សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្រចេះ ៖ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ បានស្នើដល់អាជ្ញាធរមានសមត្ថកិច្ចជំនាញខេត្តក្រចេះ ចូលរួមការពារអភិរក្សសត្វផ្សោត សត្វព្រៃ ក្ដាន់ ត្មាត ជីវៈចម្រុះ និងធនធានធម្មជាតិតាមដងទន្លេមេគង្គ ដើម្បីជាប្រភពចំណូលសម្រាប់ប្រជាពលរដ្ឋនៅមូលដ្ឋាន តាមរយៈទេសចរណ៍ និងការនាំចេញនៅនឹងកន្លែង។
ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មានក៏បានស្នើឱ្យអាជ្ញាធរ និងសមត្ថកិច្ចការពារ និងអភិរក្សធនធានធម្មជាតិ នៅខេត្តក្រចេះ ក្នុងឱកាសដែលឯកឧត្តមចុះមូលដ្ឋានខេត្តក្រចេះ អញ្ជើញជាអធិបតី បិទសន្និបាតបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារឆ្នាំ២០២៤ របស់រដ្ឋបាលខេត្តក្រចេះ នៅរសៀលថ្ងៃទី២៧ ខែធ្នូ ឆ្នាំ២០២៣ នាសាលមហោស្រពខេត្តក្រចេះ។
ឯកឧត្តម រដ្ឋមន្រ្តីក្រសួងព័ត៌មាន បានមានប្រសាសន៍បន្តថា ធម្មជាតិ និងការអភិរក្សជីវៈចម្រុះ ជាផលិតផលទេសចរណ៍ចូលរួមធ្វើឱ្យកម្ពុជាក្លាយជាតំបន់ដ៏ទាក់ទាញឈានមុខគេក្នុងការអភិវឌ្ឍវិស័យអេកូទេសចរណ៍ សហគមន៍អេកូទេសចរណ៍ ដើម្បីជាប្រយោជន៍សម្រាប់ការទ្រទ្រង់ដល់កិច្ចអភិវឌ្ឍសេដ្ឋកិច្ចមូលដ្ឋាន លើកកម្ពស់ជីវភាពប្រជាពលរដ្ឋមូលដ្ឋានប្រកបដោយនិរន្តរភាព។
ឯកឧត្តម នេត្រ ភក្ត្រា បានគូសបញ្ជាក់ថា ៖
«ការចូលរួមការពារអភិរក្សធនធានទាំងនេះ ដើម្បីជាប្រភពចំណូលបង្កើតការងារធ្វើសម្រាប់ប្រជាពលរដ្ឋក្នុងមូលដ្ឋាន និងតាមរយៈទេសចរណ៍មកលេងកំសាន្តក្នុងមួយឆ្នាំៗ ដែលជាភាពរស់រវើកនៃសេដ្ឋកិច្ច។ ទាំងនេះ ជាការជំរុញលើកទឹកចិត្តឱ្យសហគមន៍មូលដ្ឋានចូលរួមឱ្យបានសកម្មលើការអភិវឌ្ឍទេសចរណ៍នៅនឹងកន្លែង ដើម្បីទាក់ទាញភ្ញៀវទេសចរក្នុងស្រុក និងក្រៅប្រទេសឱ្យមកកំសាន្ត ក្នុងខេត្តក្រចេះ កាន់តែច្រើនឡើង សំដៅបង្កើនប្រាក់ចំណូលគ្រួសារ និងការកាត់បន្ថយភាពក្រីក្រ»។
ឯកឧត្តម នេត្រ ភក្ត្រា ក៏បានលើកឡើងថា រដ្ឋបាលខេត្ត ក្រុង ស្រុក ត្រូវខិតខំសហការសម្របសម្រួល និងគាំទ្រដល់ការរៀបចំរមណីយដ្ឋាន ទីតាំងទេសចរណ៍ និងរៀបចំក្រុង ស្រុកឱ្យមានសោភ័ណភាព មានភាពទាក់ទាញ បរិស្ថានអនាម័យស្អាត មានសណ្តាប់ធ្នាប់ ការប្រាស្រ័យទាក់ទងល្អរួសរាយរាក់ទាក់ បង្កើតផលិតផលទេសចរណ៍ថ្មីៗបន្ថែមក្នុងមូលដ្ឋាន។ ដោយឡែកសម្រាប់សត្វផ្សោត ជាសត្វកម្រ សម្រាប់ឆ្នាំ២០២៣នេះ ដែលគិតរហូតមកដល់ដើមខែធ្នូ សត្វផ្សោតដែលបាត់បង់ជីវិតទាំងខេត្តក្រចេះ និងស្ទឹងត្រែង មានចំនួន ៥ក្បាលប៉ុណ្ណោះ និងក្នុងនេះបានកើតចំនួន ៨ក្បាល។ បើប្រៀបធៀបក្នុងឆ្នាំ២០២២ សត្វផ្សោតបានស្លាប់ចំនួន រហូតដល់ ១១ក្បាល។ ហេតុនេះឃើញថា ការអភិរក្សរបស់យើងមានភាពល្អប្រសើរឡើង។
លោក ម៉ុក ពន្លក នាយខណ្ឌរដ្ឋបាលជលផល នៃមន្ទីរកសិកម្មរុក្ខាប្រមាញ់ និង នេសាទ ខេត្តក្រចេះ បានឱ្យដឹងថា រមណីយដ្ឋានអន្លង់ផ្សោតកាំពី ត្រូវបានបង្កើតឡើងនៅចុងឆ្នាំ១៩៩៩ ហើយសត្វផ្សោតនៅកាំពីមានចំនួនចន្លោះប្រមាណពី ៣៥ ដល់ ៤០ក្បាល។ សត្វផ្សោត បានធ្វើការទាក់ទាញលើវិស័យទេសចរណ៍ដ៏ខ្លាំងក្លាដូចជា នៅកាំពីនេះ មានភ្ញៀវទេសចរជាតិ និងអន្តរជាតិច្រើនបានចូលកម្សាន្ត ធ្វើឱ្យពលរដ្ឋនៅតំបន់នេះ ក៏ទទួលបាននូវចំណូលតាមរយៈវិស័យទេសចរណ៍ នាំឱ្យជីវភាពប្រសើរឡើង។
សូមជម្រាបដែរថា នៅក្នុងខេត្តក្រចេះមានរមណីយដ្ឋានអេកូទេសចរណ៍ធម្មជាតិ និងសហគមន៍ទេសចរណ៍ ជាច្រើនកន្លែង រួមមានសហគមន៍ទេសចរណ៍កោះសាមសិប ព្រះវិហារធំសសរ ១០០ រមណីយដ្ឋានទឹកជួរកាំពី រមណីយដ្ឋានអន្លង់ផ្សោត រមណីយដ្ឋានភ្នំសំបុក សហគមន៍កោះទ្រង់ រកាកណ្ដាល រមណីយដ្ឋានភ្នំសុពណ៌កាឡី និងរមណីយដ្ឋានឆ្នេរខ្សាច់សុពណ៍គិរីជាដើម ដើម្បីទទួលស្វាគមន៍ភ្ញៀវទេសចរជាតិ និងអន្តរជាតិដែលចង់មក លេងកម្សាន្ត៕
Account
Security
Favourite Content