សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
អាជីវកម្មបរិយាបន្ន សំដៅលើប្រភេទអាជីវកម្មឈ្នះ-ឈ្នះ-ឈ្នះ ដែលមានន័យថា ឈ្នះទាំងម្ចាស់អាជីវកម្មផ្ទាល់ក្នុងការបង្កើតចំណូល ឈ្នះទៅដល់សហគមន៍ដែលបានទទួលផលពីអាជីវកម្ម និងឈ្នះទៅដល់រដ្ឋាភិបាលតាមរយៈការរីកចម្រើននៃសេដ្ឋកិច្ចជាតិ។
អាជីវកម្មប្រភេទនេះ ត្រូវបានរាជរដ្ឋាភិបាលកម្ពុជាខិតខំប្រឹងប្រែងជំរុញឱ្យមានកាន់តែច្រើនឡើង ដើម្បីជាផ្នែកមួយក្នុងការសម្រេចគោលដៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ ២០៣០ និងប្រទេសមានចំណូលខ្ពស់នៅឆ្នាំ២០៥០។
ដោយឡែក រាប់ចាប់តាំងពីការអនុវត្តអាជីវកម្មបរិយាបន្ននៅក្នុងប្រទេសកម្ពុជាមក មានអាជីវកម្មចំនួន ១៨ហើយ ដែលបានក្លាយខ្លួនជាអាជីវកម្មបរិយាបន្ន។ ក្នុងចំណោមអាជីវកម្មគំរូទាំង១៨នោះ ក៏មាននូវអាជីវកម្មមួយចំនួនដែលផ្ដោតការយកចិត្តទុកដាក់របស់ខ្លួនទៅលើបរិស្ថាន។
មួយក្នុងចំណោមនោះគឺ អាជីវកម្មធ្យូងអនាម័យ ដែលជាប្រភេទអាជីវកម្មយកត្រឡោកដូងមកកែច្នៃ ធ្វើជាធ្យូងសម្រាប់ដុត។ ខុសពីធ្យូងទូទៅ ធ្យូងប្រភេទនេះមិនមានផ្កាភ្លើង និងមិនមានផ្សែង ដែលបង្កការងាយស្រួលដល់អ្នកប្រើប្រាស់។
ឈរជើងក្នុងទីផ្សារតាំងតែពីឆ្នាំ២០០៨ អាជីវកម្មធ្យូងអនាម័យនេះបានរួមចំណែកជួយបរិស្ថានបានយ៉ាងច្រើនតាមរយៈការជួយសម្រាលពីការយកឈើទៅដុតដើម្បីធ្វើជាធ្យូង និងការបោសសម្អាតកាកសំណល់ត្រឡោកដូងចេញពីបរិស្ថានផងដែរ។
ក្រៅពីអាជីវកម្មធ្យូងអនាម័យនេះទៅ Okra solar ក៏ជាអាជីវកម្មដែលគិតគូរពីបរិស្ថាន និងសុខមាលភាពរបស់ប្រជាជនដែលរស់នៅតាមតំបន់ដាច់ស្រយាលផងដែរ។ Okra ជាក្រុមហ៊ុនដែលផ្គត់ផ្គង់ សូឡា ទៅដល់ក្រុមប្រជាជនដែលរស់នៅតាមតំបន់ដាច់ស្រយាល ដែលមិនមានអគ្គិសនីប្រើប្រាស់ ឬមាន ប៉ុន្តែក្នុងតម្លៃថ្លៃជាដើម។
តាមរយៈការប្រើប្រាស់សូឡា ក្នុងការបំលែងជាថាមពលអគ្គិសនីបែបនេះ មិនត្រឹមតែបានជួយសម្រួលដល់ការចំណាយប្រចាំថ្ងៃរបស់ប្រជាជនប៉ុណ្ណោះទេ ប៉ុន្តែក៏ជាការលើកកម្ពស់ការប្រើប្រាស់ថាមពលស្អាតដែលមិនប៉ះពាល់ដល់បរិស្ថាន។
ស្រដៀងគ្នានឹងអាជីវកម្មទាំងពីរខាងលើ ACE Energy ក៏ជាអាជីវកម្មគំរូមួយដែលគិតគូដល់បរិស្ថានផងដែរ។ អាជីវកម្មនេះមានផលិតនូវចង្ក្រានបរិស្ថាន ដែលផ្ដល់ភាពសន្សំសំចៃដល់អ្នកប្រើប្រាស់ ដែលភាគច្រើនជាស្ត្រីមេផ្ទះ និងជាអាជីវករលក់ម្ហូបអាហារ។
ផលិតផលចង្ក្រានរបស់ក្រុមហ៊ុនខាងលើនេះ អាចជួយកាត់បន្ថយការបញ្ចេញផ្សែងតាមផ្ទះបាយ និងជាពិសេសជួយដល់សុខមាលភាពស្ត្រីមេផ្ទះ។ ក្រៅតែពីចង្ក្រានទៅ ក្រុមហ៊ុននេះក៏មាននូវផលិតផលអុស ដែលផលិតចេញពីកាកអំពៅផងដែរ។ ។
ដោយផ្អែកលើផលជះទៅក្នុងសង្គម និងបរិស្ថានដ៏លើសលប់នេះហើយ ទើបនាំឱ្យអាជីវកម្មនេះ បានជាប់ជាអាជីវកម្មបរិយាបន្ន។ ហើយក្រោយបានក្លាយខ្លួនជាអាជីវកម្មបរិយាបន្នហើយ អាជីវកម្មខាងលើ បានពង្រីកខ្លួនកាន់តែធំ និងបន្តជួយសហគមន៍បានកាន់តែច្រើន ថែមទៀត៕
Account
Security
Favourite Content