សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពីសារព័ត៌មានថៃ The Nation បានរាយការណ៍ថា សេដ្ឋកិច្ចថៃអាចប្រឈមមុខនឹងហានិភ័យធំៗមួយចំនួន ប្រសិនបើខ្លួនបរាជ័យក្នុងការចរចាពាណិជ្ជកម្មជាមួយអាម៉េរិកមុនថ្ងៃទី ១ ខែសីហា។
មជ្ឈមណ្ឌលស៊ើបការណ៍សម្ងាត់សេដ្ឋកិច្ច (SCB EIC) របស់ធនាគារ Siam Commercial បានលើកឡើងថា ការពន្យារពេលនៃដំណើរការចរចាពាណិជ្ជកម្មជាមួយនឹងអាម៉េរិកនឹងជះឥទ្ធិពលយ៉ាងធ្ងន់ធ្ងរដល់វិស័យធំៗរបស់សេដ្ឋកិច្ចថៃ ខណៈដែលមហាអំណាចមួយនេះដំឡើងពន្ធខ្ពស់លើការនាំចូលពីប្រទេសថៃដល់ទៅ ៣៦% ខណៈដែលដៃគូប្រកួតប្រជែងសំខាន់ៗដូចជា វៀតណាម កូរ៉េខាងត្បូង និងជប៉ុន ទទួលបានការបន្ទាបអត្រាពន្ធទាបជាងខ្លួន។ ប្រសិនបើថៃបរាជ័យក្នុងការចរចាជាមួយនឹងអាម៉េរិក ប្រទេសនេះនឹងជួបហានិភ័យធំៗចំនួន ៥ រួមមាន៖
១. ការបាត់បង់ចំណែកទីផ្សារនាំចេញទៅអាម៉េរិក៖ ការនាំចេញរបស់ថៃ ជាពិសេស គ្រឿងអេឡិចត្រូនិក និងគ្រឿងដំឡើងសម្រាប់អេឡិចត្រូនិក អាចនឹងបាត់បង់ចំណែកទីផ្សារនៅអាម៉េរិកទៅលើប្រទេសផ្សេងដែលជាគូប្រជែង ខណៈដែលប្រទេសភាគច្រើនទទួលបានអត្រាពន្ធគយទាបជាងថៃ។ បច្ចុប្បន្ននេះ សេដ្ឋកិច្ចអាស៊ានសំខាន់ៗដូចជា សិង្ហបុរី ប្រឈមនឹងពន្ធ ១០% របស់អាម៉េរិក, ឥណ្ឌូណេស៊ី ១៩%, វៀតណាម និងហ្វីលីពីន ២០%, និងម៉ាឡេស៊ី ២៥% (នៅតែស្ថិតក្រោមការចរចា)។ លើសពីនេះ អាម៉េរិកកំណត់គោលដៅសម្រាប់ប្រទេសដែលគេចវេសពន្ធ នាំឱ្យមានការកើនឡើងនៃថ្លៃដើម និងច្បាប់តឹងរ៉ឹងលើការត្រួតពិនិត្យប្រភពដើមនៃផលិតផល។
២. វិស័យកសិកម្ម និងបសុសត្វ៖ ប្រសិនបើថៃយល់ព្រមបើកទីផ្សាររបស់ខ្លួនចំពោះទំនិញអាម៉េរិកដោយគ្មានលក្ខខណ្ឌ ឬ ពន្ធសូន្យដូចជា កសិកម្ម និងបសុសត្វ ជាពិសេសសាច់ជ្រូក សាច់មាន់ និងពោត វាអាចរងផលប៉ះពាល់យ៉ាងធ្ងន់ធ្ងរ ជាពិសេសកសិករតូចៗក្នុងស្រុក ស្របពេលដែលតម្លៃផលិតកម្មនៅក្នុងប្រទេសថៃខ្ពស់ជាងនៅអាម៉េរិកជាមួយនឹងការពឹងផ្អែកខ្លាំងលើការផលិតក្នុងស្រុក អ្នកប្រើប្រាស់ថៃអាចងាកទៅរកការនាំចូលដែលមានតម្លៃទាបជាង។ បញ្ហានេះនឹងបង្កដល់សន្តិសុខស្បៀងរបស់ថៃ ហើយអ្នកផលិតក្នុងស្រុកនឹងជួបការលំបាក ជាពិសេសអ្នកដែលមានថ្លៃដើមផលិតកម្មខ្ពស់។
៣. ការធ្លាក់ចុះនៃតម្រូវការក្នុងស្រុក៖ គេព្យារកណ៍ថា ការវិនិយោគក្នុងវិស័យឯកជននឹងធ្លាក់ចុះ ហើយការចំណាយរបស់អ្នកប្រើប្រាស់អាចធ្លាក់ចុះខ្លាំងផងដែរ ជាពិសេសក្នុងត្រីមាសទី៤។ ភាពមិនប្រាកដប្រជាជុំវិញការដំឡើងពន្ធរបស់អាម៉េរិកលើប្រទេសថៃអាចនាំឱ្យផែនការវិនិយោគពន្យារពេល។ ស្របពេលដែលដៃគូប្រកួតប្រជែងរបស់ថៃប្រឈមនឹងការយកពន្ធទាប នោះបរទេសអាចនឹងផ្លាស់ប្តូរការវិនិយោគរបស់ពួកគេទៅកាន់ប្រទេសផ្សេងៗទៀត។ លើសពីនេះ ការចំណាយរបស់វិស័យឯកជននឹងបន្តធ្លាក់ចុះរហូតដល់ត្រីមាសទី៤ ដោយសារពន្ធអាម៉េរិកនឹងប៉ះពាល់ដល់ការចំណាយក្នុងស្រុក និងការធ្លាក់ចុះនៃវិស័យការងារ។
៤. ការកាត់បន្ថយអត្រាការប្រាក់បន្ថែមទៀត៖ គណៈកម្មាធិការគោលនយោបាយរូបិយវត្ថុ (MPC) អាចនឹងកាត់បន្ថយអត្រាការប្រាក់គោលនយោបាយពីរដងក្នុងឆ្នាំនេះ ដើម្បីស្របតាមលក្ខខណ្ឌសេដ្ឋកិច្ចដែលកាន់តែយ៉ាប់យ៉ឺន។ ប្រសិនបើកិច្ចចរចាជាមួយនឹងអាម៉េរិកបរាជ័យ សេដ្ឋកិច្ចថៃនឹងប្រឈមមុខនឹងហានិភ័យធ្លាក់ចុះកាន់តែខ្លាំង ដែលអាចជំរុញឱ្យ MPC ពិចារណាកាត់បន្ថយអត្រាការប្រាក់បន្ថែមទៀតសម្រាប់ជំរុញសេដ្ឋកិច្ច។
៥. រដ្ឋាភិបាលថៃត្រូវវាយអំពីតម្លៃអត្ថប្រយោជន៍ និងគុណវិបត្តិនៃការបើកទីផ្សារដល់ទំនិញអាមេរិកដោយប្រុងប្រយ័ត្ន ដោយសារការដាក់ពន្ធទាបលើការនាំចូលអាចធ្វើឲ្យមានការកើនឡើងនៃការប្រកួតប្រជែងនៃការនាំចូលពីបរទេស។ រដ្ឋាភិបាលថៃអាចពិចារណាបើកទីផ្សារសម្រាប់ផលិតផលមួយចំនួនដោយមានលក្ខខណ្ឌ, ការផ្តល់ការគាំទ្រដល់អាជីវកម្មដែលរងផលប៉ះពាល់, ការផ្តល់ប្រាក់ងាយស្រួលរយៈពេលខ្លី, ឱកាសទីផ្សារថ្មី, និងការកសាងសមត្ថភាពសម្រាប់អ្នកផលិតក្នុងស្រុកដើម្បីបង្កើនការប្រកួតប្រជែងជាជាងការអនុវត្តទីផ្សារសេរីពេញលេញ៕
Account
Security
Favourite Content