ភ្នំពេញ៖ នៅក្នុងត្រីមាសទី១ នៃឆ្នាំ២០២៤ ទំហំពាណិជ្ជកម្មបានកើនឡើងគួរឱ្យកត់សម្គាល់រហូតដល់ ១១,៩% ធៀបនឹងរយៈពេលដូចគ្នាក្នុងឆ្នាំ២០២៣ ដោយក្នុងនោះការនាំចេញបានកើនឡើងរហូតដល់​១៨%។ នេះបើតាមការថ្លែងរបស់ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្ត្រីនៅក្នុងពិធីបើកសម្ពោធ “ពិព័រណ៍ពាណិជ្ជកម្មអន្តរជាតិកម្ពុជា ឆ្នាំ២០២៤”នាព្រឹកថ្ងៃទី១០ ខែឧសភា ឆ្នាំ២០២៤ នាមជ្ឈមណ្ឌលកោះពេជ្រ រាជធានីភ្នំពេញ។

ឧបនាយករដ្ឋមន្ត្រីបានឱ្យដឹងថា ៖ ការវិនិយោគក្នុងរយៈពេល៤ខែ ដើមឆ្នាំ២០២៤នេះ កម្ពុជាទទួលបានគម្រោងវិនិយោគចំនួន ១២៨​គម្រោង ស្មើនឹងទំហំទឹកប្រាក់ ២ ៥១៣ លានដុល្លារ មានការកើនឡើង ៣២៧% ធៀបនឹងឆ្នាំ២០២៣ និងបង្កើតការងារធ្វើជូនប្រជាពលរដ្ឋប្រមាណជាង ១៣០ពាន់កន្លែង។ ក្នុងនោះ, នៅក្នុងត្រីមាសទី១ ឆ្នាំ២០២៤ ការវិនិយោគក្នុងវិស័យឧស្សាហកម្មក៏បានកើនឡើងផងដែរ រហូតដល់ទៅប្រមាណ ៨៦១ លានដុល្លារអាម៉េរិក, គឺ កើន ២២៧% ធៀបនឹងត្រីមាសទី១ ឆ្នាំ២០២៣, ដែលកំណើនភាគច្រើននៅក្នុងឧស្សាហកម្មតម្លៃបន្ថែមខ្ពស់ ដូចជារោងចក្រផលិតសម្ភារៈអេឡិចត្រូនិក, ការបង្កើតមជ្ឈមណ្ឌលទិន្នន័យ និងការសាងសង់រោងចក្រផ្គុំ និងដំឡើងរថយន្ត។

ឯកឧត្តម វង្សី វិស្សុត បានគូសបញ្ជាក់ថា ៖សេដ្ឋកិច្ចកម្ពុជាកំពុងស្ទុះងើបឡើងវិញបន្ទាប់ពីធ្លាក់ចុះ និងថមថយក្នុងអំឡុងពេលនៃវិបត្តិកូវីដ-១៩។ តាមការព្យាករណ៍របស់រាជរដ្ឋាភិបាល, សេដ្ឋកិច្ចកម្ពុជាត្រូវបានប៉ាន់ស្មានថា នឹងមានកំណើនក្នុងរង្វង់ ៦% ក្នុងឆ្នាំ២០២៤ នេះ និងក្នុងឆ្នាំ២០២៥ ខាងមុខ, ដែលត្រូវបានចាត់ទុកជាសេដ្ឋកិច្ចមួយប្រកបដោយថាមភាព និងមានកំណើនខ្ពស់មួយ ក្នុងតំបន់អាស៊ាននិងអាស៊ី។កំណើននេះត្រូវបានជំរុញដោយការរំពឹងទុកនូវភាពប្រសើរឡើងវិញនៃសេដ្ឋកិច្ចសកលជាពិសេសការកើនឡើងនៃតម្រូវការសកល ដែលជាបច្ច័យវិជ្ជមានដល់ការនាំចេញផលិតផលនៃអនុវិស័យកម្មន្តសាលមិនមែនកាត់ដេរ និងផលិតផលកសិកម្មរបស់កម្ពុជា ព្រមទាំងផ្តល់សន្ទុះកំណើនវិជ្ជមានឡើងវិញដល់អនុវិស័យកាត់ដេរផងដែរ។ ជាមួយគ្នានេះ ការបន្តកើនឡើងនៃភ្ញៀវទេសចរជាតិ និងអន្តរជាតិ នឹងជួយរក្សាចលនការកំណើននៃអនុវិស័យបដិសណ្ឋារកិច្ច និងសេវាកម្មម្ហូបអាហារ, ព្រមទាំងអនុវិស័យគាំទ្រផ្សេងទៀត រួមមាន វិស័យដឹកជញ្ជូន និងការប្រើប្រាស់ក្នុងស្រុក៕