សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តំណាងរដ្ឋាភិបាលប្រទេសឥណ្ឌូនេស៊ី បានលើកឡើងពីគោលបំណងចម្បងរបស់ខ្លួនថា ឥណ្ឌូនេស៊ី ចង់ពង្រីកកិច្ចសហប្រតិបត្តិការជាមួយកម្ពុជាលើការធ្វើពិពិធកម្មលើវិស័យពាណិជ្ជកម្ម ផ្នែកផលិតផលកសិកម្ម និងការវិនិយោគដោយផ្ទាល់ពីឥណ្ឌូនេស៊ី។
នៅក្នុងជំនួបជាមួយអ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ឯកឧត្តម សាន់តូ ដាណូស៊ូម៉ាតូ (Santo Darmosumarto) ឯកអគ្គរដ្ឋទូតឥណ្ឌូនេស៊ីប្រចាំព្រះរាជាណាចក្រកម្ពុជា នាថ្ងៃទី២៩ ខែមករា ឆ្នាំ ២០២៤ បានលើកឡើងអំពីគម្រោងសំខាន់ៗដែលឥណ្ឌូនេស៊ីចង់ជំរុញនៅកម្ពុជា និងការរៀបចំព្រឹត្តការណ៍ធុរកិច្ចនៅឆ្នាំ ២០២៤នេះ ដែលក្នុងនោះរួមមានការតាំងពិព័រណ៍ផលិតផលផ្នែកសុខភាព ដែលនឹងប្រព្រឹត្តឡើងនៅរាជធានីភ្នំពេញ និងខេត្តព្រះសីហនុ ការតាំងពិព័រណ៍ផលិតផលចម្រុះដទៃទៀតនៅខែបន្ដបន្ទាប់ និងការរៀបចំពិព័រណ៍ពាណិជ្ជកម្ម និងវេទិកាធុរកិច្ចដែលគ្រោងនឹងរៀបចំឡើងនៅទីក្រុងហ្សាកាតា ប្រទេសឥណ្ឌូនេស៊ីនៅខែតុលាខាងមុខនេះ។
ទាក់ទងនឹងគម្រោងធុរកិច្ចនេះ ឯកឧត្តម ឯកអគ្គរដ្ឋទូតបានស្នើសុំការគាំទ្រពីសភាពាណិជ្ជកម្មកម្ពុជា និងអញ្ជើញសមាជិកសភាពាណិជ្ជកម្មកម្ពុជាចូលរួមព្រឹត្តិការណ៍ដែលរៀបចំឡើងដោយស្ថានទូត និងរដ្ឋាភិបាលប្រទេសឥណ្ឌូនេស៊ី។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានស្វាគមន៍យ៉ាងកក់ក្ដៅ និងគាំទ្រចំពោះព្រឹត្តិការណ៍ធុរកិច្ចដែលពិតជារួមចំណែកក្នុងការជំរុញពាណិជ្ជកម្ម និងការវិនិយោគរវាងប្រទេសទាំងពីរ។
បន្ថែមពីនេះ អ្នកឧកញ៉ា លឹម ហេង ក៏បានអញ្ជើញឯកឧត្តម ឯកអគ្គរដ្ឋទូត ធ្វើទស្សនកិច្ចនៅតាមខេត្តនីមួយៗដើម្បីស្វែងយល់ឲ្យកាន់តែច្បាស់អំពីសក្ដានុពលពាណិជ្ជកម្មទូទាំងព្រះរាជាណាចក្រកម្ពុជា។
យោងតាមអគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា គិតត្រឹមខែកញ្ញា ឆ្នាំ ២០២៣ ការដោះដូរទំនិញរវាងកម្ពុជា និងឥណ្ឌូនេស៊ី មានទឹកប្រាក់សរុប ៨០៨,០៧ លានដុល្លារ កើន ១៨,៦ ភាគរយបើធៀបទៅរយៈពេលដូចគ្នាក្នុងឆ្នាំ២០២២ ដែលមាន ៦៨១,២៥ លានដុល្លារ។ កម្ពុជាបាននាំទំនិញទៅឥណ្ឌូនេស៊ីមានទំហំចំនួន ៣៧,១២ លានដុល្លារ កើនឡើង ៤១,៨ ភាគរយ ខណៈដែលឥណ្ឌូនេស៊ីបាននាំទំនិញមកកម្ពុជាមានទំហំ ៧៧០,៤៥ លានដុល្លារ កើន ១៧,៧ ភាគរយ។ គិតត្រឹមខែកញ្ញាឆ្នាំ២០២៣ ប្រទេសឥណ្ឌូនេស៊ី គឺជាដៃគូពាណិជ្ជកម្មធំទី៦របស់កម្ពុជាដែលនាំមុខដោយប្រទេសចិន អាមេរិក វៀតណាម ថៃ និងជប៉ុន ខណៈកាលពីខែកញ្ញាឆ្នាំ២០២២ស្ថិតនៅលេខរៀង ១៣។
ដោយឡែកការផ្លាស់ប្តូរទំនិញនៃប្រទេសទាំង ២ ក្នុងខែកញ្ញា ឆ្នាំ ២០២៣ គឺមានចំនួន ៦៦ លានដុល្លារ កើន ២០,៩៨ ភាគរយ ធៀបខែកញ្ញា ឆ្នាំ២០២២ ដែលមាន ៥៤,៥៥ លានដុល្លារ ដោយទំនិញកម្ពុជានាំចេញវិញ ៧,៥៧ លានដុល្លារ កើនឡើង ៤៥,៩៤ ភាគរយ និងទំនិញដែលឥណ្ឌូនេស៊ីនាំមកកម្ពុជា ៥៨,៤៣ លានដុល្លារ កើនឡើង ១៨,៣៥ ភាគរយ៕
Account
Security
Favourite Content