ភ្នំពេញ៖ យោងតាមទិន្នន័យរបស់អគ្គនាយកដ្ឋានគយ និងរដ្ឋាករបានឱ្យដឹងថា ក្នុងរយៈពេល១០ខែ ឆ្នាំ២០២៤ សហរដ្ឋអាមេរិកនៅតែជាទីផ្សារនាំចេញចម្បងរបស់កម្ពុជា ខណៈដែលការនាំចេញរបស់កម្ពុជាទៅទីផ្សារសហរដ្ឋអាមេរិកបានឡើងដល់ ៨,២៣ ពាន់លានដុល្លារអាមេរិក កើនប្រមាណ ៩,៨ភាគរយបើធៀបទៅនឹងរយៈពេលដូចគ្នាកាលពីឆ្នាំកន្លងទៅ ខណៈការនាំចូលពីសហរដ្ឋអាមេរិកមានទំហំ ២១៧ លានដុល្លារ កើនឡើង ៧,៥ ភាគរយ។ កត្តានេះបានធ្វើឲ្យសហរដ្ឋអាមេរិកឈរលេខមួយលើទីផ្សារកម្ពុជា ខណៈវៀតណាមឈរនៅលេខរៀងទី២ និងចិនឈរនៅលេខ៣។

បន្ទាប់ពីសហរដ្ឋអាមេរិក វៀតណាមគឺជាទីផ្សារធំទី២របស់កម្ពុជា ជាមួយនឹងការនាំចេញចំនួន ២.៩ ពាន់លានដុល្លារ កើនឡើង ៣១.២ ភាគរយ និង ៣.៤ ពាន់លានដុល្លារនៃការនាំចូលកើនឡើង១៤.៥ ភាគរយ។ ប្រទេសចិនជាទីផ្សារធំទី៣ ដោយការនាំចេញរបស់កម្ពុជាទៅកាន់ប្រទេសចិនសម្រេចបានត្រឹមតែ ១.៤ ពាន់លានដុល្លារប៉ុណ្ណោះ កើនឡើង១២ ភាគរយ ខណៈការនាំចូលឈានដល់ ១០.៩ ពាន់លានដុល្លារ កើនឡើង ២៣.២ ភាគរយ។

ទន្ទឹមនឹងនេះ ប្រទេសជប៉ុនគឺជាទីផ្សារធំទី៤របស់កម្ពុជា ជាមួយនឹងការនាំចេញឈានដល់ ១.១ ពាន់លានដុល្លារ កើនឡើង១៨ ភាគរយ ខណៈការនាំចូលមានតម្លៃ៦០០ លានដុល្លារ កើនឡើង ១៥.៦ ភាគរយ។ ប្រទេសកាណាដា ដែលជាទីផ្សារធំទី៥ បានឃើញការនាំចេញរបស់កម្ពុជាមានលើសពី ៩០០ លានដុល្លារ កើនឡើងជិត៣០ ភាគរយ ខណៈដែលការនាំចូលមានដល់៤៨ លានដុល្លារ ធ្លាក់ចុះជាង១០ ភាគរយ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់ AMS ថា ទីផ្សារពាណិជ្ជកម្មរវាងសហរដ្ឋអាមេរិក សម្រាប់កម្ពុជានៅតែមានសារសំខាន់ ព្រោះកន្លងមកការនាំចេញរបស់កម្ពុជាទៅអាមេរិកស្ថិតក្នុងស្ថានភាពល្អ និងកើនឡើងជាបន្តបន្ទាប់។

អ្នកឧកញ៉ា បានកត់សម្គាល់ថា ៖

«យើងនៅតែទទួលបានចំណែកទីផ្សារច្រើន ដោយរោងចក្រកាត់ដេរ​សម្លៀក​បំពាក់ ស្បែកជើង បានរើមកពីប្រទេសដែលមានអស្ថិរភាពនយោបាយ រួមមាន ភូមា បង់ក្លាដេស ជាដើម គឺបានមកកម្ពុជាច្រើន ។ ទន្ទឹមនឹងនោះ ការតម្លើងពន្ធរវាងសហរដ្ឋអាមេរិក និងចិន ក៏ជាឱកាសមួយសម្រាប់កម្ពុជាផងដែរ ព្រោះកន្លងមក យើងបានឃើញរួចមកហើយថា ការតម្លើងពន្ធបានធ្វើឱ្យអ្នកវិនិយោគចិន និងប្រទេសមួយចំនួនទៀតងាកមកបណ្តាក់ទុននៅកម្ពុជា និងនាំចេញទៅសហរដ្ឋអាមេរិក»។

អ្នកឧកញ៉ា លឹម ហេង បានបន្តឱ្យដឹងថា ការតំឡើងងពន្ធរវាងសហរដ្ឋអាមេរិក និងប្រទេសចិន ក្នុងមួយរយៈចុងក្រោយនេះ ក្រុមហ៊ុនចិនជាច្រើនបានងាកមកវិនិយោគនៅកម្ពុជា ហើយនាំចេញទៅសហរដ្ឋអាមេរិកក្រោមបន្ទាត់អនុ​គ្រោះពន្ធ ក្នុងនាមកម្ពុជាដែលជាសមាជិកអង្គការពាណិជ្ជកម្មពិភពលោក (បន្តាត់អនុគ្រោះពន្ធ) ដូច្នេះឱកាសទទួលបានទីផ្សារសម្រាប់កម្ពុជានៅសហរដ្ឋអាមេរិកគឺមានភាពទូលាយ។

លោកបណ្ឌិត ហុង វណ្ណៈ ប្រធាននាយកដ្ឋាន​ឋសេដ្ឋកិច្ចអន្តរជាតិវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានលើកឡើងពីការនាំចេញរបស់កម្ពុជាទៅកាន់ទីផ្សារសហរដ្ឋអាមេរិក ដោយលោកនៅតែមានជំនឿថា សហរដ្ឋអាមេរិកនៅតែបន្តបញ្ជាទិញផលិតផលកម្ពុជា ដែលជាទំនិញយុទ្ធសាស្ត្រ ដូចជា ទំនិញវាយនភណ្ឌ សម្លៀកបំពាក់ ស្បែកជើង សម្ភារៈសម្រាប់ធ្វើដំណើរ កង់​ បន្ទះសូឡា ដែលផលិតផលទាំងអស់ បើទោះបីជាអាចមានការប្រែប្រួលលើមុខទំនិញខ្លះក៏ដោយ តែសម្រាប់សហរដ្ឋអាមេរិក កម្រិតបញ្ជាទិញ មិនមានការប្រែប្រួលនោះទេ។

លោកបណ្ឌិត បានបញញជាក់ថា ៖

«យើងសង្កេតឃើញថា​ ទំនាក់ទំនងការទូតរវាងកម្ពុជា-អាមេរិក គឺមានភាពល្អប្រសើរ ហើយក៏មិនឃើញមានសញ្ញា​ណណាមួយដែលបង្ហាញពីភាពថមថយនោះដែរសម្រាប់ការនាំចេញរបស់កម្ពុជាទៅកាន់ទីផ្សារសហរដ្ឋអាមេរិកនៅឆ្នាំ២០២៤នេះ ។ អ្វីដែលជាការកត់សម្គាល់នោះគឺរជ្ជកាលរបស់ លោក ដូណាល់ ត្រាំ​ ដែលនឹងចាប់ផ្តើមនៅឆ្នាំ២០២៥ សង្ឃឹមថា​ សហរដ្ឋអាមេរិក នៅតែបន្តគោលនយោបាយដែលមានទំនាក់ទំនងល្អជាមួយកម្ពុជា ដែលជាការបើកច្រកទីផ្សារកាន់តែធំសម្រាប់ពាណិជ្ជកម្មកម្ពុជា-អាមេរិក»៕