សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្នុងរយៈពេល៦ខែ ឆ្នាំ២០២៤ កម្ពុជាបាននាំចេញមៀនស្រស់ទៅកាន់ទីផ្សារអន្តរជាតិបានចំនួន ១៤ ៨១៧ តោន ធៀបនឹងរយៈពេលដូចគ្នាឆ្នាំ២០២៣ ដែលមានជាង៦៧២៥ តោន កើនឡើង ១២០.៣៣% ។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។
ជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១០ ខែកក្កដា ឆ្នាំ២០២៤នេះ បានឱ្យដឹងថា ៖ ទីផ្សារដែលបានស្រូបយកការនាំចេញផ្លែមៀនស្រស់របស់កម្ពុជាច្រើនជាងគេគឺទីផ្សារប្រទេសចិន បន្ទាប់ពីទីផ្សារមួយនេះបានអនុញ្ញាតឱ្យកម្ពុជានាំចេញមៀនស្រស់ទៅដោយផ្ទាល់កាលពីចុងឆ្នាំ២០២២។
អ្នកនាំពាក្យរូបនេះបានលើកឡើងថា ៖
«ចាប់តាំងពីយើងចរចាបើកទីផ្សារ កម្ពុជាបានសម្រេចការនាំចេញដំបូងនៅចុងឆ្នាំ២០២២ ។ ផ្លែមៀនស្រស់របស់កម្ពុជាត្រូវមាត់ប្រជាជនចិន ហើយការកុម្ម៉ង់បានកើនឡើងជាបន្តបន្ទាប់ពីមួយឆ្នាំទៅមួយឆ្នាំ តាមរយៈកិច្ចខិតខំប្រឹងប្រែងរបស់ក្រសួងកសិកម្ម ដែលធ្វើការជាមួយកសិករ ដើម្បីដាំដុះមៀនដែលស្របតាមស្តង់ដារបច្ចេកទេស និងតម្រូវការរបស់ទីផ្សារប្រទេសចិន ។ នេះជារឿងមួយដែលធានានូវស្ថិរភាពនៃការផ្គត់ផ្គង់មៀនស្រស់ទៅកាន់ទីផ្សារប្រទេសចិន។ ប្រជាកសិករដែលដាំដុះមៀនស្រស់ ដោយអនុលោមទៅតាមស្តង់ដាររបស់អាជ្ញាធរគយចិននេះ គឺពួកគាត់លក់ចេញបាននៅក្នុងតម្លៃខ្ពស់ បើធៀបនឹងកសិករដែលគាត់ដាំដុះតាមលក្ខណៈប្រពៃណី»។
ជំទាវ អ៊ឹម រចនា បានឱ្យដឹងទៀតថា ៖ កំណើននៃការនាំចេញមៀនស្រស់ទៅកាន់ប្រទេសចិនដូចដែលបានលើកឡើងខាងលើនេះ គឺដោយសារក្រសួងកសិកម្ម និងក្រសួងពាក់ព័ន្ធ ព្រមទាំងកសិករផងដែរ បានចាប់ដៃគ្នាផលិត ចំណែកក្រសួងពាណិជ្ជកម្មដើរតួនាទីយ៉ាងសំខាន់ក្នុងការជំរុញឲ្យផលិតផលកម្ពុជាលេចមុខលេចមាត់បានទូលំទូលាយនៅប្រទេសចិន ដោយក្រសួងពាណិជ្ជកម្មកម្ពុជាបានចុះ MoU ជាមួយនឹងក្រុមហ៊ុនអាលីបាបា ដែលជា Platform ទីផ្សារអនឡាញមានអតិថិជនរាប់លាននាក់នៅប្រទេសចិន និងនៅលើពិភពលោក ។ តាមរយៈអាលីបាបា មៀនខ្មែរមិនត្រឹមតែទៅដល់អ្នកដែលបញ្ជាទិញផ្ទាល់នោះទេ អតិថិជនជាប្រជាជនក៏អាចកុម្ម៉ង់ក្នុងទូរស័ព្ទដៃជាការស្រេចហើយមានការដឹកជញ្ជូនដល់គេហដ្ឋានរបស់ពួកគេ។
សូមជម្រាបថា កម្ពុជាបានចាប់ផ្តើមនាំចេញផ្លែមៀនប៉ៃលិនស្រស់ទៅទីផ្សារប្រទេសចិនជាលើកដំបូងកាលពីខែតុលា ឆ្នាំ២០២២ បន្ទាប់ពីការចរចាលក្ខខណ្ឌតម្រូវភូតគាមអនាម័យ និងបានដាក់លក់ជាផ្លូវការនៅលើទីផ្សារអនឡាញរបស់ Alibaba Group កាលពីថ្ងៃពី១២ ខែធ្នូ ឆ្នាំ២០២២ ដែលធ្វើឱ្យអតិថិជនដែលជាជនជាតិចិនកាន់តែច្រើនស្គាល់ពីផលិតផលកសិកម្មកម្ពុជា ព្រោះចិនជាទីផ្សារធំដែលមានប្រជាជនជាង ១៤០០លាននាក់។
ការនាំចេញផ្លែមៀនស្រស់កម្ពុជាទៅកាន់ទីផ្សារប្រទេសចិនជាផ្លូវការគឺជាសមិទ្ធផលថ្មីមួយទៀតដែលកើតចេញពីកិច្ចខិតខំប្រឹងប្រែងរបស់គ្រប់ភាគីពាក់ព័ន្ធ ដើម្បីបើកទីផ្សារថ្មីប្រកបដោយសក្តានុពលសម្រាប់កសិផលកម្ពុជា សំដៅចូលរួមលើកបង្កើនប្រាក់ចំណូល និងជីវភាពបងប្អូនដែលជាអ្នកដាំមៀន ជំរុញការអភិវឌ្ឍវិស័យកសិកម្ម។
ដំណាំមៀន គឺជាប្រភេទដំណាំកសិ-ឧស្សាហកម្មមួយក្នុងចំណោមដំណាំកសិ-ឧស្សាហកម្មផ្សេងទៀត ដែលមានសក្តានុពលសម្រាប់ធ្វើការនាំចេញទៅកាន់ទីផ្សារអន្តរជាតិ ជាពិសេសប្រទេសចិនជាលក្ខណៈស្រស់ និងក្រៀម។
ផ្លែមៀនស្រស់កម្ពុជាគឺជាផ្លែឈើស្រស់ទី៣បន្ទាប់ពីផ្លែចេកស្រស់ និងផ្លែស្វាយស្រស់ ដែលអាចនាំចេញទៅប្រទេសចិនដោយផ្ទាល់។ បច្ចុប្បន្នទីផ្សារធំរបស់ប្រទេសកម្ពុជា ក្នុងការនាំចេញផ្លែមៀនស្រស់រួមមាន ប្រទេសចិន និងប្រទេសថៃ ដោយការនាំចេញផ្លែមៀនស្រស់មានបរិមាណប្រមាណ ១៥ ០០០ ទៅ ២០ ០០០តោនក្នុង១ឆ្នាំ ហើយសង្ឃឹមថា កំណើននេះនឹងបន្ដកើនឡើងនៅឆ្នាំបន្តបន្ទាប់ទៀត៕
Account
Security
Favourite Content