ភ្នំពេញ ៖ មន្ត្រីជាន់ខ្ពស់នៃក្រសួងកសិកម្ម រុក្ខាប្រមាញ់ និងនេសាទបានប្រាប់ឱ្យដឹងថា ក្រសួងបានត្រៀមលក្ខណៈរួចហើយក្នុងការផ្តល់គ្រាប់ពូជស្រូវ និងពូជ​ដំណាំមួយចំនួនទៀតដល់ប្រជាកសិករនៅខេត្តមួយចំនួន ដែលបានទទួលរងគ្រោះដោយសារទឹកជំនន់ ហើយការកំណត់បរិមាណចំនួនគ្រាប់ពូជ ក៏ត្រូវរង់ចាំដល់ទឹកស្រក និងការវាយតម្លៃផលប៉ះពាល់ជាមុនផងដែរ។

ជំទាវ អ៊ឹម រចនា អ្នកនាំពាក្យក្រសួងកសិកម្ម បានប្រាប់ឱ្យដឹងថា រាជរដ្ឋាភិបាលកម្ពុជាមានប្រព័ន្ធស្បៀងបម្រុងសម្រាប់ផ្តល់ជូនដល់ប្រជាកសិករ ប៉ុន្តែការផ្តល់ជូននៅក្នុងកម្រិតណាមួយនោះ ត្រូវរង់ចាំការវាយតម្លៃឱ្យបានច្បាស់លាស់ជាមុន ខណៈដែលទឹកមិនទាន់បានស្រកអស់នៅឡើយទេ។

ជំទាវ អ៊ឹម រចនា បានបញ្ជាក់ថា ៖

«ការផ្តល់ជូននេះទៀតសោត យើងមានប្រព័ន្ធស្បៀងបម្រុងរបស់យើង គឺមានពូជស្រូវ និងពូជដំណាំបន្លែមួយចំនួន ដែលយើងអាចផ្តល់ជូនប្រជាកសិករ ទៅតាមការវាយតម្លៃជាក់ស្តែងក្រោយពេលដែលទឹកស្រក។ គិតត្រឹមថ្ងៃទី១ ខែតុលា ឆ្នាំ២០២៣ ជំនន់ទឹកភ្លៀង និងទឹកទន្លេ ដែលបានហក់ឡើងនៅអំឡុងចុងខែកញ្ញាកន្លងទៅ បានចាប់ផ្តើមស្រកវិញជាបណ្តើរៗហើយ ប៉ុន្តែការវាយតម្លៃផលប៉ះពាល់មិនទាន់អាចធ្វើបាននៅឡើយទេ ដរាបណាទឹកមិនទាន់ស្រកអស់»។

ជំទាវ អ៊ឹម រចនា បានបញ្ជាក់ថា ៖

«ក្រសួងកសិកម្ម និងមន្រ្តីនៅតាមមន្ទីរ ក្នុងខេត្តដែលរងផលប៉ះពាល់ដោយ​សារ​ទឹកជំនន់ទាំងអស់ នឹងបន្តតាមដានបន្តទៀត និងរងចាំរហូតដល់ទឹកស្រកទៅអស់ទើបយើងអាចវាយតម្លៃការខូចខាតបាន។ បន្ទាប់ពីវាយតម្លៃការខូចខាតជាក់ស្តែងហើយ យើងកំណត់ពីវិសាលភាពនៃវិធានការឆ្លើយតប និងការអន្តរាគមន៍ណាមួយនៅក្នុងករណីចាំបាច់»។

បើតាមរបាយការណ៍របស់អាជ្ញាធរខេត្តបាត់ដំបង គិតត្រឹមថ្ងៃទី២ ខែតុលា ឆ្នាំ២០២៣ ដំណាំកសិកម្មជិត ៥ ០០០ ហិកតា របស់ប្រជាកសិករនៅខេត្តបាត់ដំបង បានរងនូវផលប៉ះពាល់ពីគ្រោះទឹកជំនន់ ក្នុងរយៈពេល២ថ្ងៃកន្លងមកនេះ ខណៈស្រុកឯកភ្នំ គឺជាស្រុកមួយក្នុងចំណោមស្រុក ក្រុង ចំនួន៩ ដែលកើតមានជំនន់ទឹកភ្លៀង បានទទួលរងនូវផលប៉ះពាល់ខ្លាំងជាងគេ មានរហូតដល់ ជាង ២ ៥០០ហិកតា ។

បើតាមអ្នកនាំពាក្យនៃគណៈកម្មាធិការជាតិគ្រប់គ្រងគ្រោះមហន្តរាយ លោក សុទ្ធ គឹមកុលមុន្នី គិតត្រឹមថ្ងៃទី២ ខែតុលា ឆ្នាំ២០២៣ ជំនន់ទឹកភ្លៀងបានធ្វើឱ្យខេត្តចំនួន៩ រងផលប៉ះពាល់ រួមមាន៖ ខេត្តព្រះវិហារ កំពង់ធំ ក្រចេះ ត្បូងឃ្មុំ កោះកុង ព្រះសីហនុ ប៉ៃលិន បាត់ដំបង និងខេត្តពោធិ៍សាត់។

ឯកឧត្តម បណ្ឌិត យ៉ង សាំងកុមារ រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាលពីថ្មីៗនេះបានគូសបញ្ជាក់ថា ឯកឧត្តម និងប្រធាននាយកដ្ឋានដំណាំស្រូវនៃអគ្គនាយកដ្ឋានកសិ​កម្ម បានទៅធ្វើការត្រួតពិនិត្យលើការប្រមូលផល ការសម្ងួត និងការស្តុកគ្រាប់ស្រូវពូជ ដែលត្រៀម​ទុកជាពូជបម្រុងនៅស្ថានីយផលិតពូជស្រូវព្រៃផ្តៅ ដើម្បីត្រៀមទុកជួយដល់ប្រជាពលរដ្ឋរងគ្រោះដោយ​សារគ្រោះធម្មជាតិក្នុងការស្តារផលិតកម្មស្រូវ។

ឯកឧត្តម បណ្ឌិត យ៉ង សាំងកុមារ បានបញ្ជាក់ថា ៖

«នៅទូទាំងប្រទេសយើង មានស្ថានីយផលិតគ្រាប់ពូជស្រូវចំនួន៦ កន្លែង និងមានការសហការបន្ថែម ជាមួយសហគមន៍កសិករអ្នកផលិតគ្រាប់ពូជស្រូវ នៅច្រើនកន្លែងថែមទៀតដែលជាផ្នែកសំខាន់មួយនៃប្រព័ន្ធស្បៀងបម្រុងរបស់រាជរដ្ឋា​ភិបាលកម្ពុជា»។

រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទបណ្ឌិត យ៉ង សាំងកុមារ ក៏បានឱ្យដឹងដែរថា ក្រសួងបានដាក់ពង្រាយនិស្សិតនិងយុវជនស្ម័គ្រចិត្ត ២០០ នាក់ នៅឃុំចំនួន ២០០ ជាឃុំដែលសម្បូរផលិតកម្មស្រូវ ដើម្បីចូលរួមការងារកសាងប្រព័ន្ធពូជសុទ្ធនិងលើកស្ទួយប្រសិទ្ធភាពសេដ្ឋកិច្ចនៃផលិតកម្មស្រូវរបស់គ្រួសារកសិករ។

បណ្ឌិត យ៉ងសាំង កុមារ បានបញ្ជាក់ថា ការពង្រាយមន្រ្តីកសិកម្មឱ្យបានគ្រប់ឃុំនៅទូទាំងប្រទេស គឺជាកិច្ចការសំខាន់បំផុតសម្រាប់គ្រួសារកសិករ និងវិស័យកសិកម្មជាតិទាំងមូល។សម្រាប់មន្រ្តីកសិកម្មនៅតាមឃុំ ក្រសួងនឹងរៀបចំទៅតាមជំនាញរបស់ពួកគេ ដោយអ្នកជំនាញស្រូវដាក់ទៅតំបន់ស្រូវ និងអ្នកជំនាញដំណាំដាក់ទៅតំបន់ដំណាំ តែឥឡូវយើងចាប់ផ្តើមដំបូង ដាក់ជំនាញស្រូវសិន។

សូមបញ្ជាក់ថា គោលនយោបាយដាក់ពង្រាយមន្រ្តីឃុំ ចំនួន១៦០០ នាក់នៅតាមឃុំដែលមានសកម្មភាពកសិកម្មនៅទូទាំង២៥រាជធានី-ខេត្ត ជាគោលនយោបាយអាទិភាពមួយក្នុងចំណោមគោលនយោបាយអាទិភាពចំនួន៦ របស់រាជរដ្ឋាភិបាល កម្ពុជាអាណត្តិទី៧ នេះ។ គោលនយោបាយនេះ ត្រូវបានលោក ហ៊ុន ម៉ាណែត នាយករដ្ឋមន្រ្តីនៃកម្ពុជា អះអាងថា នឹងជួយរក្សាតម្លៃកសិផលរបស់ប្រជាកសិករកម្ពុជា និងផ្តល់អត្ថប្រយោជន៍ជាច្រើនទៀតដល់កសិករក៏ដូចជាលើកកម្ពស់វិស័យកសិកម្មកម្ពុជាទាំងមូលផងដែរ៕