សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការអាកាសយានដ្ឋានអន្តរជាតិសៀមរាបអង្គរកាលពីពេលថ្មីៗកន្លងទៅថ្មីនេះថា ទោះបីពិភពលោកកំពុងជួបបញ្ហាវិបត្តិថាមពលក៏ដោយ ប៉ុន្តែកម្ពុជានៅតែមានលទ្ធភាពរក្សាបានលំនឹងតម្លៃជូនប្រជាពលរដ្ឋ ដែលនេះជាការខិតខំប្រឹងប្រែងរបស់រាជរដ្ឋាភិបាលក្នុងការជួយដល់ប្រជាពលរដ្ឋ និងវិស័យឯកជន​ដែលកំពុងវិនិយោគនៅកម្ពុជា។

នៅក្នុងឱកាសនោះ សម្តេចធិបតី ហ៊ុន ម៉ាណែត ក៏បានលើកឡើងទាក់ទងនឹងវិស័យរ៉ែ និងថាមពល ក្នុងកម្មវិធី “វេទិការាជរដ្ឋាភិបាល និងផ្នែកឯកជនលើកទី១៩” ថា ពាក់ព័ន្ធនឹងតម្លៃ រាជរដ្ឋាភិបាលតែងតែខិតខំបញ្ចុះថ្លៃអគ្គិសនីឱ្យអស់លទ្ធភាពដើម្បីកាត់បន្ថយថ្លៃដើមផលិតកម្ម ព្រមទាំងសម្រួលដល់ជីវភាពរស់នៅរបស់ប្រជាពលរដ្ឋ។

សម្តេចធិបតី បានបញ្ជាក់ថា ទោះជាយ៉ាងនេះក្តី ក៏លទ្ធភាពនៃការបញ្ចុះតម្លៃអគ្គិសនី អាស្រ័យទៅតាមស្ថានភាពនិរន្តរភាពនៃអាជីវកម្ម និងស្ថិរភាពនៃការផ្គត់ផ្គង់ ដែលត្រូវមានការសិក្សាយ៉ាងច្បាស់លាស់ និងគ្រប់ជ្រុងជ្រោយ​។ នៅក្នុងស្ថានភាពដ៏លំបាកដោយសារវិបត្តិជំងឺកូវីដ-១៩ និងនយោបាយសកលលោក ដែលបានធ្វើឱ្យកើតមានវិបត្តិថាមពលនៃការឡើងថ្លៃប្រេងឥន្ធនៈប្រទេសជាច្រើន រួមទាំងប្រទេសជិតខាងកម្ពុជា បានឡើងថ្លៃអគ្គិសនីជាបន្តបន្ទាប់ ដើម្បីទប់ទល់ការខាតបង់អាជីវកម្ម ។

សម្តេចធិបតី ហ៊ុន ម៉ាណែត បានគូសបញ្ជាក់ថា សម្រាប់កម្ពុជារាជរដ្ឋាភិបាល បាន និងកំពុងខិតខំទប់តម្លៃអគ្គិសនី​មិនឱ្យឡើងថ្លៃ រក្សាតម្លៃសំដៅជួយដល់អ្នកប្រើប្រាស់អគ្គិសនី និងអ្នកវិនិយោគទាំងអស់។ កត្តាខាងលើនេះដើម្បីជារួមចំណែកជំរុញសេដ្ឋកិច្ចជាតិ ហើយរាជរដ្ឋាភិបាលក៏បានណែនាំដល់អគ្គិសនីកម្ពុជា ពិនិត្យលទ្ធភាពផ្ដល់តម្លៃអនុគ្រោះជូនអតិថិជន ឧស្សាហកម្ម និងកសិកម្ម ចំពោះបរិ​មាណថាមពលប្រើលើស ជាការលើកទឹកចិត្តដល់អ្នកវិនិយោគឱ្យ​បង្កើន​ការផលិត និងបង្កើនការងារបន្ថែម។

សម្តេចធិបតី ហ៊ុន ម៉ាណែត បានមានប្រសាសន៍ថា ៖

« អគ្គិសនីកម្ពុជាឆ្នាំនេះ បើទោះបីជាវិបត្តិថាមពលនៅលើពិភពលោក ដែលតម្រូវឱ្យប្រទេសជាច្រើននៅក្នុងតំបន់ និងលើពិភពលោកត្រូវដំឡើងថ្លៃអគ្គិសនីប្រើប្រាស់ដល់ប្រជាពលរដ្ឋ ធ្វើឱ្យមានការលំបាក និងប៉ះពាល់ជីវភាពរស់នៅរបស់ប្រជាពលរដ្ឋនៅតាមបណ្ដាប្រ​ទេ​ស​មួយចំនួនលើពិភពលោក ។ តែកម្ពុជាឆ្នាំនេះមានលទ្ធភាពក្នុងការថែរក្សាលំនឹងតម្លៃភ្លើង ទោះបីជារដ្ឋខាតបង់មួយចំនួនក៏ដោយ ប៉ុន្តែយើងបានខិតខំធ្វើយ៉ាងណាឱ្យថ្លៃអគ្គិសនីនៅតែថែរក្សាបានភាពថេរពេញមួយឆ្នាំ ដែលនេះគឺជាការខិតខំប្រឹងប្រែងរបស់រាជរដ្ឋាភិបាល» ។

ថ្លែងក្នុងវេទិកាពិភាក្សាសារព័ត៌មានលើប្រធានបទ «គោលនយោបាយរ៉ែ និងថាមពលនៅកម្ពុជា» ថ្ងៃទី២១ ខែវិច្ឆិកា ឆ្នាំ២០២៣ នៅសណ្ឋាសុខាភ្នំពេញ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានថ្លែងបញ្ជាក់ថា ជិត៩០ថ្ងៃនៃការឡើងកាន់តំណែងជានាយករដ្ឋមន្ត្រី សម្តេចធិបតី ហ៊ុន ម៉ាណែត បានប្រឹងទាំងយប់ទាំងថ្ងៃ ដើម្បីបំពេញតាមការសន្យា និងបានធ្វើលើសថែមទៀត ព្រោះការសន្យាថាទប់ឱ្យនឹង ប៉ុន្តែមិនត្រឹមទប់ឱ្យនឹងទេ ថែមទាំងមានការបញ្ចុះថ្លៃជាបន្តបន្ទាប់ក្នុងស្ថានភាពដែលពិបាក។ តម្លៃថាមពលកំពុងតែកើននៅទូទាំងពិភពលោក ប៉ុន្តែជាការប្តេជ្ញារបស់សម្តេចធិបតី ក្នុងការរក្សាតម្លៃអគ្គិសនីឱ្យនៅថ្លៃដដែល និងបន្តចុះដើម្បីជួយដល់សេដ្ឋកិច្ច។

ឯកឧត្តមរដ្ឋមន្ត្រី បានឱ្យដឹងដែរថា សម្រាប់តម្លៃអគ្គិសនី ដែលកំពុងអនុវត្តន៍ ចំពោះលំនៅឋានចាប់ពីឆ្នាំ២០២០ មកដល់បច្ចុប្បន្នរួមមាន៖ តម្លៃ ៧៣០រៀលក្នុង១គីឡូវ៉ាត់ម៉ោង (ប្រើលើសពី ២០០គីឡូវ៉ាត់ម៉ោងក្នុង១ខែ )។ តម្លៃ ៦១០រៀល(ប្រើចាប់ពី៥១ ដល់២០០គីឡូវ៉ាត់ម៉ោងក្នុង១ខែ),តម្លៃ ៤៨០រៀលក្នុង១គីឡូវ៉ាត់ម៉ោង(ប្រើចាប់ពី១១ ដល់៥០គីឡូវ៉ាត់ម៉ោងក្នុង១ខែ) និងតម្លៃ ៣៨០រៀលក្នុង១គីឡូវ៉ាត់ម៉ោង (ប្រើមិនលើសពី ១០គីឡូវ៉ាត់ម៉ោងក្នុង១ខែ)។

ឯកឧត្តម រដ្ឋមន្ត្រី ក៏បានគូសបញ្ជាក់ថា ជាមោទនភាពសំខាន់មួយដែលពីមុនថាមពលរបស់យើង គឺយើងប្រើភ្លើងចេញពីមានប្រេងខ្មៅ ឥឡូវបណ្ដាញថាមពលជាតិរបស់យើងមានប្រមាណ៦២% យកចេញពីថាមពលស្អាតក្នុងប្រទេសរបស់យើងជាង ៤០% ជាថាមពលស្អាតធម្មជាតិ អត់មានផ្សែង និងជាថាមពលកកើតឡើងវិញ។ រីឯថាមពលពន្លឺព្រះអាទិត្យជាង ១០% ជាមួយនឹងការនាំចូលពីថាមពលអគ្គិសនី ពីប្រទេសឡាវ និងវៀតណាម។

ឯកឧត្តម កែវ រតនៈ បានបញ្ជាក់ថា ថាមពលស្អាតប្រមាណ ៦២% នេះមានអត្ថន័យ ក្នុងផែនការអាស៊ាន១០ បានដាក់ ផែនការថា អាស៊ានជាមធ្យមត្រូវប្រើថាមពលស្អាត ថាមពលកកើតឡើងវិញ ឱ្យបាន ៣៥% ក្នុងឆ្នាំ២០៣០ ។ តែសម្រាប់កម្ពុជាឆ្នាំ២០២២នេះ មានថាមពលស្អាតជាង ៦០% មានន័យថាយើងបានធ្វើលើសមធ្យមភាគអាស៊ាននៃផែនការឆ្នាំ២០៣០  ជិតពាក់កណ្ដាលរួចទៅហើយ សម្រាប់ផែនការ ៣៥% ឆ្នាំ២០៣០ របស់អាស៊ាន ដែលកម្ពុជាមានគោលដៅធ្វើពិពិធកម្មប្រភពថាមពលក្នុងអាណត្តិទី៧ នេះ៕