សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ជាការពិតណាស់ ភាពមិនច្បាស់លាស់នៃតម្លៃជីគីមីនៅលើទីផ្សារបានធ្វើឱ្យប៉ះពាល់ជាខ្លាំងដល់ដំណើរការដាំដុះរបស់កសិករជាពិសេសនៅពេលតម្លៃជីឡើងខ្ពស់ម្ដងៗ។ ភាពមិនច្បាស់លាស់នេះ ក៏ដោយសារតែជីទាំងនោះមិនបានផលិតនៅក្នុងស្រុក ដូច្នេះហើយការកំណត់តម្លៃទីផ្សារគឺមិនមែនរដ្ឋាភិបាល ឬក្រសួងពាក់ព័ន្ធអាចក្ដាប់បាននោះទេ ខណៈដែលអ្នកជំនាញជំរុញឱ្យកសិករគួរចេះផលិតជីសរីរាង្គដោយខ្លួនឯងដើម្បីកាត់បន្ថយចំណាយ និងបង្កើនគុណភាពកសិផល។
ឈរលើវិស័យកសិកម្មជាច្រើនឆ្នាំ និងមើលឃើញពីបញ្ហាប្រឈមរបស់កសិករ លោកបណ្ឌិត សួង ណយ អគ្គលេខាធិការរងចលនាភូមិមួយផលិតផលមួយនៃទីស្តីការគណៈរដ្ឋមន្ត្រី បានជំរុញជាថ្មីម្ដងទៀតដល់ប្រជាកសិករ ជាពិសេសកសិករខ្នាតធំ ដែលពឹងផ្អែកសំខាន់លើជីគីមីគួរតែងាកមករៀនពីវិធីសាស្ត្រក្នុងការផលិតជីសរីរាង្គដោយខ្លួនឯង។
លោកបណ្ឌិតបានគូសបញ្ជាក់ថា ច្បាស់ណាស់ថា វាជារឿងធម្មតានៅពេលដែលកសិករពឹងផ្អែកតែលើផលិតផលណាមួយសម្រាប់ការដាំដុះ នោះវានឹងជំរុញឱ្យតម្លៃផលិតផលមួយនោះលើទីផ្សារឡើងថ្លៃ ដែលអាចធ្វើឱ្យមានការប៉ះពាល់ដល់ថ្លៃដើមមិនខាន។
លោកបណ្ឌិត សួង ណយ លើកឡើងថា ៖
“នៅពេលកសិករប្រើប្រាស់ជីសរីរាង្គ ឬជីកំប៉ុស ទោះបីទីផ្សារជីគីមីប្រែប្រួលដល់កម្រិតណា ក៏ពួកគាត់ដែលកសិករមិនមានការព្រួយបារម្ភនោះទេ លើសពីនេះទៀត ពួកគាត់មានតែទទួលបានដំណាំដែលមានគុណភាពល្អ ហូបទៅមិនប៉ះពាល់ដល់សុខភាព។ ដោយឡែក នៅក្នុងសហគមន៍កសិកម្មដូងក្រអូបកម្ពុជា ខ្ញុំតម្រូវឱ្យកសិករជាសមាជិក ប្រើប្រាស់តែជីសរីរាង្គដែលផលិតបានដោយខ្លួនឯង ពោលគឺហាមដាច់ខាតចំពោះការប្រើប្រាស់ជីគីមី។”
លោកបណ្ឌិតបញ្ជាក់ថា ការហាមប្រាមនេះ ក៏ដោយសារតែលោកបណ្ឌិតចង់រក្សាគុណភាពដូងក្រអូបឱ្យគង់វង្ស និងមិនប៉ះពាល់ដល់សុខភាពអ្នកបរិភោគ។ ម្យ៉ាងទៀត ត្រូវធ្វើឱ្យស្របតាមស្តង់ដារសម្រាប់នាំចូលផ្សារទំនើបផងដែរ។ យ៉ាងណាមិញ សម្រាប់បច្ចេកទេសក្នុងការផលិតជីសរីរាង្គ លោកបណ្ឌិត សួង ណយ តែងតែបង្ហាត់បង្រៀនទៅដល់កសិករ ហើយណែនាំឱ្យពួកគេធ្វើបានជាប់លាប់ដើម្បីកាត់បន្ថយថ្លៃដើមផលិត។
គួរបញ្ជាក់ថា កាលពីឆ្នាំ២០២២ កន្លងទៅ តម្លៃជីគីមីនាំចូលបានកើនឡើងចន្លោះពី ២០០% ទៅ ៣០០% ជាតម្លៃមួយដែលថ្លៃខ្លាំងខុសពីធម្មតា ពោលគឺ ១តោន ថ្លៃឡើងដល់ ១ ០០០ដុល្លារ ដោយសារតែសភាពការណ៍មិនទាន់ធូរស្បើយនៃជំងឺកូវីដផង បូករួមនឹងការផ្ទុះឡើងនូវសង្គ្រាមរវាងរុស្ស៊ី និងអ៊ុយក្រែនផង។
ដោយឡែកថ្មីៗនេះ ក្រសួងកសិកម្មបានជូនដំណឹងពីការបន្តធ្លាក់ថ្លៃបន្តិចវិញនៃជីកសិកម្ម ប៉ុន្តែទោះជាយ៉ាងនេះក្ដី អ្នកជំនាញក៏នៅតែលើកទឹកចិត្តឱ្យកសិករគ្រប់គ្រងទីផ្សារជី តាមរយៈការផលិតជីសរីរាង្គដោយខ្លួនឯង៕
Account
Security
Favourite Content