បរទេស ៖ យោងតាមប្រភពព័ត៌មានពីបរទេសបានរាយការណ៍ថា តម្លៃប្រេងឆៅបានបន្តឡើងថ្លៃ ខណៈដែលមានការរំពឹងទុកថា ទីផ្សារប្រេងនឹងរឹតបន្តឹងបន្ថែមទៀតនៅក្នុងប៉ុន្មានខែខាងមុខនេះ និងអាចមានការ​ធ្លាក់​ចុះ​តម្លៃប្រាក់​ដុល្លារ​នៅ​ក្នុង​សប្តាហ៍​នេះ។

នៅក្នុងសប្ដាហ៍នេះ តម្លៃប្រេងឆៅម៉ាក Brent ឡើងថ្លៃ ០,២ ភាគរយ ឬ ៨៧,៥៥ ដុល្លារក្នុងមួយបារ៉ែល ខណៈដែលតម្លៃប្រេងឆៅម៉ាក West Texas Intermediate (WTI) ឡើងថ្លៃ ០,១ ភាគរយ ឬ ៨៤,០៦ ដុល្លារក្នុងមួយបារ៉ែល។ តម្លៃប្រេងកើនឡើងនៅសប្តាហ៍នេះ ដោយសារតម្រូវការប្រេងឆៅកើនឡើងក្នុងកំឡុងរដូវក្តៅដែលនឹងមានការធ្វើដំណើរខ្លាំង ខណៈដែលស្តុកប្រេងឆៅរបស់សហរដ្ឋអាមេរិកធ្លាក់ចុះច្រើនជាងការរំពឹងទុក។ រដ្ឋបាលព័ត៌មានថាមពលរបស់សហរដ្ឋអាមេរិក (EIA) បានរាយការណ៍ពីចំនួនប្រេងឆៅ ១២,២ លានបារ៉ែលត្រូវបានទាញចេញពីស្តុកដែលលើសពីការរំពឹងទុក។ លើសពីនេះ ធនាគារស្វីស UBS ព្យាករណ៍ថា តម្លៃប្រេងឆៅ Brent នឹងឡើងថ្លៃដល់ ៩០ ដុល្លារក្នុងមួយបារ៉ែលក្នុងត្រីមាសនេះ ដោយលើកឡើងពីការកាត់បន្ថយផលិតកម្ម OPEC + និងបានព្យាករណ៍ពីការធ្លាក់ចុះនៃស្តុកប្រេង។

តម្លៃប្រេងឆៅបានឡើងថ្លៃក្នុងល្បឿនយឺតចាប់តាំងពីខែមិថុនា ដោយសារតែទស្សនវិស័យវិជ្ជមានសម្រាប់តម្រូវការក្នុងរដូវក្តៅ ដែលជាសញ្ញានៃការកើនឡើងនៃការប្រើប្រាស់។ យ៉ាងណាមិញ តម្រូវការធ្លាក់ចុះនៅក្នុងតំបន់អាស៊ីបានធ្វើឱ្យក្រុមហ៊ុនប្រេង Saudi Aramco របស់អារ៉ាប៊ីសាអូឌីតកាត់បន្ថយតម្លៃប្រេងឆៅរបស់ខ្លួនទៅកាន់អាស៊ី។ ការនាំចេញប្រេងសរុបរបស់អារ៉ាប៊ីសាអូឌីតទៅកាន់ទ្វីបអាស៊ីមានចំណែកប្រហែល ៨០ ភាគរយនៃការនាំចេញប្រេងសរុប។

ឥឡូវនេះ ពាណិជ្ជករ បាន និងកំពុងតាមដានមើលទិន្នន័យការងារនៅសហរដ្ឋអាមេរិក ដើម្បីព្យាករណ៍ពីទស្សនវិស័យសម្រាប់គោលនយោបាយរូបិយវត្ថុ។ យ៉ាងណាមិញ ប្រាក់ដុល្លារអាម៉េរិកបានធ្លាក់ចុះក្នុងសប្តាហ៍នេះ ដែលធ្វើឱ្យទំនិញមានតម្លៃថោកសម្រាប់អ្នកវិនិយោគអន្តរជាតិ។ មិនត្រឹមតែប៉ុណ្ណោះ ហានិភ័យភូមិសាស្ត្រនយោបាយក៏សំខាន់ផងដែរ រួមមានការបោះឆ្នោតនៅប្រទេសបារាំង និងការព្រួយបារម្ភលើការអនុវត្តរបស់ប្រធានាធិបតីអាមេរិក Joe Biden នៅក្នុងការជជែកដេញដោលជាមួយនឹងអតីតប្រធានាធិបតី Donald Trump ។  បន្ថែមពីនេះ ស្ថានការណ៍នៅមជ្ឈិមបូព៌ានៅតែមិនច្បាស់លាស់ ដោយសារកិច្ចចរចាបទឈប់បាញ់រវាងក្រុមហាម៉ាស និងអ៊ីស្រាអែល ខណៈដែលជម្លោះកាន់តែអាក្រក់ជាមួយក្រុមហេសបូឡាដែលគាំទ្រដោយអ៊ីរ៉ង់។

លោក Martin King អ្នកវិភាគមកពី RBN Energy បាននិយាយថា ពាណិជ្ជករកំពុងតាមដានសង្រ្គាមនៅតំបន់ហ្គាហ្សា និងការបោះឆ្នោតនៅប្រទេសបារាំង និងចក្រភពអង់គ្លេសផងដែរ។ ពាណិជ្ជកម្មមានភាពស្ងប់ស្ងាត់ ប៉ុន្តែមនុស្សកំពុងតាមដានមើលស្ថានភាពភូមិសាស្ត្រនយោបាយ។ លើសពីនេះ ការបញ្ជាទិញរបស់ឧស្សាហកម្មអាល្លឺម៉ង់បានធ្លាក់ចុះដោយមិននឹកស្មានដល់ក្នុងខែឧសភា ដោយបន្ថែមសញ្ញាថាការងើបឡើងវិញសម្រាប់សេដ្ឋកិច្ចធំបំផុតរបស់អឺរ៉ុបនៅតែស្រពិចស្រពិល។  កាលពីថ្ងៃព្រហស្បតិ៍ ក្រុមហ៊ុនផលិតប្រេងរបស់រុស្ស៊ី Rosneft លើកឡើងពីគោលបំណងអាចនឹងកាត់បន្ថយការនាំចេញប្រេងពីកំពង់ផែសមុទ្រខ្មៅនៃ Novorossiisk ក្នុងខែកក្កដានេះ៕