ភ្នំពេញ៖ គម្រោងវិនិយោគចំនួន២៩ ក្នុងទំហំទុនសរុបប្រមាណ ១,៤ ប៊ីលានដុល្លារអាម៉េរិក និងអាចបង្កើតការងារបានប្រមាណ ២៥ពាន់កន្លែង ត្រូវបានចុះបញ្ជីដោយគណៈកម្មាធិការវិនិយោគកម្ពុជា   (គ.វ.ក) នៃក្រុមប្រឹក្សាអភិវឌ្ឍន៍កម្ពុជា(CDC) នៅក្នុងអំឡុងខែតុលា ឆ្នាំ២០២៥។ នេះបើយោងតាមសេចក្តីប្រកាសព័ត៌មាន​របស់ CDC នាថ្ងៃទី៧ ខែវិច្ឆិកា ឆ្នាំ២០២៥។

ក្នុងចំណោមគម្រោងវិនិយោគសរុបទាំងអស់ គម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន ១៨គម្រោង និងគម្រោងវិនិយោគមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន ១១គម្រោង។

សេចក្តីប្រកាសព័ត៌មានដដែលនេះបានឱ្យដឹងទៀតថា៖ ក្នុងរយៈពេល១០ខែនៃឆ្នាំ២០២៥នេះ គណៈកម្មាធិការវិនិយោគកម្ពុជាបានសម្រេចុះបញ្ជីគម្រោងវិនិយោគចំនួន ៥៧៥គម្រោង ក្នុងទំហំទុនវិនិយោគសរុប ប្រមាណ ៩,២ប៊ីលានដុល្លារអាម៉េរិក កើនឡើងចំនួន ២២៩គម្រោង ស្មើនឹងប្រមាណ ៦៦% ខណៈទុនវិនិយោគមានការកើនឡើងប្រមាណជិត ៣,៧ប៊ីលានដុល្លារអាម៉េរិក ស្មើនឹងប្រមាណ ៦៧% បើប្រៀបធៀបនឹងរយៈពេលដូចគ្នាក្នុងឆ្នាំ២០២៤ ដែលមានគម្រោងវិនិយោគត្រឹមតែ ៣៤៦គម្រោង ក្នុងទំហំទុនវិនិយោគប្រមាណ ៥,៥ប៊ីលានដុល្លារអាម៉េរិក។

ជាការកត់សម្គាល់ ត្រឹមតែរយៈពេល១០ខែ គ.វ.ក បានចុះបញ្ជីគម្រោងវិនិយោគលើសការចុះបញ្ជីគម្រោងវិនិយោគពេញមួយឆ្នាំ២០២៤ រហូតដល់ទៅ ១៦១គម្រោង។

សូមជម្រាបថា នៅក្នុងរបាយការណ៍របស់គណៈកម្មាធិការវិនិយោគកម្ពុជា បានបញ្ជាក់ផងដែរថា គម្រោងវិនិយោគដែលមានភាពលេចធ្លោជាងគេនៅក្រៅតំបន់សេដ្ឋកិច្ចពិសេស គឺគម្រោងវិនិយោគសាងសង់ និងប្រតិបត្តិការព្រែកជីកហ្វូណនតេជោ ដែលមានទីតាំងស្ថិតតាមបណ្តោយខេត្តកណ្តាល តាកែវ និងកែប មានទំហំទុនវិនិយោគប្រមាណ ១,២ប៊ីលានដុល្លារអាម៉េរិក និងការបង្កើតការងារ ៣.១៩៩កន្លែង។ ដោយឡែក គម្រោងវិនិយោគដ៏ធំមួយទៀត គឺគម្រោងសាងសង់មន្ទីរពេទ្យមួយដែលមានចំនួន ២២១គ្រែ ស្ថិតនៅក្នុងខណ្ឌមានជ័យ រាជធានីភ្នំពេញ ជាមួយទំហំទុនវិនិយោគប្រមាណ ៧៦លានដុល្លារអាម៉េរិក និងបង្កើតការងារ ៧៤១ កន្លែង។ ចំណែកគម្រោងវិនិយោគបង្កើតរោងចក្រផលិតក្រណាត់ និងអំបោះគ្រប់ប្រភេទ មានទីតាំងនៅស្រុកកៀនស្វាយ ខេត្តកណ្តាល មានទំហំទុនវិនិយោគប្រមាណ ៥០លានដុល្លារអាម៉េរិក អាចបង្កើតការងារ ១៨២០កន្លែង។

សម្រាប់គម្រោងវិនិយោគនៅក្នុងតំបន់សេដ្ឋកិច្ចពិសេស មានគម្រោងវិនិយោគបង្កើតរោងចក្រផលិតការ៉ូឈើគ្រប់ប្រភេទ ស្ថិតនៅក្នុងតំបន់សេដ្ឋកិច្ចពិសេស កោះកុង ចេជាង ស្ថិតនៅខេត្តកោះកុងទំហំទុនវិនិយោគសរុបប្រមាណ ១៦លានដុល្លារអាម៉េរិក និងអាចបង្កើតការងារបានចំនួន ២៨៥កន្លែង៕