កំពង់ស្ពឺ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញសម្ពោធដាក់ឱ្យដំណើរការរោងចក្រផលិតស៊ីម៉ងតិ៍ថ្មីមួយទៀតរបស់ក្រុមហ៊ុន ខនស៍ ខេធី ស៊ីមេនភ្នំពេញ​​​​​​​​​ ឯ.ក ដែលមានតម្លៃ២៥០លានដុល្លារ​ ជាមួយសមត្ថភាពផលិតប្រមាណ ២,២លានតោនក្នុងមួយឆ្នាំ នៅព្រឹកថ្ងៃអង្គារទី២០ ខែឧសភា ឆ្នាំ២០២៥ ស្ថិតនៅតំបន់ហោងសំណំ ក្នុងភូមិមនោរម្យ ឃុំហោងសំណំ ស្រុកឱរ៉ាល់ ខេត្តកំពង់ស្ពឺ។

សម្តេចធិបតី ហ៊ុន ម៉ាណែត បានថ្លែងថា ការដាក់ឱ្យដំណើរការរោងចក្រថ្មី ដែលជារោងចក្រទី២ របស់ក្រុមហ៊ុនខនស៍នេះ (រោងចក្រទី១ ស្ថិតនៅខេត្តបាត់ដំបង) បានផ្ដល់ឱកាសឱ្យកម្ពុជាមានលទ្ធភាពកាន់តែច្រើនថែមទៀត និងមានការផ្គត់ផ្គង់ស៊ីម៉ងត៍ដោយខ្លួនឯង និងមានលទ្ធភាពកាន់តែធំក្នុងការបំពេញតម្រូវការស៊ីម៉ងត៍ក្នុងប្រទេស ហើយឈានដល់ការនាំចេញទៅទីផ្សារអន្តរជាតិ ខណៈដែលបច្ចុប្បន្ននេះ កម្ពុជាមាន៦រោងចក្រ ដែលអាចផលិត១១លានតោនក្នុងមួយឆ្នាំ។

យោងតាមរបាយការណ៍រោងចក្រស៊ីម៉ងត៍ក្រុមហ៊ុន ខនស៍ ខេធី ស៊ីមេន (ភ្នំពេញ) ឯ.ក នៅភូមិមនោរម្យ ឃុំហោងសំណំ ស្រុកឱរ៉ាល់ ខេត្តកំពង់ស្ពឺ មានសមត្ថភាពផលិតកម្មស៊ីម៉ងត៍ចំនួន ២,២លានតោនក្នុងមួយឆ្នាំ និងបង្កើតការងារផ្ទាល់ និងប្រយោលចំនួនជាង១០០០កន្លែង ។

ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានលើកឡើងថា​​ រោងចក្រស៊ីម៉ងត៍ទាំង៦កន្លែងនេះ មានទុនវិនិយោគសរុប១១១ពាន់លានដុល្លារអាមេរិក ដែលផ្តល់ការងារឱ្យពលរដ្ឋបាន ៣ ០០០កន្លែង។​ តាមរយៈរោងចក្រផលិតស៊ីម៉ងត៍ទាំង៦នេះ បានប្រែក្លាយកម្ពុជាពីប្រទេសនាំចូលស៊ីម៉ងត៍១០០ភាគរយពីបរទេស ទៅជាប្រទេសដែលមានលទ្ធភាពផ្គត់ផ្គង់តម្រូវការស៊ីម៉ងត៍ទាំងស្រុងដោយខ្លួនឯង ហើយក៏បានចាប់ផ្តើមនាំចេញទៅប្រទេសថៃក្នុងបរិមាណប្រមាណ៣ម៉ឺនតោនក្នុងឆ្នាំ២០២៤​ ផងដែរ។​

សម្តេចធិបតី ហ៊ុន ម៉ាណែត បានថ្លែងកោតសរសើរ និងអរគុណ ចំពោះក្រសួង ស្ថាប័ន និងគ្រប់ភាគីពាក់ព័ន្ធ ជាពិសេសក្រសួងរ៉ែ និងថាមពល ដែលបានផ្តល់កិច្ចសហការយ៉ាងល្អជាមួយក្រុមហ៊ុន ខនស៍ ខេធី ស៊ីមេន  ក្នុងការសម្រេចបានសមិទ្ធផលសាងសង់រោងចក្រផលិតស៊ីម៉ងត៍ថ្មីមួយទៀត។ ការទាញយករ៉ែនៅក្នុងស្រុក ដើម្បីអភិវឌ្ឍន៍ប្រទេសគឺជារឿងត្រឹមត្រូវ។ ការយករ៉ែនៅក្នុងស្រុក ជួយសួយសាអាករដល់រដ្ឋប្រមាណជិត១០០លានដុល្លារក្នុងឆ្នាំ២០២៤ ហើយក្រៅពីនោះ ក៏បង្កើនការងារដល់បងប្អូនបន្ថែមទៀតផង។

សម្តេចធិបតី បានថ្លែងថា ៖

«ជាការពិត កម្ពុជាត្រូវការចំណូល ត្រូវការបង្កើតការងារជូនប្រជាពលរដ្ឋ ត្រូវការអភិ​វឌ្ឍន៍សង្គម-សេដ្ឋកិច្ចជាតិ ប៉ុន្តែក៏ត្រូវទទួលខុសត្រូវ និងគិតគូរអំពី​ផល​ប៉ះពាល់ដល់បរិស្ថាន និងសង្គមជាតិផងដែរ។ រាជរដ្ឋាភិបាល​នឹងបន្តខិតខំប្រឹងប្រែងក្នុងការពង្រឹងបរិយាកាសវិនិយោគ ដើម្បីទាក់ទាញវិនិយោគិនឱ្យកាន់តែច្រើនមកកម្ពុជា»។

សម្ដេចបន្តថា រាជរដ្ឋាភិបាលនឹងបន្តទទួលស្វាគមន៍ និងផ្តល់កិច្ចសហ​ប្រតិ​បត្តិការជានិច្ចចំពោះគម្រោងវិនិយោគទាំងអស់ ជាពិសេសគម្រោងវិនិយោគដែលនឹងជួយជំរុញកំណើនសេដ្ឋកិច្ចកម្ពុជា ប្រកបដោយភាពធន់ ចីរភាព និងបរិយាបន្ន ដើម្បីសម្រេចបាននូវចក្ខុវិស័យកម្ពុជាឆ្នាំ២០៥០។

បើតាមឯកឧត្តម កែវ រតនៈ ក្នុងឆ្នាំ២០២៤ កម្ពុជាទទួលបានចំណូលមិនមែនសារពើពន្ធពីវិស័យរ៉ែជិត១០០លានដុល្លារ កើន៧៩ភាគរយ ធៀបនឹងឆ្នាំ២០២៣។ ក្នុងនោះ វិស័យរ៉ែនៅខេត្តកំពង់ស្ពឺ ផ្តល់ចំណូលឱ្យជាតិបានប្រមាណ៥លានដុល្លារ។​ ដោយឡែក សម្រាប់ត្រីមាសទី១ ឆ្នាំ២០២៥ វិស័យរ៉ែនេះផ្តល់ចំណូលឱ្យរដ្ឋបានជិត១លានដុល្លារ និងផ្តល់ការងារដោយផ្ទាល់ជូនពលរដ្ឋបានជិត២០០០នាក់ ពីការដ្ឋានរ៉ែចំនួន៧៤កន្លែងក្នុងខេត្តកំពង់ស្ពឺ៕