សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ គិតត្រឹមដំណាច់ឆ្នាំ២០២៣ ធនាគារសហគ្រាសធុនតូច និងមធ្យមកម្ពុជា (SME Bank) បានចូលរួមផ្តល់ហិរញ្ញប្បទានដល់អាជីវកម្មគោលដៅចំនួន ៣ ៤០០ សហគ្រាស ក្នុងទំហំទឹកប្រាក់សរុបប្រមាណ ៥០០ លានដុល្លារ អាម៉េរិក។ នេះបើតាមរបាយការណ៍ SME Bank ដែលទើបចេញផ្សាយក្នុងសប្តាហ៍នេះ។
ការផ្តល់កម្ចីគឺធ្វើឡើងតាមរយៈយន្តការចំនួន២ គឺគម្រោងហិរញ្ញប្បទានដោយផ្ទាល់ និងគម្រោងសហហិរញ្ញប្បទានដែលសហការអនុវត្តជាមួយគ្រឹះស្ថានហិរញ្ញវត្ថុចូលរួម ក្នុងនោះការផ្តល់ឥណទានដោយផ្ទាល់ពីធនាគារត្រង់ទៅអតិថិជនមានចំនួនប្រមាណ ៨៦លានដុល្លារអាម៉េរិក។
របាយការណ៍ដដែលនេះបានឱ្យដឹងថា៖ គិតត្រឹមឆ្នាំ២០២៣ ធនាគារបានចូលរួមផ្តល់ឥណទានតាមរយៈ យន្តការឥណទានដោយផ្ទាល់ទៅដល់អាជីវកម្មគោលដៅ ចំនួន ៣៦៥ សហគ្រាស ស្មើនឹងទំហំទឹកប្រាក់សរុបប្រមាណ ៨៦,១៥ លានដុល្លារអាម៉េរិក កើនឡើងប្រមាណ ៦០% ធៀបនឹងឆ្នាំ២០២២ ខណៈការផ្តល់ឥណទានតាមរយៈគម្រោងសហហិរញ្ញប្បទាន ដោយគ្រឹះស្ថានហិរញ្ញវត្ថុចូលរួមបានផ្តល់ការគាំទ្រដល់សហគ្រាសសរុបចំនួន ៣ ០៩៥ ស្មើនឹងទំហំទឹកប្រាក់សរុបប្រមាណជា ៣៩៤ លានដុល្លារអាម៉េរិក។
របាយការណ៍ដដែលបានឱ្យដឹងទៀតថា៖ ឆ្លងកាត់ប្រតិបត្តិការប៉ុន្មានឆ្នាំចុងក្រោយនេះសង្កេតឃើញថា បញ្ហាប្រឈមរបស់សហគ្រាសធុនតូច និងមធ្យម នៅមានច្រើន ស្មុគស្មាញ និងលើសពីតម្រូវការហិរញ្ញប្បទានដែលត្រូវការរួមចំណែកពីតួអង្គពាក់ព័ន្ឋទាំងស្ថាប័នសាធារណៈ, ដៃគូអភិវឌ្ឍន៍ ជាពិសេស វិស័យឯកជនផ្ទាល់ រួមគ្នាដោះស្រាយក្នុងស្មារតីទទួលខុសត្រូវខ្ពស់ និងប្រកបដោយភាពម្ចាស់ការ។ ក្នុងន័យនេះ ធនាគារសហគ្រាសធុនតូច និងមធ្យម កម្ពុជា ប្តេជ្ញាបន្តខិតខំផ្តល់ការគាំទ្រដល់សហគ្រាសធុនតូច និងមធ្យម តាមរយៈការពង្រឹងសេវាឥណទានឱ្យកាន់តែមានប្រសិទ្ធភាព ពោលគឺផ្តល់ភាពទន់ភ្លន់ឱ្យបានច្រើនលើលក្ខខណ្ឌទទួលបានឥណទាន, កាត់បន្ថយរយៈពេល បញ្ចេញឥណទានជូនអតិថិជន និងជាពិសេស ផ្តល់ឥណទានឱ្យចំគោលដៅស្របតាមគោលនយោបាយអាទិភាពរបស់រាជរដ្ឋាភិបាលដែលបានគូសរំលេចក្នុងយុទ្ធសាស្ត្របញ្ចកោណ-ដំណាក់កាលទី១។
ការផ្តល់ឥណទានដល់សហគ្រាសធុនតូច និងមធ្យម ដែលមានតម្រូវការហិរញ្ញប្បទានជួយគាំទ្រដល់ការរីកលូតលាស់នៃអាជីវកម្ម សំដៅរួមចំណែកអភិវឌ្ឍសង្គម-សេដ្ឋកិច្ចកម្ពុជា៕
Account
Security
Favourite Content