សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
មន្ត្រីជាន់ខ្ពស់មួយរូបរបស់មន្ទីរបញ្ចកោណ តាមរយៈការដកស្រង់សំដីដោយ The Defense News បានអះអាងថា រយៈពេលត្រឹមតែ៣ឆ្នាំចុងក្រោយនេះរដ្ឋាភិបាលក្រុងប៉េកាំងបានបង្កើនក្បាលគ្រាប់នុយក្លេអ៊ែររហូតទៅដល់ទ្វេដង ហើយបានអំពាវនាវឲ្យរដ្ឋាភិបាលវ៉ាស៊ីនតោនគួរគិតគូរដល់កិច្ចការងារអភិវឌ្ឍកងកម្លាំងរបស់ខ្លួនសម្រាប់អាវុធប្រល័យលោកនេះដូចគ្នាដែរ។
របាយការណ៍ដែលធ្វើឡើងដោយមន្ទីរបញ្ចកោណស្តីអំពីកងកម្លាំងយោធារបស់ចិន ឬ China Military Power Report បានបង្ហាញថា គិតត្រឹមខែឧសភាប៉ុណ្ណោះ ប្រទេសចិនមានក្បាលគ្រាប់នុយក្លេអែរដែលអាចប្រតិបត្តិការបានរហូតទៅដល់៥០០គ្រាប់ធៀបទៅនឹងតួលេខកាលពីឆ្នាំ២០២០ ដែលគ្រានោះចិនមានត្រឹមតែជាង ២០០គ្រាប់ប៉ុណ្ណោះនៅក្នុងឃ្លាំង។
តាមរយៈការព្យាករណ៍ដោយក្រុមអ្នកជំនាញយោធារបស់ខ្លួនអាមេរិកជឿជាក់ថានៅត្រឹមដំណាច់ទសវត្សនេះ ឬឆ្នាំ២០៣០ប្រទេសចិននឹងអាចបង្កើនក្បាលគ្រាប់នុយក្លេអ៊ែររហូតទៅដល់ជាង១០០០គ្រាប់ និងប្រមាណជា១៥០០គ្រាប់នៅត្រឹមឆ្នាំ២០៣៥។
មន្ត្រីរូបនេះបានថ្លែងថា ការអភិវឌ្ឍនុយក្លេអ៊ែរបស់ចិនមិនមានដែនកំណត់ឡើយដោយសារតែចិនបានខិតខំអភិវឌ្ឍផងដែរទៅលើប្រព័ន្ធបំពាក់នុយក្លេអ៊ែររបស់ខ្លួនទាំងនៅលើដី សមុទ្រ និងផ្លូវអាកាសហើយលើសពីនេះ រដ្ឋាភិបាលក្រុងប៉េកាំងបានទាំងបន្តការ វិនិយោគលើហេដ្ឋារចនាសម្ព័ន្ធចាំបាច់ ដើម្បីទ្រទ្រង់កំណើនក្បាលគ្រាប់ទាំងនោះផងដែរ។
ក្នុងអំឡុងពេលដែលមានការព្រួយបារម្ភចំពោះអាវុធប្រល័យលោកនេះ សេតវិមានឯណោះវិញក៏កំពុងញាប់ដៃញាប់ជើងក្នុងការស្នើសុំទៅសភាក្នុងការអនុម័តកញ្ចប់ចំណាយបន្ថែមចំនួន ១០៥ពាន់លានដុល្លារផងដែរ ដែលភាគច្រើននឹងត្រូវបែងចែកសម្រាប់កិច្ចការងារចម្រុះនៃគោលដៅអាទិភាពក្នុងវិស័យការពារជាតិរបស់រដ្ឋបាលលោក Bidenដែលក្នុងនោះរាប់ចាប់តាំងតែពីបញ្ហានៅអ៊ុយក្រែនដល់អ៊ីស្រាអែល និងរហូតដល់តំបន់ឥណ្ឌូប៉ាស៊ីហ្វិកដូចជាកោះតៃវ៉ាន់ជាដើម។
កញ្ចប់ថវិកានេះក៏មានរួមបញ្ចូលផងដែរនូវមូលនិធិដើម្បីពង្រឹងសមត្ថភាពនៃឧស្សាហកម្មផលិតនាវាមុជទឹកដើម្បីឱ្យកងទ័ពជើងទឹកអាមេរិកដើរលើផ្លូវដើម្បីសម្រេចបាននូវគោលដៅផលិតកម្មរបស់ខ្លួនសម្រាប់នាវាមុជទឹកដើរដោយថាមពលនុយក្លេអ៊ែរបន្ថែមទៀតទុកសម្រាប់បំពេញតំរូវការក្នុងវិស័យការពារជាតិខ្លួនផងនិងសម្រាប់លក់ឲ្យសម្ព័ន្ធមិត្តផ្សេងទៀត៕
Account
Security
Favourite Content