ភ្នំពេញ ៖​ ឆ្នាំ២០២៣ អគ្គនាយកដ្ឋានគយ និងរដ្ឋាករកម្ពុជា (អ.គ.រ) ប្រមូលចំណូលពន្ធជូនរដ្ឋបានចំនួន ៩ ២៦​៧,៤៨ ប៊ីលានរៀល (ស្មើនឹងប្រមាណ ២ ២៨៨.២៧ លានដុល្លារ)។ ចំណូលនេះ ស្មើនឹង ៨២,៤ភាគរយ នៃផែន​ការកំណត់ដោយច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។

ឯកឧត្តម  គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានលើកឡើងទិន្នន័យនេះនៅក្នុងកិច្ចប្រជុំបូកសរុបការងារប្រចាំឆ្នាំ២០២៣ និងទិសដៅអនុវត្តបន្តឆ្នាំ២០២៤ កាលពីថ្ងៃចុងសប្ដាហ៍កន្លងទៅ ដោយទិន្នន័យនេះមានទំហំពាណិជ្ជកម្មនាំចូលចំនួន ២៤ ១៨៣ លានដុល្លារ ថយចុះប្រមាណ ៥ ភាគរយ ធៀបនឹងឆ្នាំ២០២២ ដែលក្នុងនោះទំនិញនាំចូលសំខាន់ៗមាននូវផលិតផលតេលសិលា វត្ថុធាតុដើម និងគ្រឿងម៉ាស៊ីនបម្រើដល់គម្រោងវិនិយោគគ្រឿងសំណង់ យានយន្ត និងគ្រឿងចក្រ គ្រឿងឧបភោគបរិភោគ និងទំនិញចម្រុះផ្សេងទៀត។

ដោយឡែក ទំហំពាណិជ្ជកម្មនាំចេញមានចំនួន ២២ ៨៥៨ លានដុល្លារ កើនឡើង១,៨ភាគរយ ធៀបនឹងឆ្នាំ២០២២។ ក្នុងនោះ ផលិតផលវិនិយោគកាត់ដេរមានការថយចុះ ១៣,១ភាគរយ ផលិតផលវិនិយោគមិនមែនកាត់ដេរ (ដូចជា គ្រឿងបំណែកអេឡិចត្រូនិក បង្គុំខ្សែភ្លើង ផលិតផលពីឈើ កង់ អំពូល ស្បែកសត្វកែច្នៃ សំបកកង់រថយន្ត ផលិតផលប្លាស្ទិក គ្រឿងបន្លាស់រថយន្ត និងផលិតផលឧស្សាហកម្មផ្សេងៗទៀត) មានកំណើន ២០ភាគរយ និងកសិផលមានកំណើន ២៤,៣ភាគរយ។

ក្នុងចំណូល ២ ២៨៨ លានដុល្លារ  ដែលអគ្គនាយកដ្ឋានគយប្រមូលបានក្នុងឆ្នាំ២០២៣ គឺមានអាករលើតម្លៃបន្ថែម៤១,២ភាគរយ អាករពិសេសមាន ៣០,៣ភាគរយ ពន្ធគយមាន ២១ភាគរយ អាករបន្ថែមលើផលិតផលប្រេងឥន្ធនៈមាន ៤,៣ភាគរយ និងអាករនាំចេញ និងកម្រៃផ្សេងៗមាន ១,៨ភាគរយ។ ចំពោះចំណូលតាមក្រុមទំនិញ ឃើញថា ក្រុមទំនិញចម្រុះមានមាន ៣៥,៣​ភាគរយនៃចំណូលសរុប យានយន្ត និងគ្រឿងចក្រមាន ៣១,១ភាគរយ  ប្រេងឥន្ធនៈ និងថាមពលមាន ២៦,៦ភាគរយ និងសម្ភារសំណង់និងកម្រៃផ្សេងៗមាន ៧ភាគរយ។

លទ្ធផលខាងលើនេះត្រូវបានឯកឧត្តម  គុណ ញឹម លើកឡើងថា ទិន្នន័យនេះមិនបានសម្រេចតាមផែនការពេញលេញនោះទេ ហើយការមិនសម្រេចនូវការប្រមូលចំណូលមិនសម្រេចតាមផែនការនេះបណ្ដាលមកពីកត្តាប្រ​ឈមធំៗមួយចំនួន ជាពិសេសការធ្លាក់ចុះទីផ្សារមុខទំនិញយានយន្ត ដែលកន្លងមក ជាប្រភពចំណូលសំខាន់របស់អគ្គនាយកដ្ឋានគយ និងរដ្ឋាករកម្ពុជា។ 

ឯកឧត្តម បានបន្តថា ភាពស៊ីជម្រៅនៃការអនុវត្តកិច្ចព្រមព្រៀងពាណិជ្ជកម្មសេរី ការរីកលូតលាស់នៃផលិតកម្មក្នុងស្រុកជំនួសការនាំចូល និងការបន្តកើតមាននូវសកម្មភាពរត់គេចពន្ធ ដែលកាន់តែស្មុគស្មាញ និងជ្រកក្រោមរូបភាពថ្មីៗ ជាដើមនោះ ក៏ជាដើមចមធ្វើឱ្យការប្រមូលចំណូលធ្លាក់ចុះផងដែរ។

ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានលើកទឹកចិត្តឱ្យថ្នាក់ដឹកនាំ និងមន្ត្រីគយ និងរដ្ឋាករគ្រប់ជាន់ថ្នាក់ បន្តយកចិត្តទុកដាក់ខិតខំប្រឹងប្រែងអនុវត្តតួនាទី ភារកិច្ចរបស់ខ្លួនប្រកបដោយស្មារតីទទួលខុសត្រូវ។ ក្នុងនាមរាជរដ្ឋាភិបាល ក្រសួងសេដ្ឋកិច្ចនិងហិរញ្ញវត្ថុនឹងបន្តគាំទ្រ និងជ្រោមជ្រែងដល់កិច្ចខិតខំប្រឹងប្រែងរបស់ អ.គ.រ ក្នុងការអនុវត្តការងាររបស់ខ្លួន។

លទ្ធផលចំណូលដែលទទួលបាននេះ ត្រូវសម្រេចបានក្នុងស្ថានភាពមួយដែលបរិស្ថានជុំវិញជួបប្រទះនូវបញ្ហាប្រឈមនានារួមមាន ការងើបឡើងយឺតនូវស្ថានភាពសេដ្ឋកិច្ចប្រទេសមហាអំណាច, ការបន្តអូសបន្លាយសង្គ្រាមរុស្សី-អ៊ុយក្រែន បញ្ហាសង្គ្រាមអ៊ីស្រាអែល-ក្រុមហាម៉ាស់ បញ្ហានៅមជ្ឈឹមបូព៌ា ភាពតានតឹងនៃភូមិសាស្ត្រនយោបាយជាដើម ដែលបានបង្កការរំខានដល់វិស័យដឹកជញ្ជូនទំនិញ និងខ្សែច្រវ៉ាក់ផ្គត់ផ្គង់ ក៏ដូចជាតម្រូវការនៃការប្រើប្រាស់។ នេះបើតាមឯកឧត្តមអគ្គបណ្ឌិតសភាចារ្យបានបញ្ជាក់។

ឯកឧត្តមអគ្គបណ្ឌិតសភាចារ្យ ក៏បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីគយ និងរដ្ឋាករគ្រប់ជាន់ថ្នាក់ក្នុងការសម្រេចបាននូវលទ្ធផលល្អលើការប្រមូលចំណូល និងលើការដ្ឋានការងារផ្សេងទៀតរបស់ អ.គ.រ។

ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី ក៏បានប្រកាសដាក់ឱ្យប្រើប្រាស់ឯកសារយុទ្ធសាស្ត្ររបស់ អ.គ.រ ចំនួន៣គឺ ឯកសារយុទ្ធសាស្ត្រកែទម្រង់ និងទំនើបកម្មគយឆ្នាំ២០២៤-២០២៨ យុទ្ធសាស្ត្រអនុវត្តច្បាប់ និងអនុលោមភាពគយឆ្នាំ២០២៤-២០២៨ និងយុទ្ធសាស្ត្រកម្មវិធីប្រតិបត្តិករសេដ្ឋកិច្ចបានទទួលការអនុញ្ញាតឆ្នាំ២០២៣-២០២៥៕