សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
(ភ្នំពេញ)៖ ក្រោយយុទ្ធនាការអន្ទាក់សូន្យដំណាក់កាលទី១ត្រូវបានបិទបញ្ចប់កាលពីឆ្នាំ២០២២កន្លងទៅនេះ យុទ្ធនាការដដែលនៃដំណាក់កាលទី២បានលេចរូបរាងឡើងចាប់ពីថ្ងៃទី ៣ខែមីនា ឆ្នាំ ២០២៣នេះ រហូតដល់ ខែកក្កដា។ នេះបើតាមការឱ្យដឹងរបស់ឯកឧត្តម នេត្រ ភក្ត្រា អ្នកនាំពាក្យនៃក្រសួងបរិស្ថាន។
ដោយឡែក សមទ្ធិផលដែលយុទ្ធនាការអន្ទាក់សូន្យដំណាក់កាលទី១គឺមានភាពល្អប្រសើរច្រើន ដែលផ្លែផ្កាទាំងនេះនឹងជំរុញការអនុវត្តក្នុងដំណាក់កាលទី២ឱ្យកាន់តែប្រសើរ ឈានទៅរកការបោសសម្អាតអន្ទាក់ទាំងអស់ចេញពីក្នុងព្រៃ។
នាឱកាសសន្និសីទសារព័ត៌មានស្ដីអំពីយុទ្ធនាការអន្ទាក់សូន្យក្នុងតំបន់ការពារធម្មជាតិកម្ពុជាដំណាក់កាលទី២ នាព្រឹកថ្ងៃទី២ ខែមីនា ឆ្នាំ២០២៣ ឯកឧត្តម នេត្រ ភក្ត្រា បានឱ្យដឹងពីសមទ្ធិផលដែលទទួលបាននាពេលកន្លងមក ដែលរួមមាន ឆ្នាំ២០២១ និង ២០២២ ក្រសួងដោះបានអន្ទាក់ជាង ៩ ម៉ឺន ក្នុងនោះ អន្ទាក់ចំនួន ៦១ ៦១១ បានដោះនៅឆ្នាំ២០២១។
អន្ទាក់ដែលដោះបានក្នុងដំណាក់កាលទី១នេះផងដែរ ត្រូវបានរកឃើញភាគច្រើននៅតាមតំបន់ជួរភ្នំក្រវាញ ក្នុងភូមិសាស្ត្រខេត្តកោះកុង និងខេត្តពោធិ៍សាត់។ ក្រៅពីនោះមាននៅប៉ែកឦសានប្រទេស ក្នុងភូមិសាស្ត្រខេត្ត មណ្ឌលគិរី រតនៈគិរី និងខេត្តស្ទឹងត្រែង។ ជាមួយគ្នានេះ ការផ្សព្វផ្សាយនូវគម្រោង «ទេសចរណ៍ផ្សារភ្ជាប់ទឹកដី» ក៏ទទួលបានការចាប់អារម្មណ៍ច្រើនពីសំណាក់ប្រជាជនក្នុងស្រុកផងដែរ ដែលនេះជាចំណែកមួយក្នុងការកសាងសេដ្ឋកិច្ចមូលដ្ឋានរដល់ប្រជាជនដែលរស់នៅតាមតំបន់ការពារធម្មជាតិ។ សម្ទុះនៃការដើរព្រៃ បោះតង់ ការផ្សងព្រេងរបស់ប្រជាជនកម្ពុជាកន្លងមក គឺតិច ឬច្រើនបានផ្ដល់នូវចរន្ដសេដ្ឋកិច្ចមួយទៅដល់សហគមន៍ និងប្រជាជនដែលបម្រើសេវាកម្មទេសចរណ៍។
ដោយឡែក របត់ដ៏ធំមួយទៀតផងដែរនោះគឺការរក្សាបាននូវព្រៃឈើ។ ជំនួសឱ្យការកាប់ឈើលក់យកកម្រៃ បច្ចុប្បន្នមានការរក្សាព្រៃទុកដើម្បីលក់ជាកាបូនវិញ។ លើសពីនេះទៅទៀត នៅក្នុងដំណាក់កាលទី១ មានភោជនីដ្ឋានចំនួន ៥២កន្លែងដែលបានចូលរួមជាក្រសួង ប្ដេជ្ញាមិនលក់មុខម្ហូបដែលធ្វើពីសាច់សត្វផងដែរ។ ម្យ៉ាងទៀត សាធារណៈជនជារួមក៏បានយល់ដឹងច្រើនអំពីបញ្ហាជួញដូរសត្វព្រៃផងដែរ ដោយកន្លងមក មានការរាយការណ៍ជូនអាជ្ញាធរឱ្យចុះបង្រ្កាបបទល្មើសជាដើម។ ទិដ្ឋភាពទាំងអស់នេះ ថ្វីត្បិតតែមិនបង្ហាញជាលទ្ធផលដោយផ្ទាល់ ប៉ុន្តែវាជាការជះផលដោយប្រយោល ជាដំណាក់កាលនៃការដោះស្រាយបញ្ហាម្ដងបន្តិចៗ។
យ៉ាងណាមិញ សម្រាប់ដំណាក់កាលទី២គឺនឹងត្រូវធ្វើឡើងក្នុងខេត្តចំនួន៦ ដែលស្ថិតនៅតាមតំបន់ជួរភ្នំក្រវាញ រួមមានខេត្តពោធិ៍សាត់ ទៅកំពង់ស្ពឺ កោះកុង បាត់ដំបង ប៉ៃលិន និងសៀមរាប។ ក្នុងដំណាក់ថ្មីនេះ ឯកឧត្តម នេត្រ ភក្ត្រា មិនរំពឹងថាអាចដកអន្ទាក់បាន ១០០%ចេញពីព្រៃនោះទេ ព្រោះកន្លងមកតាមការប៉ានស្មាន ក្រសួងទើបតែដកអន្ទាក់បានប្រមាណជា ២០% ប៉ុណ្ណោះ។ ប៉ុន្តែ នេះជាជំហានដែលឈានទៅដោះអន្ទាក់ចេញឱ្យអស់ពីព្រៃ គឺត្រូវឆ្លងកាត់ការធ្វើយុទ្ធនាការជាដំណាក់កាលតទៅមុខទៀត៕
Account
Security
Favourite Content