សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ រដ្ឋាភិបាលវៀតណាម បានដាក់ផែនការដើម្បីអាចសម្រេចបានមហិច្ឆតារបស់ខ្លួនជាមួយនឹងកំណើនសេដ្ឋកិច្ចប្រចាំឆ្នាំ២០២៦ ឱ្យបាន ១០% ខណៈដែលកាលពីឆ្នាំ២០២៥កន្លងទៅនេះ សម្រេចបានត្រឹម ៨.០២% ប៉ុណ្ណោះ ដែលជំរុញដោយវិស័យសេវាកម្ម និងផលិតកម្មឧស្សាហកម្ម នេះបើយោងតាមសេចក្ដីរាយការណ៍ពី The Investor ។
កាលពីថ្ងៃច័ន្ទ ដើមសប្ដាហ៍នេះ ការិយាល័យស្ថិតិទូទៅ (GSO) ដែលស្ថិតនៅក្រោមចំណុះក្រសួងហិរញ្ញវត្ថុវៀតណាមបានបញ្ចេញទិន្នន័យជាផ្លូវការបង្ហាញពីកំណើនសេដ្ឋកិច្ចរបស់ខ្លួនដែលសម្រេចបាន ៨,០២% ក្នុងឆ្នាំ២០២៥ ជាល្បឿនយ៉ាងលឿនបំផុតបន្ទាប់ពីសម្រេចបានកំណើនអត្រា ៨,១២% នៅក្នុងឆ្នាំ២០២២ ។
លោកស្រី Nguyen Thi Huong ប្រធាន GSO បានលើកឡើថា កំណើនសេដ្ឋកិច្ចនៅក្នុងត្រីមាសទី ៤ ឆ្នាំ២០២៥ បានឈានដល់ ៨,៤៦% បើធៀបនឹងរយៈពេលដូចគ្នាកាលពីឆ្នាំ២០២៤ ដែលជាកំណើនខ្លាំងបំផុតនៅចន្លោះឆ្នាំ២០២១-២០២៥។ កត្តាដែលជំរុញកំណើនសេដ្ឋកិច្ច គឺវិស័យសេវាកម្មនៅតែជាអ្នករួមចំណែកដ៏ធំបំផុតដោយមានចំណែក ៥១,០៨%, វិស័យឧស្សាហកម្ម និងសំណង់ រួមចំណែក ៤៣.៦២%, វិស័យកសិកម្ម រុក្ខាប្រមាញ់ និងនេសាទ មានប្រមាណ ៥.៣%។ ទន្ទឹមនឹងនេះ ផលិតផលក្នុងស្រុកសរុប (GDP) របស់វៀតណាម ត្រូវបានប៉ាន់ប្រមាណថា ឈានដល់ ៥១៤ ពាន់លានដុល្លារក្នុងឆ្នាំ២០២៥ កើនឡើងបន្ថែម ៣៨ ពាន់លានដុល្លារពីឆ្នាំ២០២៤ ខណៈដែល GDP សម្រាប់មនុស្សម្នាក់បានកើនឡើងដល់ ៥ ០២៦ ដុល្លារ ធៀបនឹង ៤ ៧០០ ដុល្លារសម្រាប់មនុស្សម្នាក់ក្នុងឆ្នាំ២០២៤។
លោកស្រី Thi Huong បានបន្ថែមថា ឆ្នាំ២០២៥ គឺជាពេលវេលាដែលវៀតណាមរៀបចំឡើងវិញនូវអង្គភាពរដ្ឋបាលគ្រប់លំដាប់ថ្នាក់ និងកសាងប្រព័ន្ធរដ្ឋបាលថ្នាក់មូលដ្ឋាន ហើយក៏ជាឆ្នាំដែលសេដ្ឋកិច្ចជួបប្រទះនឹងបញ្ហាប្រឈមជាច្រើនផងដែរ ដូចជា ព្យុះទីហ្វុង បណ្តាលឱ្យមានទឹកជំនន់ធ្ងន់ធ្ងរ ប៉ះពាល់ដល់សកម្មភាពអាជីវកម្ម និងអាយុជីវិតរបស់ពលរដ្ឋ។ យ៉ាងណាមិញ ពាណិជ្ជកម្មបានឈានដល់កម្រិតខ្ពស់បំផុតដោយសារការនាំចេញ និងការនាំចូលសរុបមានតម្លៃលើសពី ៩៣០ ពាន់លានដុល្លារ កើនឡើង ១៨,២% កាលពីឆ្នាំ២០២៤។ ដោយឡែក សន្ទស្សន៍តម្លៃអ្នកប្រើប្រាស់ ជាមធ្យម (CPI) បានកើនឡើង ៣,៣១% ខណៈដែលអាជីវកម្មជិត ២៩៧ ៥០០ បានចុះបញ្ជីថ្មី កើនឡើង ២៧,៤% ធៀបនឹង ២០២៤។ ជាមួយនឹងការទទួលបានផ្លែផ្កាយ៉ាងឆាប់រហ័សនៃកំណើនសេដ្ឋកិច្ចកាលពីឆ្នាំ២០២៥ រដ្ឋសភាវៀតណាម បានកំណត់គោលដៅកំណើនសេដ្ឋកិច្ចឱ្យឈានដល់ ១០% និង GDP សម្រាប់មនុស្សម្នាក់ចន្លោះពី ៥ ៤០០ ទៅ ៥ ៥០០ ដុល្លារក្នុងឆ្នាំ២០២៦ ។
ភ្ជាប់ទៅនឹងផែនការ និងគោលដៅដែលបានដាក់ចេញដោយរដ្ឋសភាវៀតណាម លោកស្រី Huong បានបង្ហាញពីក្ដីបារម្ភដែលវាអាចក្លាយជាបញ្ហាប្រឈម ព្រោះតម្រូវឱ្យមានវិធានការខ្លាំងជាងមុន ដើម្បីពន្លឿនការបញ្ចេញទុនវិនិយោគសាធារណៈ ជាពិសេសសម្រាប់គម្រោងជាតិសំខាន់ៗ និងដើម្បីដោះស្រាយការអភិវឌ្ឍន៍ដែលពន្យារពេលយូរ។ លោកស្រីក៏បានអំពាវនាវឱ្យមានការរៀបចំរចនាសម្ព័ន្ធសេដ្ឋកិច្ចកាន់តែស៊ីជម្រៅ រួមជាមួយនឹងកិច្ចខិតខំប្រឹងប្រែងដើម្បីជំរុញការនាំចេញ និងពង្រីកទីផ្សារក្នុងស្រុក ដើម្បីគាំទ្រដល់អាជីវកម្ម ហើយរដ្ឋាភិបាល គួរតែប្រកាន់យកគោលនយោបាយប្រកួតប្រជែង និងអនុគ្រោះ ដើម្បីកែលម្អបរិយាកាសអាជីវកម្ម ទាក់ទាញគម្រោងវិនិយោគពីបច្ចេកវិទ្យាធំៗ ដូចជា ឈីប ការច្នៃប្រឌិត និងអ៊ីដ្រូសែនបៃតង៕
Account
Security
Favourite Content