សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្នុងជំនួបសំណេះសំណាលជាមួយកម្មករកម្មការិនីកាលពីពេលកន្លងទៅនេះ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្ដាលវិជ្ជាជីវៈ បានបញ្ជាក់ថា អត្រាមានការងារធ្វើរបស់ប្រជាជន ៩៩,៥% ជាអត្រាមួយខ្ពស់បំផុតនៅកម្ពុជា។ ការលើកឡើងរបស់រដ្ឋមន្រ្តីក្រសួងការងារបែបនេះ ផ្អែកលើរបាយការណ៍របស់អង្គការអន្តរជាតិខាងការងារ (ILO) និងធនាគារពិភពលោក។
ទាក់ទិននឹងទិន្នន័យដែលផ្ដល់ឱ្យដោយអង្គការអន្តរជាតិបែបនេះ លោកបណ្ឌិត ហុង វណ្ណៈ អ្នកជំនាញនៃរាជបណ្ឌិត្យសភាកម្ពុជាបានបង្ហាញការយល់ឃើញថា វាជាទិន្នន័យដែលច្បាស់លាស់ និងគួរឱ្យទុកចិត្តបាន។
លោកបណ្ឌិតបន្តថា ប្រសិនបើទិន្នន័យនេះចេញដោយក្រសួងការងារតែឯកឯង នឹងអាចផ្ដល់ភាពមិនទុកចិត្តដល់ប្រជាជនក្នុងស្រុក ប៉ុន្តែករណីនេះគឺមានការសិក្សា និងត្រួតពិនិត្យតាមនិតិវិធីរបស់អង្គការអន្តរជាតិ ដែលមានភាពកាន់តែច្បាស់លាស់ថែមទៀត។
លោកបណ្ឌិតបានបន្តមានប្រសាសន៍រៀបរាប់ថា ៖
«ការកំណត់ភាពមានការងារធ្វើនេះគឺគេធ្វើឡើងច្រើនវិធី ដោយកំណត់ និងផ្អែកទៅលើកម្រិតប្រាក់ចំណូល និងតាំងពីរយៈពេលធ្វើការ កន្លែងធ្វើការ នៅក្នុងរយៈកាលណាមួយ។ ម្យ៉ាងទៀតការធានាទៅលើសុខមាលភាព ការទទួលបាន ប.ស.ស ការទទួលបានប្រាក់ចូលនិវត្តន៍ ប្រាក់សម្រាប់សន្តិសុខពេលបំពេញការងារជាដើម សុទ្ធតែជាសូចនាករក្នុងការវាស់វែងប្រជាជនខ្មែរនៅក្នុងវ័យពេញកម្លាំង ដែលគេកំណត់នៅក្នុងលក្ខខណ្ឌរបស់គេ»។
លោកបណ្ឌិតបន្តថា ៖
«បើគាត់មានការងារធ្វើ គាត់មានប្រាក់ចំណូលហើយ គាត់នឹងចាយវាយ ដែលប្រាក់ទាំងនោះនឹងចាក់ចូលទៅក្នុងសេដ្ឋកិច្ច។ នោះហើយជាការរួមគ្នាជួយឱ្យមានចរន្ដសេដ្ឋកិច្ចសង្គម ដូច្នេះអត្រាមានការងារធ្វើនេះជាចំណុចសំខាន់ណាស់ ដែលបង្ហាញពីចរន្ដ ឬសកម្មភាពសេដ្ឋកិច្ច គ្រាន់តែថាតិច និងច្រើនប៉ុណ្ណោះ»។
យ៉ាងណាមិញ លោកបណ្ឌិត ហុង វណ្ណៈ បានកត់សម្គាល់ថា ជាសុឆន្ទៈរបស់រាជរដ្ឋាភិបាលថ្មី អាណត្តិទី៧ នៃរដ្ឋសភា ដែលដឹកនាំដោយ សម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីនៃកម្ពុជា គឺចង់ឱ្យប្រជាជនមានការងារធ្វើកាន់តែច្រើន ហើយទទួលបានប្រាក់ខែច្រើន ហើយដើម្បីធានាទៅលើអត្រានៃការទទួលបានការងារធ្វើឱ្យកាន់តែខ្ពស់។ រឿងសំខាន់ផ្សេងទៀតដែលត្រូវមើលគឺលើវិស័យអាទិភាពនៅកម្ពុជា រួមមាន វិស័យកសិកម្ម , វិស័យឧស្សាហកម្ម និង វិស័យទេសចរណ៍ ដែលជាវិស័យចលករសំខាន់ជួយជំរុញឱ្យសេដ្ឋកិច្ចកម្ពុជាមានភាពរឹងមុំារយៈពេលវែង៕
Account
Security
Favourite Content