ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានបង្ហា​ញសុទិដ្ឋិនិយម និងមានជំនឿយ៉ាងមុតមាំថា កំណែទម្រង់រដ្ឋបាលសាធារណៈរបស់រាជរដ្ឋាភិបាលនីតិកា​ល​ទី៧ នៃរដ្ឋសភានឹងសម្រេចបានជោគជ័យនាំមកនូវឧត្តមប្រយោជន៍ជូនប្រទេសជាតិ និងប្រជាពលរដ្ឋ​។ ការអនុវត្តការកែទម្រង់រដ្ឋបាលសាធារណៈ ដែលជាមូលដ្ឋានគ្រឹះក្នុងការដាក់ចេញ និងការអនុវត្តកម្មវិធីគោលនយោបាយ ប្រកបដោយប្រសិទ្ធភាព និងស័ក្ដិសិទ្ធិភាព បានត្រួសត្រាយ និងជាមាគ៌ាឆ្ពោះទៅសម្រេចបានចក្ខុវិស័យឆ្នាំ២០៥០ ដែលកម្ពុជានឹងក្លាយជាប្រទេសមានចំណូលខ្ពស់។

សម្តេចប្រធានរដ្ឋសភា បានលើកឡើងដូច្នេះនៅក្នុងឱកាសអញ្ជើញជាអធិបតីបើកសិក្ខាសាលាស្តីពី «ការពិនិត្យឡើងវិញ និងការវិភាគមុខងារនិងរចនាសម្ព័ន្ធក្រសួង-ស្ថាប័ន របស់រាជរដ្ឋាភិបាល» នៅវិមានរដ្ឋសភា នាព្រឹកថ្ងៃទី២៩ ខែមេសា ឆ្នាំ២០២៥។ សិក្ខាសាលានេះបានរៀបចំឡើងដោយ គណៈកម្មការមហាផ្ទៃ ការពារជាតិ មុខងារសាធារណៈនៃរដ្ឋសភា សហការជាមួយ ក្រសួងមុខងារសាធារណៈ ដែលមានអ្នកចូលរួម មកពីភាគីពាក់ព័ន្ធទំាងស្ថាប័ននីតិប្បញ្ញត្តិនីតិប្រតិបត្តិមានអ្នកចួលរួមប្រមាណជាង៣០០នាក់។

សម្តេចរដ្ឋសភាធិបតី ឃួន សុដារី បានគូសបញ្ជាក់ថា៖ ការធ្វើកំណែទម្រង់នេះ ជាបេសកកម្មបន្តជំនាន់ដែលចាប់ផ្តើមតាំងពីទសវត្សរ៍ឆ្នាំ១៩៨០ ដោយសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រី បានអនុវត្តរៀងរហូតមក។ សម្តេចតេជោ ហ៊ុន សែន បានប្តេជ្ញាចិត្តដ៏មោះមុត និងមិនងាករេ ដោយបញ្ជាក់យ៉ាងច្បាស់ថា «កែទម្រង់ គឺយើងរស់ បើមិនកែទម្រង់ គឺយើងស្លាប់»។ ការប្ដេជ្ញាចិត្តដ៏ម៉ឹងម៉ាត់នេះធ្វើឱ្យ វិស័យមុខងារសាធារណៈនៅកម្ពុជាត្រូវបានអភិវឌ្ឍ និងពង្រឹងជាបន្តបន្ទាប់ជាមួយនឹងការបោះជំហានទៅមុខប្រកបដោយភាពប្រាកដនិយម និងវិជ្ជមានតាមរយៈយុទ្ធសាស្ត្រត្រីកោណ និងចតុកោណទាំងបួនដំណាក់កាលកន្លងមក។

សម្តេចរដ្ឋសភាធិបតី ឃួន សុដារី បានមានប្រសាសន៍លើកឡើងថា៖

« ការវិភាគមុខងារ និងរចនាសម្ព័ន្ធក្រសួង ស្ថាប័ន គឺជាជំហានដ៏សំខាន់មួយ ដែលត្រូវយកចិត្តទុកដាក់ ឆ្ពោះទៅរកការកសាងវិស័យសាធារណៈ ប្រកបដោយវិជ្ជាជីវៈ ប្រសិទ្ធភាព និងគួរឱ្យទុកចិត្តបាន និងមានសារៈសំខាន់សម្រាប់ការជំរុញអភិបាលកិច្ចល្អ គណនេយ្យភាព តម្លាភាព និងការអភិវឌ្ឍស្ថាប័ន ក្នុងការផ្តល់សេវាសាធារណៈជូនប្រជាពលរដ្ឋឱ្យបានកាន់តែប្រសើរ»។  

ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាអនុប្រធានប្រចាំការនៃគណៈកម្មាធិការជាតិជំរុញការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាលនីតិកាលទី៧ នៃរដ្ឋសភារដ្ឋមន្រ្តី បានមានប្រសាសន៍បន្តថា៖

«ការវិភាគមុខងារនឹងចូលរួមចំណែកយ៉ាងសំខាន់ក្នុងការពង្រឹងសមត្ថភាពស្ថាប័ន និងមន្ត្រីពង្រឹងប្រសិទ្ធភាពការងារបង្កើនសមត្ថភាពប្រកួតប្រជែង ព្រមទាំង​ជួយសន្សំសំចៃ និងបង្វិលថវិកាមកអភិវឌ្ឍសមត្ថភាពមន្រ្តី និងដើម្បីមកលើកទឹកចិត្តដល់មន្ត្រីរាជការតាមរយៈប្រព័ន្ធលើកទឹកចិត្តគាំទ្រសមិទ្ធកម្មដែលជាវិធានការគន្លឹះទី៣នៃការកទម្រង់រដ្ឋបាលសាធារណៈ»។

ឯកឧត្តម កែប ជុតិមា ប្រធានគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន នៃរដ្ឋសភា បានមានប្រសាសន៍នៅក្នុងសុន្ទរកថាស្វាគមន៍ថា៖ ការពិនិត្យ និងវិភាគមុខងារ និងរចនាសម្ព័ន្ធក្រសួង-ស្ថាប័ន ជាជំហានសំខាន់ក្នុងការកែលម្អ ប្រសិទ្ធភាពអង្គភាពសាធារណៈ បង្កើនគុណភាពសេវា និងការគ្រប់គ្រងល្អ។ ដំណើរការនេះ ជួយឱ្យរកឃើញនូវសក្តានុពល បញ្ហាប្រឈម និងដំណោះស្រាយ ស្របតាមវិធានការគន្លឹះ ដើម្បីគាំទ្រកំណែទម្រង់រដ្ឋបាលសាធារណៈ និងសម្រេចចក្ខុវិស័យកម្ពុជា ឆ្នាំ២០៥០ ដែលត្រូវបានកំណត់ក្នុងយុទ្ធសាស្ត្របញ្ចកោណដំណាក់កាលទី១៕