សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ រយៈពេល៥ខែ ក្នុងឆ្នាំ២០២៥ គ្រឹះស្ថានអង្គរដែលគ្រប់គ្រងការលក់បណ្ណចូលទស្សនាក្នុងតំបន់អង្គររកចំណូលបានជាង ២៤លានដុល្លារអាម៉េរិក ជាមួយចំនួនភ្ញៀវទេសចរបរទេសប្រមាណ ៥២៧ ៥៧៧នាក់ ។
តាមសេចក្តីប្រកាសព័ត៌មានរបស់គ្រឹះស្ថានអង្គរបានបញ្ជាក់ថា សម្រាប់តែនៅក្នុងខែឧសភា ចំណូលដែលបានពីការលក់សំបុត្រចូលទស្សនារមណីយដ្ឋានអង្គរ មានចំនួន ២ ៣៦០ ២១៤ដុល្លារ ជាមួយចំនួនទេសចរសរុប ៥២ ៧៦៧ នាក់ កើនឡើងជាង ៣ភាគរយ ធៀបនឹងរយៈពេលដូចគ្នាកាលពីឆ្នាំ២០២៤។
ដោយឡែក របាយការណ៍ពីសហគ្រាសអង្គរដែលគ្រប់គ្រងដោយរដ្ឋបានបង្ហាញថា នៅចន្លោះខែមករា ដល់ខែឧសភា ឆ្នាំ២០២៥ ភ្ញៀវទេសចរបរទេសប្រមាណ ៥២៧ ៥៧៧នាក់ បានមកទស្សនាឧទ្យានបុរាណអង្គរកើនឡើង ១១,៧ ភាគរយបើធៀបនឹងរយៈពេលដូចគ្នាក្នុងឆ្នាំ២០២៤ ហើយចំណូលដែលរកបានពីការលក់សំបុត្រចូលទស្សនារមណីយដ្ឋានអង្គរ គិតជាទឹកប្រាក់មានចំនួន ២៤ ៥៦៩ ០២៤ ដុល្លារ គឺកើនឡើងជាង ១០.៦ភាគរយ។ សូមជ្រាបថា តម្លៃចូលទស្សនាឧទ្យានអង្គររយៈពេលមួយថ្ងៃគឺ ៣៧ ដុល្លារអាមេរិក ការចូលទស្សនារយៈពេល ៣ ថ្ងៃមានតម្លៃ ៦២ ដុល្លារ និងការចូលទស្សនារយៈពេលមួយសប្តាហ៍គឺ ៧២ ដុល្លារ។
ដោយឡែកក្រៅពីការលក់សំបុត្រតំបន់រមណីយដ្ឋានអង្គរ គ្រឹះស្ថានអង្គរក៏ទទួលបានចំណូលពីប្រភពចំនួន ៤ ផ្សេងទៀត ដែលរួមមាន តំបន់ប្រាសាទកោះកេរ មានទឹកប្រាក់ ១៧២ ៤៨៥ ដុល្លារ, ប្រាសាទបេងមាលា ៧៥ ៥២០ដុល្លារ, តំបន់ភ្នំក្បាលស្ពាន ២ ៨៥០ដុល្លារ និងតំបន់កំពង់ផែចុងឃ្នៀស ១ ១៤៣ ៤២១ដុល្លារ។ បើសរុបបញ្ចូលគ្នាជាមួយទីតាំងផ្សេងទៀតខាងលើនេះ គ្រឹះស្ថានអង្គរ រកប្រាក់បានជិត ២៦ លានដុល្លារ។
សម្រាប់ឆ្នាំ២០២៥ នេះ ក្រសួងទេសចរណ៍បានព្យាករណ៍ថា កម្ពុជានឹងទទួលបានភ្ញៀវទេសចរបរទេសប្រមាណ ៧,៥ លាននាក់ ដែលនឹងនាំចំណូលចូលសេដ្ឋកិច្ចជាតិ ប្រមាណជាង ៥ ពាន់លានដុល្លារ ហើយរាជរដ្ឋាភិបាលបានបង្កើតក្រុមប្រឹក្សាទីផ្សារ និងផ្សព្វផ្សាយទេសចរណ៍កម្ពុជា ដែលមានតំណាងមកពីវិស័យសាធារណៈ និងឯកជន ដើម្បីផ្សព្វផ្សាយទេសចរណ៍កម្ពុជាទៅកាន់ទីផ្សារអន្តរជាតិ៕
Account
Security
Favourite Content