សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ឯកឧត្តម ឌិត ទីណា បានផ្តួចផ្តើមគំនិតកសាងអគារមន្ទីរពិសោធន៍ជាតិដ៏ធំ និងទំនើបមួយ ដែលគ្រោងនឹងចំណាយថវិកា៣០ លានដុល្លារ ខណៈបច្ចុប្បន្ន ក្រសួងបានចាប់ផ្តើមកៀរគរជំនួយពីដៃគូអភិវឌ្ឍន៍នានា ដើម្បីសម្រេចគោលដៅសាងសង់អគារឱ្យបានរួចរាល់ក្នុងឆ្នាំ២០២៦ខាងមុខ។
នៅក្នុងជំនួបជាមួយមន្ត្រីធនាគារអភិវឌ្ឍន៍អាស៊ី (ADB) កាលពីពេលថ្មីៗនេះ ឯកឧត្តម ឌិត ទីណា បានសម្តែងនូវសេចក្តីរីករាយ ស្វាគមន៍រាល់កម្មវិធីវិនិយោគ និងគម្រោងអភិវឌ្ឍន៍ដែលផ្តល់ប្រយោជន៍ និងលើកកម្ពស់ជីវភាពប្រជាកសិករឱ្យមានភាពប្រសើរ ដើម្បីកម្ពុជាសម្រេចបាននូវគោលដៅក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ខាងមុខ។
ឯកឧត្តម ឌិត ទីណា បានគូសបញ្ជាក់ថា ៖
« ការងារមន្ទីរពិសោធន៍ជាតិ គឺជាផ្នែកចាំបាច់មួយ ក្នុងការត្រួតពិនិត្យផលិតផលកសិកម្ម ដើម្បីធានាឱ្យបាននូវសុវត្ថិភាពចំណីអាហារ និងការគ្រប់គ្រងនូវជំងឺឆ្លងផ្សេងៗ។ វាមានសារសំខាន់ និងជាជំហានដែលត្រូវចាប់ផ្តើម ក្នុងការកសាងហេដ្ឋារចនាសម្ព័ន្ធ អគារពិសោធន៍ ដែលតម្រូវឱ្យមានការកៀរគរលទ្ធភាព ដើម្បីសម្រេចការងារនេះ ហើយក្រសួងស្វាគមន៍នូវរាល់ដៃគូរអភិវឌ្ឍន៍ ដែលចង់ចូលរួមលើការកសាងអគារនេះ»។
ចំពោះគម្រោង One Health ឯកឧត្តមរដ្ឋមន្ត្រី បានណែនាំឱ្យមានការពិនិត្យ និងយកចិត្តទុកដាក់លើច្បាប់ គោលនយោបាយ និងគោលការណ៍ណែនាំនានាឱ្យបានច្បាស់លាស់ ត្រូវមានភាពម្ចាស់ការ ព្រមទាំងសិក្សាពីតម្រូវការក្រុមគោលដៅ ដើម្បីប្រើប្រាស់ថវិកាចំទិសដៅ មានប្រសិទ្ធភាពការងារ និងផ្ដល់ផលប្រយោជន៍ពិតដល់កសិករបង្កើនចំណូល មានចំណេញ មានប្រសិទ្ធភាព និងនិរន្តរភាពសេដ្ឋកិច្ចពិតប្រាកដ និងត្រូវឱ្យមានការចូលរួម និងសហការគ្នាល្អ ប្រកបដោយទំនួលខុសត្រូវខ្ពស់ ដើម្បីការងារសម្រេចបានជោគជ័យល្អប្រសើរ។
អ្នកនាំពាក្យក្រសួងកសិកម្ម លោកជំទាវ អ៊ឹម រចនា បានឱ្យដឹង ចំពោះគម្រោងកសាងមន្ទីរពិសោធន៍ថ្នាក់ជាតិនេះ ជាការផ្តួចផ្តើមគំនិតដោយផ្ទាល់ពីរដ្ឋមន្រ្តីក្រសួងកសិកម្ម បន្ទាប់ពីឯកឧត្តម បានចុះទៅពិនិត្យមើលនៅតាមអគ្គនាយកដ្ឋានសំខាន់ៗ និងឃើញស្ថាប័ននីមួយៗមានមន្ទីរពិសោធន៍រៀងខ្លួន ទើបលោកក៏មានបំណងរៀបចំឱ្យមានជា មន្ទីរពិសោធន៍ថ្នាក់ជាតិមួយដែលមានលក្ខណៈស្តង់ដារ ដើម្បីប្រមូលផ្តុំមន្ទីរពិសោធន៍ទាំងនោះ។
លោកជំទាវ អ៊ឹម រចនា បានបញ្ជាក់ថា ៖
«ការរៀបចំមន្ទីរពិសោធន៍ថ្នាក់ជាតិនេះ នឹងជួយច្រើន ក្នុងការកាត់បន្ថយការចំណាយផ្សេងៗពាក់ព័ន្ធនឹងការប្រើប្រាស់ឧបករណ៍ពិសោធន៍ ដែលជាទូទៅមានតម្លៃថ្លៃ ដែលជាគោលដៅមួយ។ ទីពីរ នៅពេលដែលយើងប្រមូលផ្តុំមន្ទីរពិសោធន៍ មកដាក់នៅកន្លែងតែមួយ អ្នកវិទ្យាសាស្រ្ត ក៏ដូចជាអ្នកជំនាញ អាចសិក្សារៀនសូត្រ ចែករំលែកបទពិសោធន៍ ដើម្បីពង្រឹងសមត្ថភាពគ្នាទៅវិញទៅមក»។
លោកជំទាវ អ៊ឹម រចនា បានឱ្យដឹងថា អគារមន្ទីរពិសោធន៍ជាតិដ៏ធំ និងទំនើបនេះ គ្រោងនឹងសាងសង់នៅលើផ្ទៃដីពីរហិកតា ស្ថិតនៅសង្កាត់សិត្បូរ ក្រុងតាខ្មៅខេត្តកណ្តាល ដោយក្រសួងកសិកម្ម រំពឹងថា មន្ទីរពិសោធន៍ថ្នាក់ជាតិនេះ នឹងក្លាយជាមន្ទីរពិសោធន៍ស្តង់ដារមួយ សាងសង់តាមលក្ខណៈបច្ចេកទេសត្រឹមត្រូវ ដែលមានការធានានូវសុវត្ថិភាព ទាំងអ្នកដែលបម្រើការងារនៅទីនេះផ្ទាល់ និងគិតគូរដល់សុវត្ថិភាពប្រជាពលរដ្ឋរស់នៅជុំវិញតំបន់នោះដែរ។
លោក ថោង រ៉ា អ្នកជំនាញសុវត្ថិភាពចំណីអាហារថ្នាក់ជាតិនៃអង្គការយូនីដូ បានបញ្ជាក់ថា ក្រសួងកសិកម្មក៏ធ្លាប់បានពិភាក្សាជាមួយយូនីដូដែរ លើបញ្ហានេះ ដោយក្រសួងមានគម្រោងនឹងដាក់ឈ្មោះ មន្ទីរពិសោធន៍ថ្នាក់ជាតិនេះថា (Central Lab ) Food Safety Lab ដែលការបង្កើតមន្ទីរពិសោធន៍នេះមានសារៈសំខាន់ណាស់ ក្នុងការលើកកម្ពស់សុវត្ថិភាពចំណីអាហារនៅក្នុងស្រុក និងសម្រាប់នាំចេញ។ លោកគាំទ្រ ចំពោះការសាងសង់មន្ទីរពិសោធន៍ថ្នាក់ជាតិនេះ ហើយអង្គការយូនីដូ មានគម្រោងនឹងផ្តល់ជំនួយលើផ្នែកបច្ចេកទេស ដល់ក្រសួងកសិកម្ម ក្នុងការរៀបចំមន្ទីរពិសោធន៍ដ៏ធំ និងទំនើបមួយនេះ(Central Lab)៕
Account
Security
Favourite Content