សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមការងារក្រសួងទេសចរណ៍ កាលពីថ្ងៃចុងសប្ដាហ៍កន្លងទៅនេះ បានដឹកនាំក្រុម Influencers /V-logges និងអ្នកជំនាញថតរូបមួយចំនួននៅកម្ពុជា ចុះទៅដល់ទីតាំងតំបន់សក្តានុពលអេកូទេសចរណ៍កោះហាននៃខេត្តស្ទឹងត្រែង។ យ៉ាងណាមិញ សកម្មភាពនេះគឺធ្វើឡើងស្របតាមការងារគាំទ្រអាទិភាពអភិវឌ្ឍ ៣ (3Ds) របស់ក្រសួងទេសចរណ៍ទៅលើការអភិវឌ្ឍបរិវត្តកម្មឌីជីថល និងដើម្បីជំរុញឱ្យកាន់តែទូលំទូលាយនូវតំបន់សក្តានុពលក្នុងវិស័យទេសចរណ៍តាមប្រព័ន្ធឌីជីថល និងបណ្តាញសង្គម។
ក្នុងការចុះទៅទស្សនា ផ្តិតរូបភាព និងវីដេអូនៅសហគមន៍អេកូទេសចរណ៍សម្រស់កោះហាននេះ ក្រុមការងារបានចុះទៅដល់ទីតាំងមួយចំនួនដូចជា តំបន់បោះតង់ តំបន់ជិះកៃយាក់ តំបន់ព្រៃលិចទឹក តំបន់មើលសត្វស្លាប តំបន់សហគមន៍ តំបន់ស្នាក់នៅ និងញាំអាហារជុំគ្នាជាដើម។ ដោយឡែក ការរីកចម្រើននៃបច្ចេកវិទ្យាឌីជីថលនេះហើយ ដែលជួយឱ្យតំបន់ទេសចរណ៍សហគមន៍មួយនេះអាចទទួលបានភ្ញៀវកាន់តែច្រើនពីមួយឆ្នាំទៅមួយឆ្នាំ។
ទាក់ទិននឹងចំណុចនេះ អ្នកស្រី ប៊ុន សំផាន ប្រធានសហគមន៍អេកូទេសចរណ៍សម្រស់កោះហាន បានឱ្យដឹងថា កាលពីមុនផ្ទុះជំងឺកូវីដ សហគមន៍អ្នកស្រីមិនសូវជាមានភ្ញៀវនិយមទៅលេងនោះទេ ប៉ុន្តែក្នុងអំឡុងចុងឆ្នាំ២០២១ ដែលជំងឺកូវីដបានធូរស្រាលបន្តិច ភ្ញៀវក៏ចាប់ផ្ដើមទៅលេងសហគមន៍កាន់តែច្រើន។ នោះក៏ដោយសារតែទំនោរនៃការប្រើប្រាស់ឌីជីថលរបស់ប្រជាជនកាន់តែកើនឡើងក្រោយពេលមានជំងឺកូវីដ១៩។
ព្រោះតែការផ្សព្វផ្សាយរបស់អ្នកទេសចរដែលបានទៅដល់តំបន់សហគមន៍ទាំងនោះហើយ ដែលធ្វើឱ្យប្រជាជនផ្សេងទៀតមានការចាប់អារម្មណ៍ចំពោះគោលដៅទេសចរណ៍តំបន់ទន្លេមេគង្គមួយនេះកាន់តែខ្លាំង។
សម្រាប់អ្នកស្រី ប្រព័ន្ធផ្សព្វផ្សាយពិតជាមានសារៈសំខាន់ណាស់ ជាពិសេសគឺសម្រាប់វិស័យទេសចរណ៍តែម្ដង។ ជាក់ស្ដែង ឥទ្ធិពលនៃការផ្សព្វផ្សាយនេះហើយ ដែលនាំឱ្យសហគមន៍អ្នកស្រីបន្ថែមទូកដឹកភ្ញៀវចំនួន ៤បន្ថែមទៀតនៅឆ្នាំនេះ។ បន្ថែមទូកចំនួន៤ទៀត ធ្វើឱ្យទូកសរុបនៅក្នុងសហគមន៍កើនដល់ ១៥ទូក ដែលរួមចំណែកកាន់តែធំក្នុងការជួយសេដ្ឋកិច្ចប្រជាសហគមន៍ប្រមាណជិត៤០គ្រួសារ។
គួរបញ្ជាក់ថា សហគមន៍អេកូទេសចរណ៍សម្រស់កោះហាន មានទីតាំងស្ថិតលើដីកោះក្នុងឃុំកោះស្នែង ស្រុកអូរស្វាយសែនជ័យ ខេត្តស្ទឹងត្រែង និងមានចម្ងាយប្រមាណ ២៤ គីឡូម៉ែត្រពីក្រុងស្ទឹងត្រែង។
ចំណុចពិសេសរបស់ដែនកោះនេះគឺ វាស្ថិតនៅតាមដងទន្លេមេគង្គ ដែលជាទន្លេសម្បូរទៅដោយជីវៈចម្រុះជាច្រើនប្រភេទ។ នៅរដូវទឹកស្រកម្ដងៗ ភ្ញៀវទេសចរអាចទៅគយមើលឆ្នេរខ្សាច់សក្បុស ដែលហូរមកតាមទឹកទន្លេមេគង្គ។ អ្នកទេសចរអាចទៅលេងតំបន់អេកូទេសចរណ៍សម្រស់កោះហាននៅរដូវប្រាំង ចន្លោះពីខែ ១២ ទៅដល់ខែ៥។ ប៉ុន្តែក្នុងអំឡុងខែ ១២ ខែ១ និងខែ២ ជារដូវដែលតំបន់នេះបញ្ចេញសម្រស់ស្រស់ស្អាតជាងខែណាៗទាំងអស់៕
Account
Security
Favourite Content