សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្នុងរយៈពេល៩ខែ ឆ្នាំ២០២៣នេះ កម្ពុជាផលិតគ្រាប់ស្វាយចន្ទីឆៅបានប្រមាណ ៦៣.៩ម៉ឺនតោន ក្នុងនោះ នាំចេញទៅវៀតណាម៦១.៣ម៉ឺនតោន ដោយទទួលបានចំណូល៨២៩លានដុល្លារ ថយចុះប្រមាណ ១៦,៣% បើធៀបនឹងរយៈពេលដូចគ្នានៅឆ្នាំ២០២២ ។ នេះបើយោងតាមទិន្ន័យរបស់សមាគមស្វាយចន្ទីកម្ពុជា។
លោក អួន ស៊ីឡុត ប្រធានសមាគមស្វាយចន្ទីកម្ពុជា បានឱ្យដឹងថា ក្នុងឆ្នាំ២០២៣នេះ ការនាំចេញគ្រាប់ស្វាយចន្ទីឆៅបានថយចុះ១៦ភាគរយ ធៀបនឹងរយៈពេលដូចគ្នាឆ្នាំ២០២២។ ការធ្លាក់ចុះនេះ បណ្ដាលមកពីវិបត្តិអាកាសធាតុបានយាយីទិន្នផលស្វាយចន្ទី ខណៈកសិករមួយចំនួនមិនអាចថែទាំបាន ក៏សម្រេចបោះបង់ ឬកាប់ដើមចោលតែម្ដង។ លោកមើលឃើញថា សហគ្រាសក្នុងស្រុកក៏បានចូលរួមប្រជែងទិញពីឈ្មួញដែលនាំចេញយ៉ាងសន្ទឹកផងដែរ ក្រោយមានគោលនយោបាយជាតិស្ដីពីស្វាយចន្ទី។
លោក អួន ស៊ីឡុត បានមានប្រសាសន៍ថា ៖
« យើងបានព្យាករថា ការនាំចេញគ្រាប់ស្វាយចន្ទីធ្លាក់ចុះតាំងពីដើមឆ្នាំមកម្ល៉េះ ដោយសារតែកសិកបានកាប់ស្វាយចន្ទីមួយចំនួនចោល។ មូលហេតុ មកពីការប្រែប្រួលអាកាសធាតុ ធ្វើឱ្យពួកគាត់ពិបាកក្នុងការថែទាំ។ ទិន្នផលប្រហែល ៩៥ភាគរយនៃគ្រាប់ស្វាយចន្ទីឆៅ (RCN) ត្រូវបាននាំចេញទៅប្រទេសវៀតណាមសម្រាប់កែច្នៃ ខណៈដែលមានតែ ៥ភាគរយប៉ុណ្ណោះ ដែលត្រូវបានកែច្នៃដោយសិប្បកម្មក្នុងស្រុក ដោយសារសមត្ថភាពផលិតមានកម្រិត និងកង្វះចំណេះដឹង និងជំនាញសម្រាប់ការអភិវឌ្ឍឧស្សាហកម្មសិប្បកម្ម ដល់ការកែច្នៃចំណីអាហារប្រកបដោយស្តង់ដារសុវត្ថិភាពនាំចេញទៅកាន់ទីផ្សារអន្តរជាតិ, ខ្វះទុនបង្វិលសម្រាប់ទិញគ្រាប់ស្តុកទុកដើម្បីកែច្នៃ»។
លោក អួន ស៊ីឡុត ក៏បានសំណូមពរឱ្យមានការបន្ធូរបន្ថយនូវលក្ខខណ្ឌកម្ចីមួយចំនួន ពីធនាគាររដ្ឋ និងឯកជន ដើម្បីឱ្យខ្សែចង្វាក់ផលិតកម្មដំណាំស្វាយចន្ទីកម្ពុជាមានភាពប្រសើរឡើងបានលឿន។ ដូច្នេះ លោកក៏ចង់ឱ្យមានការបន្ធូរបន្ថយផ្នែកពន្ធដារមួយចំនួនសម្រាប់សហគ្រាសក្នុងស្រុក ពិសេសក្នុងវិស័យ ស្វាយចន្ទី ដើម្បីឱ្យសហគ្រាសក្នុងវិស័យស្វាយចន្ទីអាចងើបប្រសើរឡើងបាន។
សូមបញ្ជាក់ថា នៅខែកញ្ញា គ្រាប់ស្វាយចន្ទីស្ងួតមានតម្លៃ ៧ ០០០ ទៅ ៧ ៥០០រៀល ក្នុងមួយគីឡូក្រាម ឬស្មើ ១ ៩០០ដុល្លារក្នុងមួយតោន។ ចំពោះតម្លៃនេះបានហាក់ឡើងខ្ពស់បន្តិច ធៀបនឹងតម្លៃមធ្យម ១ ៦៥៨ដុល្លារ ក្នុងមួយតោន។
របាយការណ៍សមាគមស្វាយចន្ទីកម្ពុជាក៏បានឱ្យដឹងថា តម្លៃបន្ថែមលើផលិតផលកសិកម្មត្រូវបានកំណត់ថាជាសក្តានុពលសម្រាប់ការនាំចេញ។ ទោះយ៉ាងណាក៏ដោយ គ្រាប់ស្វាយចន្ទីជាច្រើនត្រូវបាននាំចេញឆៅ ដែលធ្វើឱ្យតម្លៃបន្ថែមសម្រាប់ផលិតផលកសិកម្មកម្ពុជាបាត់បង់តម្លៃអតិបរមា។
ថ្មីៗនេះអង្គការអភិវឌ្ឍន៍ឧស្សាហកម្មនៃអង្គការសហប្រជាជាតិ (UNIDO) បានសហការជាមួយសមាគមគ្រាប់ស្វាយចន្ទីកម្ពុជា (CAC) ដើម្បីជំរុញការនាំចេញគ្រាប់ស្វាយចន្ទីឱ្យបាន១២ភាគរយនៅឆ្នាំ២០២៥ ដោយផ្តល់ការគាំទ្រផ្នែកបច្ចេកទេស និងប្រព័ន្ធគ្រប់គ្រងដល់ម្ចាស់សហគ្រាសធុនតូច និងមធ្យម(MSMEs)។
តាមទិន្នន័យរបស់សមាគមស្វាយចន្ទីកម្ពុជា ការប្រែប្រួលអាកាសធាតុបានកើនឡើងខ្លាំងក្នុងរយៈពេល ៤ឆ្នាំចុងក្រោយនេះ ដែលធ្វើឱ្យទិន្នផលស្វាយចន្ទីជាមធ្យមធ្លាក់ចុះពី ៣០ទៅ ៤០ភាគរយ។ ប៉ុន្មានឆ្នាំចុងក្រោយនេះដែរ កសិករបានកាប់ដើមស្វាយចន្ទីចោលប្រហែល១០ម៉ឺនហិកតា ប៉ុន្តែក្នុងនោះក៏មានការដាំចន្ទីឡើងវិញប្រមាណ៣ម៉ឺនហិកតាផងដែរ។ សព្វថ្ងៃកម្ពុជាមានផ្ទៃដីដាំស្វាយចន្ទីប្រមាណតែ ៧០ម៉ឺនហិកតាប៉ុណ្ណោះធៀបនឹងឆ្នាំ២០២១ មានដល់៨០ម៉ឺនហិកតា៕
Account
Security
Favourite Content