បរទេស៖ Hilltribe Organics គឺជាសហគ្រាសសង្គមដែលមានមូលដ្ឋាននៅប្រទេសថៃ និងជាក្រុមហ៊ុនបុត្រសម្ព័ន្ធរបស់អ្នកផលិតអាហារសរីរាង្គដ៏ធំរបស់ថៃ Urmatt Ltd.។ កាលពីឆ្នាំ២០២០ Urmatt Ltd. បានសហការជាមួយ Business Call to Action (BCtA) ក្នុងការចុះកិច្ចសន្យាជាមួយនឹងកសិដ្ឋានបែបគ្រួសារចំនួន ២០០ ដើម្បីផលិតស៊ុតសរីរាង្គចំនួន ៤០ ០ ០០០ គ្រាប់ក្នុងមួយថ្ងៃ។

BCtA គឺជាគំនិតផ្តួចផ្តើមសកលមួយដែលមានគោលបំណងគាំទ្រដល់កិច្ចខិតខំប្រឹងប្រែងរបស់វិស័យឯកជនក្នុងការប្រយុទ្ធប្រឆាំងនឹងភាពក្រីក្រតាមរយៈអាជីវកម្មស្នូលរបស់ខ្លួន។ វាត្រូវបានគាំទ្រដោយអង្គការអន្តរជាតិមួយចំនួន និងរៀបចំដោយកម្មវិធីអភិវឌ្ឍន៍អង្គការសហប្រជាជាតិ (UNDP)។ ទន្ទឹមនឹងនេះ សហគមន៍កុលសម្ព័ន្ធនៅភាគខាងជើងប្រទេសថៃរស់នៅក្នុងជីវភាពក្រីក្រ និងខ្វះជំហរស្របច្បាប់ដូចប្រជាជនដទៃទៀតក្នុងប្រទេសថៃ ហើយពួកគេមិនអាចទទួលបានអត្ថប្រយោជន៍ដូចជាសន្តិសុខសង្គម ការថែទាំសុខភាព និងមិនមានសិទ្ធិបោះឆ្នោត។ ភាពក្រីក្រ និងភាពឯកោនាំឱ្យមនុស្សមួយចំនួននៅក្នុងសហគមន៍ទាំងនេះចូលទៅក្នុងការជួញដូរគ្រឿងញៀន និងការជួញដូរមនុស្ស ហើយបង្ខំមនុស្សជាច្រើនឱ្យបោះបង់ចោលផ្ទះនៅលើភ្នំរបស់ពួកគេ និងធ្វើចំណាកស្រុកទៅកាន់ទីក្រុង។

ទោះបីជាកន្លែងរស់នៅរបស់កុលសម្ព័ន្ធមានអំណោយផលធនធានធម្មជាតិសម្បូរបែបក៏ដោយ ប៉ុន្តែការរស់រានមានជីវិតរបស់សហគមន៍កុលសម្ព័ន្ធភ្នំគឺពិបាក និងគ្មានលទ្ធភាពទទួលបានទីផ្សារដោយយុត្តិធម៌សម្រាប់កសិផលរបស់ពួកគេ។ ដើម្បីដោះស្រាយបញ្ហានេះ Hilltribe Organics កំពុងឆ្លើយតបទៅនឹងតម្រូវការនេះជាមួយនឹងគំរូអាជីវកម្មបរិយាបន្នតាមរយៈការចិញ្ចឹមសត្វយកស៊ុតសរីរាង្គ។ Hilltribe Organics បានដាក់ទុនលើបរិស្ថានរបស់សហគមន៍ទាំងនេះ ដោយក្រុមហ៊ុនបានរួមបញ្ចូលជនជាតិដើមភាគតិចដែលចិញ្ចឹមមាន់យកស៊ុតទៅក្នុងខ្សែសង្វាក់តម្លៃនៃផលិតផលសរីរាង្គរបស់ខ្លួន ហើយបានជួយបង្កើនប្រាក់ចំណូលរបស់ពួកគេបីដង ឬជាង ៥០០ ដុល្លារក្នុងមួយខែ។

Hilltribe Organics គឺជាក្រុមហ៊ុនដំបូងគេនៅក្នុងប្រទេសថៃដែលសម្រេចបានវិញ្ញាបនប័ត្រផ្នែកសរីរាង្គសម្រាប់កសិដ្ឋានចិញ្ចឹមមាន់របស់ខ្លួន ហើយស៊ុតសរីរាង្គ គឺជាផលិតផលប្រចាំក្រុមហ៊ុន។ អ្វីដែលពិសេសនោះគឺដីដាំដុះនៅតាមតំបន់​កុលសម្ព័ន្ធ​ភ្នំ​របស់​ថៃមានជីជាតិល្អ មាន់​ត្រូវ​បាន​ដាក់​ឱ្យ​ដើរ​ពេញដី​​ មាន​របប​អាហារ​ធម្មជាតិ និងមិនប្រើអ័រម៉ូនអ្វីទាំងអស់​។ ជាលទ្ធផល ស៊ុតរបស់ Hilltribe យកឈ្នះលើស្តង់ដារនៃផលិតកម្មសរីរាង្គដ៏តឹងរឹងបំផុត។ គួរឲ្យបញ្ជាក់ដែរថា Urmatt Ltd. ដែលជាក្រុមហ៊ុនមេរបស់ Hilltribe Organics បានចូលរួមក្នុងវិស័យកសិកម្មដែលមានឥទ្ធិពលដល់សហគមន៍នៅភាគខាងជើងប្រទេសថៃអស់រយៈពេលជាង ៣០ ឆ្នាំមកហើយ។ ក្រៅពីនេះ ការងាររបស់ Urmatt Ltd. ជាមួយកសិករខ្នាតតូចរួមមាន ការទិញលាមកក្របី និងខ្យងស្រែ ដែលកសិករប្រមូលពីដីស្រែសម្រាប់កែច្នៃជាជីសរីរាង្គ។ មិនត្រឹមតែប៉ុណ្ណោះ ជីត្រូវបានផ្តល់ជូនកសិករដោយមិនគិតថ្លៃ ដើម្បីបង្កើនទិន្នផល និងធានាបាននូវការអនុលោមតាមស្តង់ដារសរីរាង្គ។ តាមរយៈការប្រើប្រាស់បទពិសោធន៍របស់ក្រុមហ៊ុនមេរបស់ខ្លួនក្នុងការធ្វើកសិកម្មសរីរាង្គមានលក្ខណៈរួមបញ្ចូល Hilltribe ផ្សារភ្ជាប់ជាមួយកសិករតាមរយៈមនុស្សចាស់ទុំ និងក្រុមសហគមន៍ដែលគួរឱ្យគោរព ហើយជួយពួកគេបង្កើតក្រុមកសិករដោយផ្អែកលើរចនាសម្ព័ន្ធសង្គមបែបប្រពៃណី។

លោក Arvind Narula នាយកប្រតិបត្តិនៃ Urmatt Ltd បាននិយាយថា គោលដៅចម្បងរបស់ពួកគេគឺធ្វើជំរុញគុណភាពជីវិតរបស់ប្រជាជនកុលសម្ព័ន្ធភ្នំឲ្យមានប្រសើរឡើង។ ក្រុមការងារកសិកម្មរបស់ Hilltribe ធ្វើទស្សនកិច្ចនៅកសិដ្ឋានដាច់ស្រយាលដោយការជិះម៉ូតូត្រៃជារៀងរាល់ខែ ដើម្បីផ្តល់ការបណ្តុះបណ្តាលឱ្យកសិករអនុវត្តតាមស្តង់ដារកម្រិតខ្ពស់របស់ក្រុមហ៊ុន។ អ្វីដែលសំខាន់ជាងនេះទៅទៀតនោះ ការមានទីផ្សារដែលអាចទុកចិត្តបានសម្រាប់ស៊ុតដែលមានគុណភាពខ្ពស់ផ្តល់ឱ្យប្រជាជននៅលើភ្នំអាចប្រកបរបរចិញ្ចឹមជីវិតបានបាន និងអនុញ្ញាតឱ្យពួកគេបន្តរស់នៅលើដីរបស់ពួកគេបាន។ ទន្ទឹមនឹងនេះ កសិករដែលចុះកិច្ចសន្យាជាមួយ Hilltribe ត្រូវបានផ្តល់ការបណ្តុះបណ្តាលចិញ្ចឹមមាន់យកពង, ជួយសាងសង់ទ្រុងមាន់ឬស្សី, រៀបចំដីសម្រាប់ចិញ្ចឹមមាន់ដោយឥតគិតថ្លៃ, បង្រៀនពីរបៀបថែទាំមាន់, និងដាំដុះចំណីសរីរាង្គដោយមិនគិតថ្លៃអ្វីទាំងអស់។ បន្ទាប់មក ក្រុមហ៊ុនផ្តល់ប្រាក់ក្នុងតម្លៃសមរម្យសម្រាប់ការផ្គត់ផ្គង់ស៊ុតពីកសិករ និងជួយគ្រួសារកសិករឱ្យទទួលបានថាមពល អនាម័យ និងការអប់រំថែមទៀតផង។

Paula Pelaez អ្នកគ្រប់គ្រងកម្មវិធី BCtA បាននិយាយថា គំរូរបស់ Hilltribe Organics ផ្តល់នូវឧទាហរណ៍ដ៏ទូលំទូលាយនៃខ្សែសង្វាក់តម្លៃនៃអាំជីវកម្មបរិយាបន្ន។ ការបង្កើនប្រាក់ចំណូលនៅក្នុងសហគមន៍ជនជាតិដើមភាគតិចតាមរយៈកសិកម្មសរីរាង្គ មិនត្រឹមតែអាចឱ្យពួកគេប្រកាន់ខ្ជាប់នូវការធ្វើកសិកម្មបែបប្រពៃណីរបស់ពួកគេប៉ុណ្ណោះទេ ប៉ុន្តែជួយពួកគេក្នុងការកសាងជីវភាពរស់នៅដ៏រឹងមាំ តាមរយៈការផលិតអាហារដែលមានគុណភាពខ្ពស់ និងមានជីវជាតិសម្រាប់ប្រើប្រាស់ក្នុងទីក្រុងថែមទៀតផង។

ជាលទ្ធផលនៃកិច្ចខិតខំប្រឹងប្រែងទាំងនេះ Hilltribe បានក្លាយជាម៉ាកស៊ុតសរីរាង្គលំដាប់លេខ ១ នៅក្នុងប្រទេសថៃ ហើយឥឡូវនេះត្រូវបានលក់នៅក្នុងផ្សារទំនើបធំៗក៏ដូចជាភោជនីយដ្ឋាន និងសណ្ឋាគារលំដាប់ខ្ពស់ផងដែរ។ Hilltribe Organics ទទួលបានភាពជោគជ័យយ៉ាងឆាប់រហ័ស ហើយក្រុមហ៊ុនកំពុងស្វែងរកការពង្រីកទៅលើផលិតផលបន្ថែមដូចជា មីធ្វើពីស៊ុត តៅហ៊ូស៊ុត ទឹកម៉ាយ៉ូណេស នំផ្អែមធ្វើពីស៊ុត និងសាច់មាន់។ ការពង្រីកអាជីវកម្មបរិយាបន្នរបស់ Hilltribe Organics នឹងអនុញ្ញាតឱ្យអាជីវកម្មបិរយាបន្នរួមបញ្ចូលសហគមន៍ជនជាតិដើមភាគតិចផ្សេងទៀតចូលក្នុងខ្សែសង្វាក់តម្លៃរបស់ខ្លួន និងបង្កើតការងារក្រៅកសិដ្ឋានបន្ថែមទៀតនៅក្នុងផលិតកម្មស្បៀង៕