សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ពិតមែនថា កម្ពុជា និងជប៉ុនពេលនេះមិនទាន់មានកិច្ចព្រមព្រៀងពាណិជ្ជកម្មសេរីទ្វេភាគីជាមួយគ្នា ប៉ុន្តែថ្នាក់ដឹកនាំរបស់កម្ពុជា បាន និងកំពុងខិតខំប្រឹងប្រែងជំរុញឱ្យភាគីជប៉ុនសិក្សាលើលទ្ធភាព ដើម្បីឈានទៅសម្រេចបានកិច្ចព្រមព្រៀងពាណិជ្ជកម្មរួមគ្នាមួយ ដែលមានក្រសួងពាណិជ្ជកម្មទទួលបន្ទុក។
នៅក្រោយការស្នើសុំរបស់ក្រសួងពាណិជ្ជកម្ម ក៏មានការសាទរច្រើនពីសំណាក់ស្ថានប័នរដ្ឋ និងវិស័យឯកជន ថ្វីត្បិតថា ទីផ្សារប្រទេសជប៉ុនជាទីផ្សារល្អសម្រាប់កម្ពុជា។ ម្យ៉ាងទៀត ទំនាក់ទំនងរបស់ប្រទេសទាំងពីរក្នុងពេលកន្លងមកនេះ ក៏មិនមានអ្វីជាឧបសគ្គនោះដែរ។ មិនមានឧបសគ្គត្រង់ថា រយៈពេល៧០ឆ្នាំនៃទំនាក់ទំនងការទូតរបស់ប្រទេសទាំងពីរនេះ ប្រជាជនព្រមទាំងរដ្ឋាភិបាលនៃប្រទេសជប៉ុនតែងតែគាំទ្ររាជរដ្ឋាភិបាលកម្ពុជាក្នុងការជំរុញការអភិវឌ្ឍវិស័យពាណិជ្ជកម្មនៅកម្ពុជា ជាពិសេសកិច្ចសម្រួលពាណិជ្ជកម្ម និងការធ្វើពាណិជ្ជកម្មឌីជីថល តាមរយៈកិច្ចសហប្រតិបត្តិការទ្វេភាគីតំបន់ និងពហុភាគី។ ក្រៅពីនោះ ការធ្វើពាណិជ្ជកម្មរវាងកម្ពុជា និងជប៉ុនក៏មានការប្រសើរឡើងគួរឱ្យកត់សម្គាល់ផងដែរ តាមរយៈការអនុវត្តកិច្ចព្រមព្រៀង RCEP ផងនិងកិច្ចព្រមព្រៀងអាស៊ានជប៉ុន។
ក្នុងបរិបថនេះ លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានយល់ឃើញថា វាជារឿងដែលកាន់តែល្អមួយកម្រិតថែមទៀត ប្រសិនបើកម្ពុជា និងជប៉ុនឈានដល់ការចុះកិច្ចព្រម ព្រៀងពាណិជ្ជកម្មសេរីរវាងគ្នា។
លោកឧកញ៉ា លឹង ហេង បានមានប្រសាសន៍ថា ៖
“និយាយជារួម ការចរចាកិច្ចព្រមព្រៀងនេះគឺដើម្បីជំរុញកំណើន សេដ្ឋកិច្ចជាតិយើង ដើម្បីរក្សាលំនឹងនៃសេដ្ឋកិច្ចជាតិ ទាំងការនាំចេញ និងនាំចូល ហើយបើសិនជាកិច្ចព្រមព្រៀងនេះឈានដល់ការចរចាបានដោយជោគជ័យ គឺជារឿងសាទររបស់សភាពាណិជ្ជកម្មកម្ពុជា។”
យ៉ាងណាមិញ អ្នកជំនាញសេដ្ឋកិច្ចរូបនេះក៏បានស្នើសុំឱ្យមានការបើកជើងហោះហើរត្រង់រវាងប្រទេស ទាំងពីរឡើងវិញ ត្បិតលោកយល់ថានេះជាចំណែកមួយក្នុងការធ្វើឱ្យទំនាក់ទំនងពាណិជ្ជកម្មកម្ពុជា-ជប៉ុន កាន់តែស្គាល់ភាពល្អប្រសើរ។
លោកឧកញ៉ា លឹម ហេង បានបន្តថា ៖
“អ្វីដែលគួរកត់សម្គាល់ទៀតនោះគឺ សព្វថ្ងៃនេះជប៉ុនគួរតែជំរុញការហោះហើរត្រង់ឡើងវិញជាមួយកម្ពុជា ដែលកន្លងមកបានផ្អាកដោយសារតែជំងឺកូវីដ ដូច្នេះដើម្បីជំរុញពាណិជ្ជកម្មទ្វេភាគីឱ្យកាន់តែល្អប្រសើរ គួរតែមានការហោះហើរត្រង់ឡើងវិញ ដើម្បីឱ្យទំនាក់ទំនងផ្នែកសេដ្ឋកិច្ចរវាងប្រទេសទាំងពីរកាន់តែល្អប្រសើរ។”
ទន្ទឹមនឹងនេះ លោកក៏សង្ឃឹមថាសភាពាណិជ្ជកម្មកម្ពុជា និងសភាពាណិជ្ជកម្មជប៉ុននឹងមានកិច្ចព្រមព្រៀងជាមួយគ្នាក្នុងពេលឆាប់ៗខាងមុខនេះផងដែរ។
ស្រដៀងគ្នានេះ លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានឱ្យដឹងថា ការបង្កើតកិច្ចព្រមព្រៀងពាណិជ្ជកម្មសេរីទ្វេភាគីជាមួយជប៉ុនគឺកំពុងស្ថិតក្នុងដំណាក់កាលសិក្សានៅឡើយ ប៉ុន្តែយ៉ាងណាលោកអះអាងថាជប៉ុនជាទីផ្សារដ៏ល្អមួយក្នុងការនាំចេញទំនិញ។
លោក ប៉ែន សុវិជាតិ បានលើកឡើងថា ៖
“ជប៉ុនជាដៃគូមួយក្នុងចំណោមដៃគូកិច្ចព្រមព្រៀង RCEP ហើយយើងក៏នាំចេញទៅជប៉ុនក្នុងចំនួនធំដែរ ហើយជប៉ុនក៏នាំចូលមកកម្ពុជាច្រើនដូចគ្នា ដូច្នេះយើងចាត់ទុកថា កម្ពុជា ជប៉ុន ជាដៃគូសំខាន់មួយនៅក្នុងចំណោមទីផ្សារ RCEP។”
ដោយឡែក នៅក្នុងទំនាក់ទំនងទ្វេរភាគីរវាងកម្ពុជា និងជប៉ុនគឺធ្វើឡើងយូរណាស់មកហើយ ម្លោះហើយការណ៍ដែលក្លាយទៅជាដៃគូពាណិជ្ជកម្មសេរី ពិតណាស់ថាត្រូវការការសិក្សាមួយច្បាស់លាស់ ប៉ុន្តែបើពិនិត្យលើភាពរីកចម្រើនជាមួយគ្នាកន្លងមក អាចនិយាយបានថា កិច្ចការនេះកំពុងស្ថិតនៅលើគន្លងផ្លូវមួយដែលត្រឹមត្រូវ។ នេះបើតាមការបញ្ជាក់បន្ថែមរបស់លោក ប៉ែន សុវិជាតិ។
គួរបញ្ជាក់ថា តាមរយៈកិច្ចខិតខំប្រឹងប្រែងរបស់រាជរដ្ឋាភិបាល សេដ្ឋកិច្ចរបស់ប្រទេសកម្ពុជាមានកើនឡើងក្នុងរង្វង់ ៥% ក្នុងឆ្នាំ២០២២ ហើយត្រូវបានគេព្យាករណ៍ថា នឹងកើនឡើងដល់ប្រហែល ៦% ក្នុងឆ្នាំ២០២៣ និង ៧% នៅឆ្នាំ២០២៤ ដែលធ្វើឱ្យប្រទេសកម្ពុជា នឹងឈានទៅកាន់ “ប្រទេសដែលមានចំណូលមធ្យមកម្រិតទាប” និងប្តេជ្ញាឈានទៅ “ប្រទេសដែលមានចំណូលមធ្យមកម្រិតខ្ពស់” នៅឆ្នាំ២០៥០ ខាងមុខនេះ៕
Account
Security
Favourite Content