ភ្នំពេញ៖ ក្រសួងពាណិជ្ជកម្ម នឹងរៀបចំ«វេទិកាពាណិជ្ជកម្មឌីជីថលកម្ពុជាលើកទី១ និងពិព័រណ៍អនឡាញ (1st Cambodia Digital Trade Forum និង Online Expo) នៅថ្ងៃទី១៣ ដល់ថ្ងៃទី១៦ ខែធ្នូ ឆ្នាំ២០២៤ នៅយូរ៉ូផាក បុរីប៉េងហួតបឹងស្នោរ  រាជធានីភ្នំពេញ។ នេះជាព្រឹត្តិការណ៍ដំបូងគេបង្អស់នៅកម្ពុជា និងជាកម្មវិធីអមពិព័រណ៏ផលិតផលខ្មែរ និងទំនិញនាំចេញ-នាំចូល លើកទី១៧។

លោកជំទាវ ជា រដ្ឋា រដ្ឋលេខាធិការក្រសួងពាណិជ្ជកម្ម បានថ្លែងក្នុងកិច្ចប្រជុំផ្សព្វផ្សាយស្ដីពី «អត្ថប្រយោជន៍ក្នុងការចូលរួមវេទិកាពាណិជ្ជកម្មឌីជីថលកម្ពុជាលើកទី១ និងពិព័រណ៍អនឡាញ» នៅទីស្តីការក្រសួងពាណិជ្ជកម្ម កាលពីថ្ងៃទី២៥ ខែតុលា ឆ្នាំ២០២៤ ថា ៖ វេទិកាពាណិជ្ជកម្មឌីជីថលកម្ពុជាលើកទី១ និងពិព័រណ៍អនឡាញត្រូវបានបរៀបចំឡើងក្នុងគោលបំណងជំរុញការបង្កើតថ្មីលើកកម្ពស់វិស័យពាណិជ្ជកម្មឌីជីថលនៅកម្ពុជា និងគាំទ្រការជំរុញផលិតផលក្នុងស្រុកឈានទៅកាន់សកលលោក។ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នឹងអញ្ជើញជាអធិបតីដ៏ខ្ពង់ខ្ពស់ក្នុងវេទិកានេះ។

លោកជំទាវ បានបន្តថា៖ ពិព័រណ៍នេះ នឹងប្រព្រឹត្តទៅក្រោមប្រធានបទ “ផលិតផលកម្ពុជា ឆ្ពោះទៅកាន់ពាណិជ្ជកម្មសកល” From Cambodian Made to Global Trade (Cambodian2Global) ដែលនឹងបង្ហាញពីភាពរីកចម្រើននៃតួនាទីរបស់កម្ពុជានៅក្នុងបរិបទសេដ្ឋកិច្ចឌីជីថល ព្រមទាំងជំរុញឱ្យមានភាពរីកចម្រើននៃវិស័យពាណិជ្ជកម្មឌីជីថលនៅកម្ពុជា។

លោកជំទាវរដ្ឋលេខាធិការ បានមានប្រសាសន៍បញ្ជាក់ថា៖ សហគ្រិនកម្ពុជាទាំងអស់ អាចចូលរួមសហការក្នុងការដាក់តាំងបង្ហាញលក់ផលិតផលជាតិខ្មែរចូលទៅក្នុងទីផ្សារជាតិ និងអន្តរជាតិ តាមរយៈបណ្ដាញ CambodiaTrade.com ក្នុងឱកាសពិព័រណ៍ខាងមុខនេះ។ 

លោកជំទាវបានបន្ថែមថា អ្នកចូលរួមនឹងបានស្វែងយល់ពីកិច្ចពិភាក្សា និងទទួលបាននូវបទពិសោធន៍ថ្មីៗគួរឱ្យកត់សម្គាល់សម្រាប់អនាគតនៃអាជីវកម្មតាមប្រព័ន្ធអេឡិចត្រូនិក និងរបៀបបង្កើតទំនុកចិត្តជាមួយអតិថិជន ដូចជា កម្មវធីពាណិជ្ជកម្មឌីជីថល និង AI, ការការពារអ្នកប្រើប្រាស់,ការការពារទិន្នន័យ, សញ្ញាទុកចិត្តសម្រាប់ eCommerce, ដំណោះស្រាយអាជីវកម្មអនឡាញ គោលនយោបាយពាណិជ្ជកម្មឌីជីថល  ជាពិសេស ក៏មានកម្មវិធីជជែកដេញដោលរបស់យុវជននៅក្នុងប្រធានបទពាណិជ្ជកម្មឌីជីថល, កម្មវិធីពានរង្វាន់ E-Commerce Awards Night ,MOC Award ,CSR Award, Export Award  និងអបអរសាទរសមិទ្ធផលក្នុងវិស័យពាណិជ្ជកម្មឌីជីថលរបស់កម្ពុជាផងដែរ។

ការបង្កើតផ្សារខេមបូឌាត្រេដ (Cambodia Trade) របស់ក្រសួងពាណិជ្ជកម្ម ជាចលករដ៏ខ្លាំងក្លាយមួយក្នុងការរុញច្រានផលិតផលខ្មែរចូលទីផ្សារអន្ដរជាតិ។ ផ្សារខេមបូឌាត្រេដ ជាផ្សារអនឡាញ សម្រាប់សហគ្រាសធុនតូច និងមធ្យម អាចលក់ផលិតផលខ្មែរដែលមានសក្តានុពល ទាំងក្នុងស្រុក និងនាំចេញទៅក្រៅប្រទេស ព្រមទាំងការដាក់តាំងលក់ទំនិញក្នុងទីផ្សារដែលទូលំទូលាយ និងមិនមានព្រំដែន។

លោក ណុច កាណូ ប្រធានទីផ្សារ CambodiaTrade បានឱ្យដឹងថា៖ ខេមបូឌាត្រេដ (Cambodia Trade) ជាផ្សារពាណិជ្ជកម្មតាមប្រព័ន្ធអេឡិចត្រូនិក (e-commerce marketplace) ប្រតិបត្តិការតាមរយៈគេហទំព័រ Cambodia Trade.com និងស្ថិតក្រោមការគ្រប់គ្រងដោយផ្ទាល់របស់ក្រសួងពាណិជ្ជកម្ម ។

គោលបំណងនៃការបង្កើតផ្សារអនឡាញនេះគឺចង់ជួយសហគ្រាសខ្នាតតូច និងមធ្យម ឱ្យមានឱកាសឡើងមក Cambodia Trade ដើម្បីលក់ផលិតផលដល់អតិថិជនក្នុងប្រទេស និងក្រៅប្រទេសជំរុញ និងបង្កើនសេដ្ឋកិច្ចដល់សហគ្រាសធុនតូច និងមធ្យម។

លោកបានឱ្យដឹងទៀតថា៖ លក្ខណៈពិសេសរបស់ខេមបូឌាត្រេដ គឺគ្រប់គ្រងដោយផ្ទាល់ដោយក្រសួងពាណិជ្ជកម្ម មានច្បាប់គ្រប់គ្រងត្រឹមត្រូវ និងច្បាស់លាស់ ច្បាប់ការពារអតិថិជន និងគោលនយោបាយទូរទាត់សំណង ច្បាប់គ្រប់គ្រងទិន្ន័យ និងឯកជនភាព ដែលឆ្លើយតបទាំងក្នុង និងក្រៅប្រទេស ច្បាប់ទូរទាត់សាច់ប្រាក់ ទាំងក្នុង និងក្រៅប្រទេស និងច្បាប់ទាក់ទងនឹងគយ ប្រព័ន្ធដឹកជញ្ជូន ព្រមទាំងគោលនយោបាយពន្ធដារ អាជ្ញារប័ណ្ណសម្រាប់អ្នកផ្គត់ផ្គង់។ ខេមបូឌាត្រេដ រៀបចំកម្មវិធីបណ្តុះបណ្តាល និងផ្តល់សម្ភារៈជូនសហគ្រាសខ្នាតតូច និងមធ្យម ក្នុងករណីចាំបាច់ ដើម្បីជួយជំរុញអាជីវកម្ម ឲ្យកាន់តែរីកចម្រើន និងអាចប្រកួតប្រជែងជាមួយទីផ្សារបរទេស ជួយសម្រួលផ្នែកដឹកជញ្ជូន និងការទូរទាត់សាច់ប្រាក់។

សូមបញ្ជាក់ផងដែរថា៖ សហគ្រាសធុនតូច និងមធ្យម ដែលចូលរួមក្នុង Cambodia Trade  បានដាក់តាំងលក់ផលិតផលរបស់ខ្លួននៅលើផ្សារខេមបូឌាត្រេដ (www.cambodiatrade.com) និងបានត្រៀមខ្លួនរួមជាស្រេចក្នុងការទទួលការបញ្ជារទិញ ការទូរទាត់សាច់ប្រាក់តាមប្រព័ន្ធអេឡិចត្រូនិក និងការដឹកជញ្ជូនដល់ដៃអតិថិជនទាំងក្នុង និងក្រៅស្រុក ក្នុងទំរង់ពីអ្នកលក់ទៅកាន់អ្នកលក់ (B2B) និងពីអ្នកលក់ទៅកាន់អ្នកប្រើប្រាស់ផ្ទាល់ (B2C) ៕