បរទេស ៖ យោងតាមប្រភពសារព័ត៌មានអន្តរជាតិបានរាយការណ៍ថា អតិផរណានៅក្នុងតំបន់ចាយលុយអឺរ៉ូបានធ្លាក់ចុះច្រើនជាងការរំពឹងទុក ដោយផ្តល់នូវការធូរស្រាលខ្លះដល់អ្នកប្រើប្រាស់ និងជំរុញឱ្យមានក្តីសង្ឃឹមថា អត្រាការប្រាក់អាចត្រូវបានកាត់បន្ថយក្នុងពេលឆាប់ៗនេះ។

អតិផរណានៅក្នុងតំបន់ចាយលុយអឺរ៉ូបានធ្លាក់ចុះមកត្រឹម ២,៤ ភាគរយនៅក្នុងខែវិច្ឆិកា ដែលជាកម្រិតទាបបំផុតប្រចាំឆ្នាំចាប់តាំងពីខែកក្កដា ឆ្នាំ២០២១ ហើយតួរលេខនេះធ្លាក់ចុះយ៉ាងខ្លាំងពី ២,៩ ភាគរយកាលពីខែតុលា។ បើធៀបទៅនឹងខែតុលាឆ្នាំមុន អតិផរណាកើនឡើងដល់កម្រិតកំពូល ១០,៦ ភាគរយដោយសារវិបត្តិថាមពលបានធ្វើឱ្យប្រជាពលរដ្ឋ និងអាជីវកម្មរបស់អឺរ៉ុបជួបការលំបាកក្នុងការដោះស្រាយ។

ទន្ទឹមនឹងនេះ តួលេខថ្មីនេះខិតជិតដល់គោលដៅអតិផរណារបស់ធនាគារកណ្តាលអឺរ៉ុបចំនួន ២ ភាគរយ បន្ទាប់ពីមានការដំឡើងអត្រាការប្រាក់ចាប់តាំងពីរដូវក្តៅឆ្នាំ២០២២។ លើសពីនេះ អតិផរណាស្នូលដែលរាប់បញ្ចូលទាំងថ្លៃប្រេងឥន្ធនៈ និងថ្លៃម្ហូបអាហារបានធ្លាក់ចុះទាបជាងការរំពឹងទុករបស់អ្នកជំនាញកាលពីខែមុន ដោយធ្លាក់ចុះមកត្រឹម ៣,៦ ភាគរយពី ៤,២ ភាគរយក្នុងខែតុលា។  អ្នកវិភាគរំពឹងថា ធនាគារកណ្តាលអឺរ៉ុប ECB អាចនឹងរក្សាអត្រាការប្រាក់ថេរជាលើកទី ២ បន្ទាប់ពីកិច្ចប្រជុំថ្ងៃទី ១៤ ខែធ្នូ។

លោកស្រី Christine Lagarde ប្រធានធនាគារកណ្តាលអឺរ៉ុប បានរំលឹកឡើងវិញថា ធនាគារនឹងធ្វើការសម្រេចចិត្តដោយផ្អែកលើទិន្នន័យចុងក្រោយបំផុត និងរក្សាអត្រាការប្រាក់ខ្ពស់ឱ្យបានយូរតាមដែលចាំបាច់ ដើម្បីសម្រេចបាននូវគោលដៅអតិផរណារបស់ខ្លួន។ ចាប់ពីខែវិច្ឆិកា ឆ្នាំ ២០២២ តម្លៃថាមពលបានធ្លាក់ចុះ ១១,៥ ភាគរយ និងតម្លៃអាហារបានធូរស្រាលជាងមុន ប៉ុន្តែហានិភ័យនៅតែមានដោយសារជម្លោះសកល។

ស្របពេលនេះដែរ អាល្លឺម៉ង់ដែលជាសេដ្ឋកិច្ចធំបំផុតរបស់អឺរ៉ុប មានអតិផរណាប្រចាំឆ្នាំធ្លាក់ចុះដល់ ២,៣ ភាគរយក្នុងខែនេះពី ៣ ភាគរយក្នុងខែតុលា។ យ៉ាងណាមិញ អាល្លឺម៉ង់កំពុងប្រឈមមុខនឹងវិបត្តិថវិកា ដែលធ្វើឲ្យក្លាយជាប្រទេសសេដ្ឋកិច្ចធំដែលដំណើរការអាក្រក់បំផុតរបស់ពិភពលោកទាក់ទងនឹងកំណើន។ ការកែប្រែផែនការចំណាយរបស់អាល្លឺម៉ង់បានធ្វើឱ្យរដ្ឋាភិបាលក្នុងការដោះស្រាយបញ្ហាឱនភាព ៦០ ពាន់លានអឺរ៉ូ (ច្រើនជាង ៦៥ ពាន់លានដុល្លារ) ។  មិនត្រឹមតែប៉ុណ្ណោះ វិបត្តិថាមពលគឺជាបន្ទុកខ្លាំងលើអាល្លឺម៉ង់ ដែលពឹងផ្អែកលើហ្គាសធម្មជាតិថោកពីរុស្ស៊ី ដើម្បីផ្តល់ថាមពលដល់រោងចក្ររបស់ខ្លួន។ យ៉ាងណាមិញ បន្ទាប់ពីការដាក់ទណ្ឌកម្មរបស់លោកខាងលិចជុំវិញការឈ្លានពានអ៊ុយក្រែន ទីក្រុងមូស្គូបានកាត់ផ្តាច់ការផ្គត់ផ្គង់មួយចំណែកធំរបស់ខ្លួនទៅកាន់អឺរ៉ុប។

ជាមួយនឹងអត្រាការប្រាក់ខ្ពស់នៅក្នុងតំបន់ចាយលុយអឺរ៉ូ សេដ្ឋកិច្ចបានជាប់គាំងនៅឆ្នាំនេះនៅក្នុងត្រីមាសខែកក្កដា ដល់ខែកញ្ញា។

លោក Carsten Brzeski ប្រធានផ្នែកម៉ាក្រូសេដ្ឋកិច្ចសកលនៅធនាគារ ING បាននិយាយថា អត្រាការប្រាក់បានកើនឡើងដល់កម្រិតខ្ពស់បំផុត ៤ ភាគរយ ដោយសារទស្សនវិស័យសេដ្ឋកិច្ចចុះខ្សោយ និងអតិផរណា។ លើសពីនេះ ធនាគារកណ្តាលអឺរ៉ុបអាចនឹងបន្តរឹតបន្តឹងរហូតមកដល់ប៉ុន្មានខែខាងមុខទៀត៕