ភ្នំពេញ៖ កម្ពុជា និងជប៉ុន បានសហការគ្នាជំរុញកិច្ចអភិវឌ្ឍធនធានមនុស្សផ្នែកបច្ចេកវិទ្យាទូរគមនាគមន៍ និងឌីជីថលនៅកម្ពុជា តាមរយៈការធ្វើសិក្ខាសាលារួមគ្នាដើម្បីចែករំលែកបទពិសោធន៍ ចំណេះដឹងពីវាគ្មិនជប៉ុន និងកម្ពុជា ផ្តោតទៅលើសក្តានុពលនៃបច្ចេកវិទ្យា កិច្ចការពារពីការគំរាមកំហែងតាមប្រព័ន្ធសាយប៊័រ សន្តិសុខតាមប្រព័ន្ធអ៊ីនធឺណិត និងការអភិវឌ្ឍវិស័យទូរគមនាគមន៍។

សិក្ខាសាលាស្ដីពីបច្ចេកវិទ្យាឌីជីថល និងសន្តិសុខអ៊ីនធើណិត( Emerging Digital Technology and Cybersecurity )សហការរៀបចំដោយក្រសួងកិច្ចការផ្ទៃក្នុង និងទំនាក់ទំនងនៃប្រទេសជប៉ុន ,បណ្ឌិត្យសភាបច្ចេកវិទ្យាឌីជីថលកម្ពុជា (CADT) នៃក្រសួងប្រៃសណីយ៍ និងទូរគមនាគមន៍ ក្រោមការផ្តល់វត្តមាន និងអញ្ជើញជាអធិបតីក្នុងពិធីបើកសិក្ខាសាលាពីសំណាក់ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍។

សិក្ខាសាលានេះរៀបចំឡើងក្នុងគោលបំណងចែករំលែក និងពង្រឹងការអភិវឌ្ឍធនធានមនុស្សផ្នែកបច្ចេកវិទ្យាទូរគមនាគមន៍ និងឌីជីថលនៅកម្ពុជា តាមរយៈការចាប់យកបច្ចេកវិទ្យាឌីជីថលថ្មី។ ប្រធានបទសំខាន់ៗត្រូវបានធ្វើឡើងដោយអ្នកជំនាញមកពីក្រសួងទាំងពីរ និងតំណាងទីភ្នាក់ងារសហប្រតិបត្តិការអន្តរជាតិជប៉ុន (JICA)។

សិក្ខាសាលាក៏បានផ្តោតទៅលើទិដ្ឋភាពនៃការគំរាមកំហែងតាមប្រព័ន្ធសាយប័រ និងតួអង្គការពារសាយប័រ, សក្តានុពលនៃបច្ចេកវិទ្យា Open RAN ក្នុងការអភិវឌ្ឍវិស័យទូរគមនាគមន៍នៅកម្ពុជា ក្រោមការចូលរួមចំណែកនៃគំនិតផ្តួចផ្តើមរបស់ JICA ក្នុងការអភិវឌ្ឍ និងសន្តិសុខតាមអ៊ីនធឺណិតនៅកម្ពុជា។

នៅក្នុងសិក្ខាសាលានេះ លោកស្រី MATSUBARA Mihoko ប្រធានអ្នកយុទ្ធសាស្ត្រផ្នែកសន្តិសុខសាយប៊័រ នៃសាជីវកម្មNTT ប្រទេសជប៉ុន បានចែករំលែកចំណេះដឹងអំពីការគំរាមកំហែង និងការការពារតាមប្រព័ន្ធសាយប៊័រ។

លោកស្រីបានលើកឡើងថា៖ កិច្ចការពារទៅលើការវាយប្រហារមានសារៈសំខាន់ណាស់ ។ បើតាមក្រសួងប្រៃសណីយ៍ និងទូរគមនាគមន៍កម្ពុជាបានរាយការណ៍ថា ការវាយប្រហារតាមអ៊ីនធឺណិតបានកើនឡើង ២៨% នៅក្នុងប្រទេសកម្ពុជាកាលពីឆ្នាំមុន ហើយឧក្រិដ្ឋកម្មតាមអ៊ីនធឺណិតដូចជា Phising និងការហ៊ែកគេហទំព័រ ព្រមទាំងចារកម្មតាមអ៊ីនធឺណិត បានគំរាមកំហែងដល់សេដ្ឋកិច្ចរបស់ប្រទេសនិងសន្តិសុខជាតិ។ ដោយសារប្រទេសកម្ពុជាពឹងផ្អែកកាន់តែខ្លាំងឡើងលើផ្នែកឌីជីថល រួមទាំងពាណិជ្ជកម្មអេឡិចត្រូនិក បច្ចេកវិទ្យាព័ត៌មាន វាបានក្លាយជាហេដ្ឋារចនាសម្ព័ន្ធស្នូលនៃសេដ្ឋកិច្ច និងសន្តិសុខជាតិ។

លោកបណ្ឌិត ABETA Sadayuki នាយកផ្នែកបច្ចេកវិទ្យានៃសាជីវកម្ម OREX SAI បានធ្វើបទបង្ហាញស្តីពីសក្តានុពលនៃបច្ចេកវិទ្យា Open RAN ។

លោកបណ្ឌិតបានមានប្រសាសន៍ថា៖ ការធ្វើឌីជីថលនីយកម្មមានសារៈសំខាន់ចំពោះការអភិវឌ្ឍន៍នាពេលអនាគតរបស់កម្ពុជា ហើយវាមានសារៈសំខាន់ណាស់ក្នុងការកសាងបណ្តាញ និងហេដ្ឋារចនាសម្ព័ន្ធដ៏រឹងមាំ និងអាចទុកចិត្តបាន ។

ចំណែក លោក KUMAGAI Takahiro អ្នកសម្របសម្រួលគម្រោងនៃទីភ្នាក់ងារកិច្ចសហប្រតិបត្តិការអន្តរជាតិជប៉ុន( JICA) បាននិយាយអំពីការផ្តួចផ្តើមគំនិតរបស់ JICA លើវិស័យឌីជីថលសម្រាប់ការអភិវឌ្ឍ និងសន្តិសុខអ៊ីនធើណិតក្នុងប្រទេសកម្ពុជា។

លោកបានលើកឡើងថា ៖ ឌីជីថលភាវូបនីយកម្មនៃសេដ្ឋកិច្ចពិភពលោកកំពុងបង្កើនល្បឿនយ៉ាងឆាប់រហ័ស។ ការប្រើប្រាស់ទិន្នន័យ និងបច្ចេកវិទ្យាឌីជីថលកំពុងក្លាយជាផ្នែកសំខាន់នៃសកម្មភាពសេដ្ឋកិច្ចសង្គមហើយ “ឌីជីថលសម្រាប់ការអភិវឌ្ឍន៍” ឥឡូវនេះគឺជារបៀបវារៈដ៏សំខាន់មួយផ្តល់អំណាចដល់ប្រទេសមួយដើម្បីលើកកម្ពស់ឌីជីថលភាវូបនីយកម្ម ដើម្បីធ្វើឱ្យសេដ្ឋកិច្ចល្អប្រសើរឡើង លើកកំពស់សុខុមាលភាព និងបង្កើតបណ្តាញអ៊ីនធឺណិតប្រកបដោយសុវត្ថិភាព។

ដោយឡែក វាគ្មិនពីកម្ពុជា អ្នកស្រី ជាតិ មរកត នាយិការងនៃនាយកដ្ឋានអ្នកស្រាវជ្រាវ និងសាស្ត្រាចារ្យនៃបណ្ឌិត្យសភាបច្ចេកវិទ្យាឌីជីថលកម្ពុជា បានចែករំលែកប្រធានបទស្តីពីការអភិវឌ្ឍវិស័យទូរគមនាគមន៍ក្នុងប្រទេសកម្ពុជា។

អ្នកស្រីបានមានប្រសាសន៍ថា ៖ ទូរគមនាគមន៍ដើរតួនាទីយ៉ាងសំខាន់ក្នុងការអភិវឌ្ឍកម្ពុជាក៏ដូចជាពិភពលោក ជំរុញការតភ្ជាប់ឌីជីថលនិងកំណើនសេដ្ឋកិច្ច។រដ្ឋាភិបាល ស្ថាប័ននិយតកម្ម និងប្រតិបត្តិករ ក្នុងប្រទេសកម្ពុជា បាន និងកំពុងខិតខំប្រឹងប្រែងយ៉ាងខ្លាំងដើម្បីអភិវឌ្ឍហេដ្ឋារចនាសម្ព័ន្ធឌីជីថល និងធនធានមនុស្សវិស័យនេះ៕