ស្ថាបត្យកម្មសហសម័យ (Contemporary architecture) ជាសំណង់អគាររស់នៅបែបច្នៃប្រឌិតថ្មីដែលគេសង្កេតឃើញចាប់ផ្តើមមានសកម្មភាពសាងសង់កាន់តែច្រើននៅក្នុងសតវត្សរ៍ទី២១នេះ បើទោះបីជាច្រើនទសវត្សរ៍កន្លងមកនេះធ្លាប់មានវត្តមានខ្លះៗហើយក្តីនៅបណ្តាប្រទេសមួយចំនួន ប៉ុន្តែមិនសូវទទួលបានការពេញនិយមនៅឡើយ។

ស្ថាបត្យកម្មបែបថ្មី គឺជាគំរូសាងសង់ដែលពោរពេញទៅដោយការគិតគូរបានខ្ពស់ និងស៊ីជម្រៅទាំងផាសុកភាព ការគិតគូរដល់បរិស្ថាន ជាពិសេសការបូកបញ្ចូលបច្ចេកវិទ្យាដើម្បីធ្វើឲ្យអ្នករស់នៅកាន់តែមានភាពងាយស្រួល។

មិនត្រឹមតែប៉ុណ្ណោះ វាជាសំណង់ដែលបានមកពីការរចនាដែលមានភាពច្នៃប្រឌិតដើម្បីប្រើប្រាស់កន្លែងទំនេរ (Free Space) ឲ្យអស់លទ្ធភាព ហើយវាក៏ជាការរួមបញ្ចូលគ្នានៃគ្រប់ទំរង់រូបរាងដែលអាចបត់បែនបានតាមចិត្តអ្នករចនាដែលនឹងធ្វើឱ្យកន្លែងរស់នៅមានភាពចម្រុះកាន់តែខ្លាំង ហើយភាគច្រើនគេសង្កេតឃើញថាអគារទាំងនោះមានលក្ខណៈរចនាផ្ទៃខាងក្នុងតាមបែប Minimalism ឬមានន័យថា ជារសនិយមតាមបែបតិចតួចបំផុត(សាមញ្ញមិនស្អេកស្កេះ និងមានពណ៍ចម្រុះច្រើន)។

ថ្វីត្បិតតែការរស់នៅក្នុងសំណង់ ឬអគារតាមបែបស្ថាបត្យកម្មសហម័យថ្មីដែលទើបតែចាប់ផ្តើមទទួលបានការចាប់អារម្មណ៍នៅក្នុងសតវត្សរ៍នេះក្តី ប៉ុន្តែអត្ថប្រយោជន៍ដ៏ច្រើនលើសលប់របស់វាកំពុងជ្រួតជ្រៀបនៅក្នុងទីផ្សារអចលនទ្រព្យប្រភេទលំនៅដ្ឋាននៃមនុស្សជំនាន់ថ្មី។

ប្រសិទ្ធភាពនៃការប្រើប្រាស់ទីធ្លាអគារ និងចន្លោះទំនេរគឺជាចំណុចទាក់ទាញបំផុតមួយក្នុងចំណោមអត្ថប្រយោជន៍ផ្សេងៗទៀតដែលអគាររចនាតាមបែបសហសម័យអាចផ្តល់ឲ្យជូនម្ចាស់ផ្ទះចាប់រាប់តាំងតែពីជញ្ចាំងទៅដល់ពិដាន និងផ្លូវដើរផងដែរ នូវមុខងារប្រើប្រាស់លើសពីសំណង់បែបប្រពៃណី និងបុរាណ។

ការគិតគូរដល់ការប្រើប្រាស់ថាមពលប្រកបដោយនិរន្តភាពគឺជាភារកិច្ចមួយរបស់មនុស្សជំនាន់ថ្មីនេះ ដូច្នេះលំនៅដ្ឋានបែបសហសម័យពិតជាស័ក្ដិសមបំផុត។ ការរចនាដែលផ្តោតសំខាន់មួយចំណែកទៅលើការទទួលយកបានពន្លឺគ្រប់គ្រាន់ដែលអាចកាត់បន្ថយចំណាយថាមពលអគ្គិសនីបានយ៉ាងច្រើន និងផ្តល់អត្ថប្រយោជន៍យ៉ាងខ្លាំងសម្រាប់សុខភាពផ្លូវចិត្ត ផ្លូវកាយដោយប្រយោល។ មិនត្រឹមតែប៉ុណ្ណោះ ប្រភេទស្ថាបត្យកម្មបែបនេះនឹងអាចផ្តល់អារម្មណ៍រីករាយជាប់ជានិច្ចសម្រាប់ជីវិតរស់នៅ ទាំងការជួបជុំគ្រួសារ មិត្តភ័ក្ត និងសូម្បីតែការបំពេញកិច្ចការងារពីផ្ទះផងដែរ។ ការបំពាក់បច្ចេកវិទ្យាទំនើបមិនមែនជារឿងតែមួយគត់ដែល Contemporary Architecture អាចធ្វើនោះទេ ប៉ុន្តែបច្ចេកវិទ្យាទាំងនោះមានភាពឆ្លាតវ៉ៃលើសពីមុខងារជាមូលដ្ឋានរបស់វាផងដែរ។

អ្វីដែលជាចំណុចសំខាន់បំផុតរបស់អគាររស់នៅ និងធ្វើការតាមបែបការរចនាសហសម័យនោះគឺរូបរាងដែលអាចបត់បែនរបស់វាទៅតាមការចង់បានរបស់អ្នករចនា និងទៅតាមទីតាំង ហើយដោយចំណាយថ្លៃដើមតិច តែមានភាពរឹងម៉ាំ និងយូរអង្វែង។

ប្រាកដណាស់ វាគឺជាសំណងដែលមិនផ្តល់ផលប៉ះពាល់ដល់បរិស្ថានឡើយ ពីព្រោះថាក្រៅតែពីអាចសន្សំសំចៃអគ្គិសនីហើយនោះ លំនៅដ្ឋានប្រភេទនេះថែមអាចផលិតថាមពលបានដោយខ្លួនឯងផងនិងប្រើប្រាស់វត្ថុធាតុដើមកែច្នៃឡើងវិញទៀតផង៕