បរទេស៖ យោងតាមប្រភពពី Weforum បានលើកឡើងថា GovTech ឬ ការជំរុញអភិបាលកិច្ច និងបច្ចេកវិទ្យាឌីជីថលត្រូវបានកំណត់ថា ជាទីផ្សារ software ដ៏ធំបំផុតមួយនៅក្នុងពិភពលោក ហើយនឹងមានតម្លៃលើសពី ១ ទ្រីលានដុល្លារនៅឆ្នាំ២០២៨ ។

GovTech គឺជាការអនុវត្តប្រើប្រាស់ឌីជីថល និងបច្ចេកវិទ្យាដែលកំពុងរីកចម្រើនដូចជា បញ្ញាសិប្បនិម្មិត (AI) បច្ចេកវិទ្យាកម្រិតខ្ពស់ Blockchain ដំណើរការទិន្នន័យកម្រិតខ្ពស់ ដើម្បីកែលម្អការផ្តល់សេវាសាធារណៈប្រកបដោយប្រសិទ្ធភាព កាត់បន្ថយការចំណាយ និងការបង្កើតតម្លៃសាធារណៈថ្មីទាំងស្រុង។ គេប៉ាន់ស្មានថា វិស័យថ្មីមួយនេះមានតម្លៃជាង ១ ទ្រីលានដុល្លារនៅឆ្នាំ២០២៨ ហើយមានសារៈសំខាន់ក្នុងការធ្វើឱ្យសេវាសាធារណៈកាន់តែមានប្រសិទ្ធភាព និងអាចប្រើប្រាស់បានសម្រាប់ប្រជាពលរដ្ឋ។ បន្ថែមពីនេះ វានឹងក្លាយជាគន្លឹះនៃសមត្ថភាពរបស់រដ្ឋាភិបាលក្នុងការផ្តល់នូវលទ្ធផល កសាងទំនុកចិត្តនៅក្នុងបរិបទនៃការបង្កើនការប្រកួតប្រជែង និងបំពេញតម្រូវការពីមនុស្ស ដែលធំធាត់ឡើងជាមួយនឹងឌីជីថល។។

ទន្ទឹមនឹងនេះ វេទិកាសេដ្ឋកិច្ចពិភពលោក (Weforum) និង GovTech Campus Deutschland ដែលជាវេទិកាបច្ចេកវិទ្យា និងនវានុវត្តន៍ថ្មីរបស់អាល្លឺម៉ង់ បានប្រកាសអំពីការបង្កើតមជ្ឈមណ្ឌលបច្ចេកវិទ្យារដ្ឋាភិបាលសកលនៅទីក្រុងប៊ែកឡាំង (GGTC Berlin) ។ GGTC នឹងផ្តោតលើការច្នៃប្រឌិតក្នុងវិស័យសាធារណៈ ការផ្លាស់ប្តូរឌីជីថល និងការអនុវត្តបច្ចេកវិទ្យាដែលកំពុងរីកចម្រើននៅក្នុងស្ថាប័នរដ្ឋាភិបាល និងវិស័យសាធារណៈ។ GGTC នឹងដើរតួជាមជ្ឈមណ្ឌលសម្រាប់បណ្តាញ GovTech ដោយប្រើប្រាស់សហគមន៍សកលលោក តាមរយៈការប្រើប្រាស់បទពិសោធន៍ជាតិយ៉ាងទូលំទូលាយពី GovTech Campus Deutschland និង Weforum។ ដើម្បីពន្លឿនការផ្លាស់ប្តូរឌីជីថលរបស់រដ្ឋាភិបាល និងបង្កើតតម្លៃសាធារណៈថ្មី GGTC Berlin នឹងចាប់ផ្តើមគម្រោងសម្រាប់បង្ហាញ និងពង្រីកការអនុវត្តល្អបំផុតទូទាំងពិភពលោក។

លោក Markus Richter ប្រធានក្រុមប្រឹក្សាភិបាលនៃ GovTech Campus Deutschland បានលើកឡើងថា មនុស្សទូទាំងសកលលោកកំពុង​ស្ថិត​នៅ​ក្នុង​យុគសម័យ​រដ្ឋាភិបាលឌីជីថល ហើយឥទ្ធិពលនៃបច្ចេកវិទ្យាមកលើរដ្ឋាភិបាល និងរដ្ឋបាលសាធារណៈមានសក្ដានុពលខ្លាំងជាងរយៈពេលមុនៗផ្សេងទៀតនៅក្នុងប្រវត្តិសាស្ត្រ។ GovTech Campus Deutschland មានមោទនភាពក្នុងការចាប់ដៃគូជាមួយ Weforum ដើម្បីបង្កើតមជ្ឈមណ្ឌល GovTech នៅទូទាំងពិភពលោក ដើម្បីសិក្សារួមគ្នាលើការច្នៃប្រឌិត គំនិត និងបច្ចេកទេស ដែលអាចនឹងត្រូវបានសាកល្បង វាយតម្លៃ និងកែលម្អរួមគ្នា។

GovTech មិនមែនជាបច្ចេកវិទ្យាតែមួយមុខប៉ុណ្ណោះទេ ប៉ុន្តែវាគឺជាកម្មវិធីបច្ចេកវិទ្យាមានលក្ខណៈជាឈុតមួយ ដើម្បីដោះស្រាយបញ្ហាប្រឈមសាធារណៈ។ វារួមបញ្ចូលហេដ្ឋារចនាសម្ព័ន្ធសាធារណៈឌីជីថលដូចជាការទូទាត់ និងការផ្តល់សេវារបស់រដ្ឋាភិបាលក្នុងគ្រាមានវិបត្តិជាដើម។ Doreen Bogdan-Martin អគ្គលេខាធិការនៃសហភាពទូរគមនាគមន៍អន្តរជាតិ (ITU) បានកត់សម្គាល់ថា ការរាតត្បាតគឺជាការដាស់តឿនដល់សារៈសំខាន់នៃ GovTech និងហេដ្ឋារចនាសម្ព័ន្ធសាធារណៈឌីជីថល។ ជាឧទាហរណ៍ Aadhaar ប្រព័ន្ធអត្តសញ្ញាណឌីជីថលរបស់ប្រទេសឥណ្ឌាត្រូវបានសម្របដោយចំនួនប្រជាជនជិត ១០០ ភាគរយ ហើយកម្មវិធី Diia តែមួយគត់របស់អ៊ុយក្រែនត្រូវបានប្រើប្រាស់ដោយប្រជាជនអ៊ុយក្រែនជិត ២០ លាននាក់ ដើម្បីចូលប្រើឯកសារសំខាន់ៗរួមទាំងលិខិតឆ្លងដែនឌីជីថលដំបូងគេបង្អស់ផងដែរ។ បន្ថែមពីនេះ PIX ដែលជាប្រព័ន្ធទូទាត់ឌីជីថលនៅប្រេស៊ីលកំពុងពង្រីកការរួមបញ្ចូលផ្នែកហិរញ្ញវត្ថុ។

ដូច្នោះហើយ កត្តាជំរុញនៃភាពជោគជ័យទាំងនេះគឺការសហការ ឆន្ទៈនយោបាយ និងគំនិតច្នៃប្រឌិតដែលជំរុញដោយតម្លៃ ដើម្បីដើរតួនាទីសំខាន់ៗសម្រាប់ប្រជាពលរដ្ឋ អ្នកអភិវឌ្ឍន៍បច្ចេកវិទ្យា និងរដ្ឋាភិបាលក្នុងការរៀបចំ និងអនុវត្តគំនិតផ្តួចផ្តើមនាពេលអនាគត។ GovTech គឺត្រូវប្រើប្រាស់សម្រាប់បម្រើមនុស្សជាចាំបាច់ និងការយល់ដឹងពីតម្រូវការរបស់ពួកគេ។ ដូច្នេះហើយ អ្នកដឹកនាំ GovTech ចាំបាច់ត្រូវទទួលយកទស្សនៈដែលផ្តោតលើមនុស្ស ជាជាងការគិតដែលផ្តោតលើបច្ចេកវិទ្យា។ លើសពីនេះ GovTech តម្រូវឱ្យរដ្ឋាភិបាលស្តាប់ និងឆ្លើយតបទៅនឹងតម្រូវការរបស់ប្រជាពលរដ្ឋយ៉ាងសកម្មដោយយកចិត្តទុកដាក់ ដើម្បីបង្កើតលទ្ធផលសាធារណៈដែលមានឥទ្ធិពលជាជាងប្រកាន់យកវិធីសាស្រ្តបែបប្រពៃណី។ ដើម្បីទទួលបានជោគជ័យ រដ្ឋាភិបាលត្រូវតែធ្វើការជាមួយអ្នកជំនាញផ្នែកបច្ចេកវិទ្យា និងប្រជាពលរដ្ឋ ដើម្បីធានាថា GovTech អាចប្រើប្រាស់បានដោយភាពឆ្លាតវៃ។

ទន្ទឹមនឹងនេះ GovTech កំពុងដោះស្រាយបញ្ហាប្រឈមដ៏ស្មុគស្មាញ និងទាមទារការគិតប្រកបដោយភាពច្នៃប្រឌិត។ នៅពេលប្រើប្រាស់បច្ចេកវិទ្យាដើម្បីផ្លាស់ប្តូរទំនាក់ទំនងរវាងរដ្ឋាភិបាល និងប្រជាពលរដ្ឋ ដើម្បីងឆ្លើយតបទៅនឹងតម្រូវការសង្គម វាចាំបាច់ត្រូវមានក្របខ័ណ្ឌនៃគុណតម្លៃ និងគោលការណ៍ដែលណែនាំការអភិវឌ្ឍន៍។  ដូច្នេះ ការទទួលបានទេពកោសល្យផ្នែកបច្ចេកវិទ្យាទៅក្នុងរដ្ឋាភិបាល គឺជាអាទិភាពមួយដើម្បីបំពេញបន្ថែម និងលើកកំពស់ការងាររបស់អ្នកបង្កើតគោលនយោបាយ និងមន្ត្រីរាជការដែលមានជំនាញក្នុងដំណើរការរបស់រដ្ឋាភិបាលមានសារៈសំខាន់ក្នុងការផ្តល់សេវាសាធារណៈ។ លើសពីនេះ វាក៏អាចត្រូវបានពង្រឹងតាមរយៈការចែករំលែកចំណេះដឹង និងគំនិតផ្តួចផ្តើមក្នុងសហគមន៍ជាដើម។

ទោះជាយ៉ាងណាក្តី សក្តានុពលដ៏ធំរបស់ GovTech ត្រូវបានរារាំងដោយការបែងចែកឌីជីថលនៅក្នុងប្រទេសអ្នកមាន និងប្រទេសក្រីក្រ។ ការរាតត្បាតបានបង្កើនល្បឿនឌីជីថលទូទាំងពិភពលោកយ៉ាងខ្លាំង ប៉ុន្តែ ៣៣ ភាគរយនៃចំនួនប្រជាជនសកលលោក (២,៦ ពាន់លាននាក់) នៅតែគ្មានអ៊ីនធឺណិត ដោយបង្ហាញពីឧបសគ្គចំពោះលទ្ធភាពទិញឧបករណ៍ កង្វះជំនាញឌីជីថល និងខ្វះលទ្ធភាពទទួលបានហេដ្ឋារចនាសម្ព័ន្ធឌីជីថល។ ជាក់ស្តែង នៅក្នុងសកលលោកខាងត្បូងប្រឈមមុខនឹងកង្វះហេដ្ឋារចនាសម្ព័ន្ធតភ្ជាប់បច្ចេកវិទ្យាដ៏ទំនើបដូចជា 5G fiber AI blockchain និង Internet of Things (IoT) ជាដើម។ ភាពខុសគ្នាទាំងនេះបង្ហាញពីតម្រូវការបន្ទាន់ក្នុងការបង្រួមគម្លាតនៃការបែងចែកឌីជីថល ពីព្រោះវាជាមូលដ្ឋានគ្រឹះសម្រាប់ការបញ្ចូលឌីជីថល និងការច្នៃប្រឌិតរបស់ GovTech។ នៅក្នុងកិច្ចប្រជុំប្រចាំឆ្នាំ គេបានលើកឡើងថា ភាពជាដៃគូបានធ្វើឱ្យជីវិតមនុស្ស ៧៨៤ លាននាក់ប្រសើរឡើងតាមរយៈគំនិតផ្តួចផ្តើមនៃដំណោះស្រាយឌីជីថលចំនួន ៣២០ នៅទូទាំងប្រទេស។ វឌ្ឍនភាពដ៏សំខាន់នេះជំរុញឱ្យផែនការកាន់តែខិតទៅជិតគោលដៅក្នុងការភ្ជាប់ទំនាក់ទំនងមនុស្សរាប់ពាន់លាននាក់នៅឆ្នាំ ២០២៥ ។

ការច្នៃប្រឌិត GovTech ប្រកបដោយជោគជ័យពឹងផ្អែកលើភាពជាអ្នកដឹកនាំជារួម និងការច្នៃប្រឌិតរបស់អ្នកពាក់ព័ន្ធ។ ដើម្បីពង្រឹងសមត្ថភាពឌីជីថលដោយជោគជ័យ រដ្ឋាភិបាលគួរបង្កើតរចនាសម្ព័ន្ធសហការប្រកបដោយប្រសិទ្ធភាពក្នុងការសម្រេចបានលទ្ធផលច្បាស់លាស់។ លើសពីនេះ GovTech ទាមទារឱ្យមានផ្នត់គំនិតសហគ្រិនដែលប្រមូលផ្តុំនូវជំនាញចម្រុះ ដោយទាញយកការយល់ដឹងពីអ្នកបង្កើតគោលនយោបាយ អ្នកសិក្សា អ្នកអភិវឌ្ឍន៍ និងប្រជាពលរដ្ឋ។ ស្របពេនេះដែរ GovTech នឹងបន្តរីកចម្រើនជាប្រធានបទយុទ្ធសាស្រ្តដ៏សំខាន់ចំពោះ Weforum និងបណ្តាអ្នកដឹកនាំពិភពលោក ដោយសារបច្ចេកវិទ្យាដែលកំពុងរីកចម្រើនដូចជា AI និង blockchain អាចផ្លាស់ប្តូរសក្តានុពលនៃការផ្តល់សេវាសាធារណៈ។ ទន្ទឹមនឹងនេះ ការផ្តោតសំខាន់សុវត្ថិភាពអ៊ីនធឺណិត និងឯកជនភាពទិន្នន័យនឹងមានសារៈសំខាន់ក្នុងការធានាថា GovTech អាចផ្តល់នូវលទ្ធផលសាធារណៈដែលមានប្រយោជន៍ និងបិទការបែងចែកឌីជីថល។ គោលបំណងរបស់ GovTech គឺការកែទម្រង់រដ្ឋាភិបាលសម្រាប់យុគសម័យឌីជីថល ពន្លឿនការរួមបញ្ចូលឌីជីថល និងបដិវត្តន៍ការផ្តល់សេវាកម្ម។ នៅពេលដែលរដ្ឋាភិបាលជួបប្រទះនឹងបញ្ហាប្រឈមដែលមិនធ្លាប់មានពីមុនមក ការពង្រឹងសមត្ថភាពរបស់ពួកគេក្នុងការចែកចាយព័ត៌មានចំណោះដឹង គឺជារឿងសំខាន់ក្នុងការកសាងទំនុកចិត្តរវាងប្រជាពលរដ្ឋ និងរដ្ឋាភិបាល៕