នៃកំណើនសេដ្ឋកិច្ច និងការបង្កើតការងារសម្រាប់ប្រជាជនកម្ពុជា ។ យុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល អាណត្តិទី៧ បានដាក់ចេញនូវកម្មវិធីគោលនយោបាយអាទិភាពក្នុងការបណ្ដុះបណ្ដាលជំនាញវិជ្ជាជីវៈ និង​បច្ចេកទេស ដល់យុវជនគោលដៅមកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេសប្រមាណ ១,៥លាននាក់ ក្នុងកម្រិតសញ្ញាបត្របច្ចេកទេស និងវិជ្ជាជីវៈដោយមិនបង់ថ្លៃ និងទទួលបានប្រាក់ឧបត្ថម្ភ ២៨ម៉ឺនរៀលក្នុងមួយខែ ដែលត្រូវបានប្រកាសដាក់ឱ្យអនុវត្តជាផ្លូវការកាលពីថ្ងៃទី១៤ ខែវិច្ឆិកា ឆ្នាំ២០២៣ កន្លងទៅនេះ ។

ដោយឡែក យុវជន រួមទាំងបុគ្គលនៃសេដ្ឋកិច្ចក្រៅប្រព័ន្ធ និងក្នុងប្រព័ន្ធ ក៏ដូចជាបងប្អូនកម្មករនិយោជិត ក៏អាចចូលរៀនក្នុងកម្មវិធីបណ្ដុះបណ្ដាលវិជ្ជាជីវៈ និងបច្ចេកទេសនេះដោយមិនបង់ថ្លៃផងដែរ ដើម្បីចាប់យកជំនាញមួយពិតប្រាកដមុននឹងចូលទីផ្សារការងារ ឬផ្លាស់ប្តូរជំនាញ ឬបង្កើនជំនាញរបស់ខ្លួន។ ដោយឡែក ចំពោះបងប្អូនកម្មករ និយោជិត ដែលកំពុងមានការងារធ្វើស្រាប់ ក៏អាចមានលទ្ធភាព និងឱកាសបង្កើននូវផលិតភាពការងារ ជំនាញ និង/ឬមុខតំណែងរបស់ខ្លួនបានកាន់តែខ្ពស់ និងល្អប្រសើរជាងមុន ។

សារលិខិតរបស់សម្ដេចធិបតី បានបញ្ជាក់បន្ថែមថា តាមរយៈកម្មវិធីនេះ យុវជន និងបងប្អូនកម្មករ និយោជិត នឹងមានជំនាញមួយពិតប្រាកដ អាចយកទៅបង្កើតមុខរបរផ្ទាល់ខ្លួន ឬចូលបម្រើការងារនៅតាមសហគ្រាស គ្រឹះស្ថាននានា ដែលធ្វើឱ្យពួកគាត់មានជីវភាពល្អប្រសើរឡើង រក្សាបាននូវស្ថិរភាពការងារ កំណើនផលិត​ភាព ប្រាក់ចំណូលសមរម្យ លក្ខខណ្ឌការងារល្អ និងចាកផុតពីបន្ទាត់នៃភាពក្រីក្រ ព្រមទាំងចូលរួមចំណែកយ៉ាងសំខាន់ក្នុងការសម្រេចបាននូវគោលដៅយុទ្ធសាស្ត្រទី៣ របស់រាជរដ្ឋាភិបាល ក្នុងការកាត់បន្ថយភាពក្រីក្រក្នុងអត្រាទាបជាង១០ភាគរយ និងទម្លាក់អត្រានៃភាពក្រីក្រឱ្យស្ថិតនៅក្នុងកម្រិតអប្បបរាម ។

ជាមួយគ្នានេះ សិក្ខាកាម សិស្ស និស្សិត មានឱកាសផ្សារភ្ជាប់ទ្រឹស្ដី និងបទពិសោធដែលមាននៅរោងជាង និងមជ្ឈមណ្ឌលស្រាវជ្រាវទៅនឹងការអនុវត្តជាក់ស្ដែងនៅតាមសហគ្រាស គ្រឹះស្ថាន ដែលមានជំនាញទាំងនេះ ឆ្លើយតបទៅនឹងតម្រូវការទីផ្សារការងារ ងាយស្រួលទទួលបានការងារធ្វើ ឬប្រកបមុខរបរដោយខ្លួនឯង ទទួលបានប្រាក់ចំណូលសមរម្យ រក្សាបាននូវស្ថិរភាពចំណូល និងជួយរំដោះខ្លួន និងក្រុមគ្រួសារចេញពីភាពក្រីក្រ ៕