បរទេស៖ យោងតាមប្រភពព័ត៌មានពី The Nation បានរាយការណ៍ថា ការដំឡើងពន្ធរបស់ប្រធានាធិបតីអាម៉េរិក Donald Trump អាចនឹងប៉ះពាល់ដល់ដៃគូពាណិជ្ជកម្មរបស់ខ្លួន ជាពិសេសប្រទេសដែលមានអតិរេកពាណិជ្ជកម្មខ្ពស់ ឬនាំចូលពីអាម៉េរិកតិចជាងការនាំចេញ។

ឥឡូវនេះ ពិភពលោកកំពុងឃ្លាំមើលយ៉ាងដិតដល់នូវផលប៉ះពាល់ពីការដំឡើងពន្ធរបស់ប្រធានាធិបតីសហរដ្ឋអាម៉េរិក Donald Trump ជាពិសេសប្រទេសដែលមានអតិរេកពាណិជ្ជកម្មខ្ពស់ជាមួយនឹងអាម៉េរិក។ ក្នុងអំឡុងពេលអាណត្តិដំបូង​ Donald Trump បានជំរុញឱ្យមានច្បាប់ពាណិជ្ជកម្មទៅវិញទៅមករបស់សហរដ្ឋអាម៉េរិក ដែលផ្តល់ឱ្យគាត់នូវសិទ្ធិអំណាចក្នុងការដាក់ពន្ធលើដៃគូពាណិជ្ជកម្មណាមួយ ដោយកំណត់អត្រាលើប្រភេទផលិតផលនីមួយៗដាច់ដោយឡែកពីគ្នា។ ចាប់ពីយុទ្ធនាការបោះឆ្នោតរបស់គាត់កាលពីឆ្នាំមុនរហូតដល់បច្ចុប្បន្ន Trump នៅតែប្រកាន់ជំហររឹងមាំជាមួយការប្តេជ្ញាចិត្តថា នឹងដាក់ពន្ធក្នុងអត្រាសមមូល។

អ្នកវិភាគបានលើកឡើងថា ប្រទេសទាំងនោះគួរតែផ្តោតលើការចរចាពាណិជ្ជកម្មឲ្យបានយ៉ាងឆាប់រហ័ស ដោយសារពួកគេប្រឈមនឹងហានិភ័យនៃពន្ធសងសឹក និងការធ្លាក់សក្ដានុពលសេដ្ឋកិច្ច។ អ្នកសេដ្ឋកិច្ចព្យាករណ៍ថា សង្រ្គាមពាណិជ្ជកម្មរបស់ Trump នឹងនាំមកនូវការផ្លាស់ប្តូរសំខាន់ៗនៅទូទាំងអាស៊ី ខណៈដែលឥណ្ឌា និងថៃអាចនឹងប្រឈមមុខនឹងហានិភ័យខ្ពស់នៃផលប៉ះពាល់សេដ្ឋកិច្ចធ្ងន់ធ្ងរ ដោយសារតែគោលនយោបាយពន្ធគយ។ លើសពីនេះ សេដ្ឋកិច្ចអាស៊ីដែលកំពុងតែរីកចម្រើនបានដាក់ពន្ធលើការនាំចូលពីសហរដ្ឋអាមេរិកលើសពីមធ្យម ដែលធ្វើឲ្យពួកគេងាយរងគ្រោះនឹងពន្ធសងសឹកកាន់តែខ្ពស់។ នេះមានន័យថា ប្រទេសទាំងនោះដាក់ពន្ធទំនិញដែលនាំចូលពីសហរដ្ឋអាម៉េរិកខ្ពស់ជាងធម្មតា ដែលធ្វើឲ្យផលិតផលអាម៉េរិកមានតម្លៃថ្លៃជាងនៅក្នុងទីផ្សាររបស់ពួកគេ។ ទន្ទឹមនឹងនេះ ទាំងឥណ្ឌា និងថៃ ដាក់ពន្ធខ្ពស់លើទំនិញអាមេរិក បើធៀបនឹងពន្ធដែលអាមេរិកដាក់លើទំនិញនាំចូលពីប្រទេសទាំងពីរនេះ។ យ៉ាងណាមិញ Trump មិនទាន់បង្ហាញព័ត៌មានលម្អិតជាក់លាក់អំពីប្រទេសទាំងពីរនៅឡើយ។

អ្នកវិភាគបានគូសបញ្ជាក់ពីភាពខុសគ្នានៃពន្ធគយរវាងឥណ្ឌា និងសហរដ្ឋអាម៉េរិក ដោយពន្ធជាមធ្យមរបស់ឥណ្ឌាលើការនាំចូលពីសហរដ្ឋអាមេរិកលើសពីពន្ធរបស់សហរដ្ឋអាមេរិកលើទំនិញឥណ្ឌាច្រើនជាង ១០ ភាគរយ។ គេកំពុងមានការព្រួយបារម្ភថា ការនាំចេញរបស់ឥណ្ឌា និងថៃទៅអាម៉េរិកអាចប្រឈមមុខនឹងពន្ធនាំចូលបន្ថែមពី ៤ ទៅ ១០ ភាគរយ ប្រសិនបើសហរដ្ឋអាម៉េរិកអនុម័តការពន្ធបន្ថែមលើប្រទេសទាំងពីរនេះ។ ស្របពេលដែលភាពតានតឹងពាណិជ្ជកម្មកំពុងកើនឡើង ការគំរាមកំហែងនេះដាក់សម្ពាធលើបណ្តាប្រទេសអាស៊ីឱ្យមានភាពបត់បែនជាងមុនជាមួយ Trump និងពង្រឹងសេដ្ឋកិច្ចដែលផ្អែកលើការនាំចេញ។ ឥណ្ឌា​អាចនឹងបង្កើន​ការ​នាំ​ចូល​ពី​សហរដ្ឋ​អាម៉េរិកជា​ពិសេស​លើ​ឧបករណ៍​ការពារ​ជាតិ ថាមពល និង​យន្តហោះ ប៉ុន្តែផលប៉ះពាល់ពីពន្ធគយនឹងអាស្រ័យលើភាពជាក់លាក់នៃការសម្រេចចិត្តគោលនយោបាយពាណិជ្ជកម្មរបស់ Trump ។ ក្រុមហ៊ុននាំចូលឧស្ម័នធម្មជាតិរាវ (LNG) ឈានមុខគេរបស់ឥណ្ឌាកំពុងពិភាក្សាដើម្បីទិញឧស្ម័នបន្ថែមទៀតពីសហរដ្ឋអាម៉េរិក ខណៈដែលប្រទេសថៃក៏កំពុងពិចារណាបង្កើនការនាំចូលអេតាន និងផលិតផលកសិកម្មពីអាម៉េរិកនៅឆ្នាំនេះ។

អនុប្រធានសភាពាណិជ្ជកម្មថៃ Visit Limlurcha បានកត់សម្គាល់ថា សហរដ្ឋអាម៉េរិកអាចសម្រេចចិត្តលើពន្ធផ្អែកលើសមតុល្យពាណិជ្ជកម្មទាំងពីរ និងវិសមភាពពន្ធដែលមានស្រាប់ជាមួយដៃគូពាណិជ្ជកម្មរបស់ខ្លួន។ ដូច្នេះហើយ ថៃ​ត្រូវ​ត្រៀម​ខ្លួន​សម្រាប់​ការ​ចរចា ជាពិសេស​ដោយ​ស្នើ​វិធានការ​ដោះស្រាយ​ឱនភាព​ពាណិជ្ជកម្ម​របស់​អាម៉េរិក។ រដ្ឋាភិបាលថៃបានគូសបញ្ជាក់ពីប្រភេទផលិតផលសំខាន់ៗចំនួនពីរដែលអាចបង្កើនការនាំចូលពីសហរដ្ឋអាមេរិករួមមាន៖ ផលិតផលកសិកម្ម និងផលិតផលឧស្សាហកម្មដូចជា អេតាន។ លើសពីនេះ ថៃអាចធ្វើការចរចាជាមួយនឹងអាម៉េរិក ដើម្បីគូសបញ្ជាក់ថា ការនាំចូលរបស់សហរដ្ឋអាម៉េរិកមួយចំនួនពីប្រទេសថៃមានប្រភពមកពីក្រុមហ៊ុនអាម៉េរិកដែលកំពុងប្រតិបត្តិការនៅក្នុងប្រទេសថៃផងដែរដូចជា គ្រឿងបន្លាស់អេឡិចត្រូនិចជាដើម។ លោក Visit បន្ថែមថា វិស័យឯកជនគាំទ្រយ៉ាងពេញទំហឹងដល់ក្រុមការងាររបស់រដ្ឋាភិបាលក្នុងការចូលរួមក្នុងការចរចាពាណិជ្ជកម្មជាមួយសហរដ្ឋអាម៉េរិក ហើយពួកគេត្រៀមខ្លួនរួចជាស្រេចក្នុងការសហការ និងផ្តល់ទិន្នន័យពាណិជ្ជកម្មចាំបាច់ ដើម្បីគាំទ្រដល់ការពិភាក្សាទាំងនេះ។

លោក Jirayu Huangsap អ្នកនាំពាក្យទីស្តីការនាយករដ្ឋមន្ត្រីថៃបានបង្ហើបថា ក្នុងកិច្ចប្រជុំគណៈរដ្ឋមន្ត្រីកាលពីថ្ងៃទី ១១ កុម្ភៈ នាយករដ្ឋមន្ត្រី Paetongtarn Shinawatra បានផ្តល់ការណែនាំឱ្យសិក្សាពីផលប៉ះពាល់នៃវិធានការពាណិជ្ជកម្មជាមួយសហរដ្ឋអាម៉េរិក ដែលអាចជះឥទ្ធិពលអវិជ្ជមានដល់ការនាំចេញកសិផលរបស់ថៃ ក៏ដូចជាទំនិញផ្សេងៗទៀតដូចជា គ្រឿងអេឡិចត្រូនិកជាដើម។ រដ្ឋាភិបាលបានតែងតាំងក្រុមការងារសម្រាប់កិច្ចការគោលនយោបាយពាណិជ្ជកម្មរបស់សហរដ្ឋអាម៉េរិកកាលពីខែមករា ដើម្បីសិក្សា និងរៀបចំផែនការឆ្លើយតបចំពោះទំនាក់ទំនងពាណិជ្ជកម្មរបស់ថៃជាមួយនឹងសហរដ្ឋអាម៉េរិក ដោយធានានូវទិសដៅច្បាស់លាស់ដែលផ្តល់អត្ថប្រយោជន៍ជាអតិបរមាសម្រាប់ពាណិជ្ជកម្ម និងការវិនិយោគរបស់ប្រទេស។ ក្រុមការងារនេះត្រូវបានដឹកនាំដោយលេខាធិការអចិន្ត្រៃយ៍នៃក្រសួងពាណិជ្ជកម្ម ជាមួយនឹងទីភ្នាក់ងារពាក់ព័ន្ធដូចជា ក្រុមប្រឹក្សាភិបាលវិនិយោគ (BOI), ក្រសួងកសិកម្ម និងសហករណ៍,​ក្រសួងការបរទេស, និង ក្រសួងពាណិជ្ជកម្ម៕