បរទេស៖ យោងតាមប្រភពព័ត៌មានពី Euro News បានរាយការណ៍ថា សេដ្ឋកិច្ចរបស់ប្រទេសបារាំងក្នុងត្រីមាសទី ៣ ត្រូវបានជំរុញដោយព្រឹត្តិការណ៍កីឡាអូឡាំពិក ទោះបីជាមានភាពមិនច្បាស់លាស់ខាងនយោបាយក៏ដោយ។

លោក Olivia Grégoire រដ្ឋមន្ត្រីក្រសួងទេសចរណ៍បារាំងបានលើកឡើងថា កំណើនសេដ្ឋកិច្ចបារាំងទទួលបានពីការជំរុញនៃរំហូរអ្នកមកចូលរួមទស្សនា និងការកើនឡើងនៃការចំណាយក្នុងវិស័យសេវាកម្ម ដូចជា សណ្ឋាគារ ភោជនីយដ្ឋាន និងសារមន្ទីរ។ មិនត្រឹមតែប៉ុណ្ណោះ ការចំណាយលើសណ្ឋាគារក្នុងទីក្រុងនានាដែលរៀបចំព្រឹត្តិការណ៍អូឡាំពិកបានកើនឡើង ១៦ ភាគរយបើធៀបនឹងឆ្នាំមុន ខណៈដែលការលក់សេវាកម្មក្នុងវិស័យទេសចរណ៍បានកើនឡើង ២៥ ភាគរយ បើធៀបនឹងរយៈពេលដូចគ្នាកាលពីឆ្នាំមុន។

ទន្ទឹមនឹងនេះ ការស្ទាបស្ទង់មតិតាមស្ថាប័នជាច្រើនបានបង្ហាញថា ព្រឹត្តិការណ៍កីឡាអូឡាំពិកបានជំរុញសេដ្ឋកិច្ចបារាំងយ៉ាងខ្លាំងនៅក្នុងត្រីមាសទី៣ ដែលបានយកឈ្នះលើភាពមិនប្រាកដប្រជាផ្នែកនយោបាយដែលបានកើតឡើងកាលពីចុងខែមិថុនា។ ធនាគារកណ្តាលបារាំង Banque de France រំពឹងថា កំណើនសេដ្ឋកិច្ចបារាំងនឹងកើនឡើងចន្លោះពី ០,៣៥ ភាគរយទៅ ០,៤៥ ភាគរយសម្រាប់ត្រីមាសទី ៣ ដោយក្នុងនោះ ០,២៥ ភាគរយអាចនឹងត្រូវបានជំរុញដោយកីឡាអូឡាំពិក ដែលភាគច្រើនបានមកពីការលក់សំបុត្រ និងសិទ្ធិទូរទស្សន៍។ យោងតាមប្រភពដដែល បានបង្ហាញថា ក្នុងអំឡុងពេលសប្តាហ៍ដំបូងនៃព្រឹត្តិការណ៍អូឡាំពិក ការចំណាយរបស់អ្នកប្រើប្រាស់បានកើនឡើងជាង ២០ ភាគរយបើធៀបនឹងឆ្នាំមុន។  ទិន្នន័យសេដ្ឋកិច្ចថ្មីៗបានបង្ហាញថា បារាំងមានការរឹកចម្រើននៅក្នុងវិស័យសំខាន់ៗ ដោយសារអត្រាគ្មានការងារធ្វើក្នុងត្រីមាសទីពីរមានតួរលេខ ៧,៣ ភាគរយដែលធ្លាក់ចុះពី ៧,៥ ភាគរយត្រីមាសទីមួយ។ ទន្ទឹមនឹងនេះ អតិផរណាមានអត្រា ២,៣ ភាគរយនៅក្នុងខែកក្កដា ដែលល្អបន្តិចពីការព្យាករណ៍ ២,៤ ភាគរយ។

ស្របពេលដែលការរីកចម្រើនទាំងនេះត្រូវបានគេមើលឃើញថា ជាសញ្ញាវិជ្ជមានសម្រាប់សេដ្ឋកិច្ចបារាំង ប៉ុន្តៃប្រទេសនេះកំពុងប្រឈមនឹងភាពមិនច្បាស់លាស់ខាងនយោយ ដែលធ្វើឲ្យទីផ្សារភាគហ៊ុនរបស់បារាំងធ្លាក់ចុះ។ សន្ទស្សន៍ភាគហ៊ុន CAC 40 បានធ្លាក់ចុះជិត ១០ ភាគរយ ខណៈដែលសន្ទស្សន៍ភាគហ៊ុន Euro Stoxx 600 បានធ្លាក់ចុះ ៥ ភាគរយក្នុងរយៈពេលដូចគ្នានេះ។ មិនត្រឹមតែប៉ុណ្ណោះ វិស័យធនាគាររបស់បារាំងបានរងនូវផលប៉ះពាល់យ៉ាងខ្លាំងផងដែរ ដោយសារមានក្តីបារម្ភអំពីការផ្លាស់ប្តូរនយោបាយ និងផលប៉ះពាល់ទៅលើហិរញ្ញវត្ថុសាធារណៈ។ ទន្ទឹមនឹងនេះ ស្តុកទំនិញរបស់ប្រេនល្បីៗឈ្មោះរបស់បារាំងក៏ជួបការលំបាកផងដែរ ដោយសារតែការធ្លាក់ចុះនៃសេដ្ឋកិច្ចពិភពលោកធ្វើឱ្យការចំណាយរបស់អ្នកប្រើប្រាស់មានការថយចុះ។

ទោះជាយ៉ាងណាក៏ដោយ កីឡាអូឡាំពិកបានជំរុញការកើនឡើងនៃការចំណាយរបស់អ្នកប្រើប្រាស់ និងការកើនឡើងនៃសេដ្ឋកិច្ច​ ដែលអាចមានឥទ្ធិពលលើប្រាក់ចំណូលរបស់ក្រុមហ៊ុននានានៅក្នុងត្រីមាសទីបី។ ប្រេនល្បីៗឈ្មោះដែលអាចទទួលបានអត្ថប្រយោជន៍ពីកីឡាអូឡាំពិករួមមាន LVMH, Hermès និង Kering រួមជាមួយនឹងក្រុមហ៊ុនអាកាសចរណ៍ដូចជា Air Liquide និង Air France ផងដែរ។ បន្ថែមពីនេះ គេរំពឹងថា កីឡាអូឡាំពិកយ៉ាងហោចណាស់អាចទប់ទល់នឹងការធ្លាក់ចុះនៃទំនុកចិត្តអាជីវកម្មជាបណ្ដោះអាសន្ន ដោយសារព្រឹត្តិការណ៍កីឡាដ៏ធំបំផុតរបស់ពិភពលោកមួយនេះធ្វើឲ្យមនុស្សមិនសូវចាប់អារម្មណ័លើភាពចលាចលនៃនយោបាយបារាំង៕