សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅក្នុងឆ្នាំ២០២៥ខាងមខុនេះ អគ្គនាយកដ្ឋានសុរិយោដី និងភូមិសាស្ត្រ បានដាក់ចេញនូវទិសដៅការងារសំខាន់ៗចំនួន៤ ដើម្បីជំរុញនូវការសម្រេចឱ្យបាននូវផែនការយុទ្ធសាស្ត្ររបស់ក្រសួងរៀបចំដែនដី នគរូបនីយកម្ម និងសំណង់ ក៏ដូចជាផែនការចក្ខុវិស័យរបស់រាជរដ្ឋាភិបាលក្នុងអាណត្តិទី៧នេះ ។
នៅក្នុងរបាយការណ៍បូកសរុបលទ្ធផលនៃការអនុវត្តការងារឆ្នាំ២០២៤ និងទិសដៅការងារឆ្នាំ២០២៥ របស់អគ្គនាយដ្ឋាន សុរិយោដី និងភូមិសាស្ត្រ បានបង្ហាញពីទិសដៅសំខាន់ៗសម្រាប់ឆ្នាំ២០២៥ ក្នុងនោះរួមមាន១. ការងារចុះបញ្ជីដីធ្លី ដោយអគ្គនាយកដ្ឋាននឹងបន្តជំរុញ និងគាំទ្រមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីខេត្ត ដើម្បីបញ្ចប់ការងារវាស់វែងក្បាលដី និងឈានទៅធ្វើការចុះបញ្ជីដីធ្លីបញ្ចប់ រួមទាំងការចុះបញ្ជីដីក្នុងតំបន់បឹងទន្លេសាប និងតំបន់រមណីយដ្ឋានអង្គរ ព្រមទាំងការបន្តគាំទ្រដល់ការងារចុះបញ្ជីដីធ្លីបន្ត ។ នៅក្នុងទិសដៅនៃការងារចុះបញ្ជីដីធ្លីនេះដែរ អគ្គនាយកដ្ឋាននឹងជំរុញការចុះបញ្ជីដីរដ្ឋដែលជាកម្មវត្ថុនៃសម្បទានដីសេដ្ឋកិច្ចចំនួន៥៩ ក្រុមហ៊ុនដែលនៅសល់ និងចុះបញ្ជីដីសហគមន៍ជនជាតិដើមភាគតិចឱ្យបានយ៉ាងតិចចំនួន ៥សហគមន៍ ។
ទិសដៅសំខាន់ទី២របស់អគ្គនាយកដ្ឋានសុរិយោដី និងភូមិសាស្ត្រ គឺការងារដោះស្រាយវិវាទដីធ្លី ។ នៅក្នុងនេះដែរ អគ្គនាយកដ្ឋាននឹងបន្តជំរុញការដោះស្រាយវិវាទដីធ្លី ដែលទទួលបានតាមរយៈគណៈកម្មការសុរិយោដី ជាពិសេសក្រុមការងារដោះស្រាយវិវាទដីធ្លីចល័ត និងបន្តជំរុញការដោះស្រាយវិវាទដីធ្លី ដែលប្រជាពលរដ្ឋបានដាក់ពាក្យមកក្រសួងតាមរយៈក្រុមដោះស្រាយវិវាទដីធ្លីរបស់ក្រសួង ។អគ្គនាយកដ្ឋាននឹងបន្ដផ្សព្វផ្សាយ និងបណ្ដុះបណ្ដាលអំពីនីតិវិធីដោះស្រាយវិវាទដីធ្លីជូនមន្ត្រីគណៈកម្មការសុរិយោដី និងក្រុមប្រឹក្សាឃុំសង្កាត់ ព្រមទាំងប្រធានគណៈកម្មការសុរិយោដីក្រុង ស្រុក ខណ្ឌ ។ នៅក្នុងការងារនេះដែរ អគ្គនាយកដ្ឋាននឹងចុះពិនិត្យផ្ទៀងផ្ទាត់ករណីវិវាទដីធ្លីក្នុងតំបនវិនិច្ឆ័យ ចុះបញ្ជីដីធ្លីមានលក្ខណៈជាប្រព័ន្ធ ដែលគណៈកម្មការរដ្ឋបាលទទួលបាន ដើម្បីមានមូលដ្ឋានលើកផែនការដោះស្រាយ និងបន្តដោះស្រាយវិវាទដីធ្លីតាមការចាត់តាំងរបស់ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ ។
ទិសដៅសំខាន់មួយទៀតរបស់អគ្គនាយកដ្ឋានសុរិយោដី និងភូមិសាស្ត្រ គឺការងារភូមិសាស្ត្រ និងវាស់វែង ដោយបន្តផលិតអ័រតូហ្វូតូគាំទ្រដល់ការងារចុះបញ្ជីដីធ្លី បន្តធ្វើបច្ចុប្បន្នភាពបញ្ជីរាយនាមភូមិសាស្ត្ររួមមាន ឈ្មោះទីតាំងរដ្ឋបាល និងទីតាំងភូមិសាស្ត្រផ្សេងៗ ។ អគ្គនាយកដ្ឋាននឹងបន្តធ្វើបច្ចុប្បន្នភាពព្រំប្រទល់រដ្ឋបាលរាជធានី ខេត្ត តាមទិន្នន័យព្រំប្រទល់ភូមិដែលបានចុះបញ្ជីដីធ្លីរួចនៅតាមបណ្ដារាជធានី ខេត្តទាំង២៥ ហើយក៏បន្តពិនិត្យ ថែទាំបង្គោលប្រឹថពីវិភាគ និងស្ថានីយ៍ CORS និងគ្រប់គ្រងការប្រើប្រាស់ទិន្នន័យ CORS និងបន្តអនុវត្តគម្រោងការសាងសង់ស្ថានីយ៍វាស់វែងអចិន្ត្រៃយ៍ដោយផ្កាយរណប CORS សម្រាប់ការងារដីធ្លី និងការអភិវឌ្ឍហេដ្ឋារចនាសម្ព័ន្ធ និងកសាង CORS ទូទាំងប្រទេសដែលគាំត្រដោយ JICA ជប៉ុន ។
ទិសដៅសំខាន់ចុងក្រោយរបស់អគ្គនាយដ្ឋានសុរិយោដី និងភូមិសាស្ត្រនៅឆ្នាំ២០២៥ខាងមុខនេះ គឺការងារអភិវឌ្ឍប្រព័ន្ធគ្រប់គ្រងមូលដ្ឋានទិន្នន័យសុរិយោដី ដោយបន្តរៀបចំបណ្ដុះបណ្ដាល និងផ្ទេរទិន្នន័យចុះបញ្ជីដីធ្លីពីប្រព័ន្ធមូលដ្ឋានទិន្នន័យគំរូចាស់ ( Ms Access ) ទៅប្រព័ន្ធមូលដ្ឋានទិន្នន័យព័ត៌មានសរិយោដីគំរូថ្មី និងដាក់ឱ្យប្រើប្រាស់ជាផ្លូវការនៅបណ្ដាមន្ទីររៀបចំដែនដី នគរូបនីយកម្ម និងសំណង់ រាជធានី ខេត្តជាបន្ត ។ ក្នុងទិសដៅនេះដែរ អគ្គនាយកដ្ឋានសុរិយោដី នឹងបន្តសិក្សារៀបចំប្រព័ន្ធគ្រប់គ្រងមូលដ្ឋានទិន្នន័យចុះបញ្ជីអគារសហកម្មសិទ្ធិ ទាំងទិដ្ឋភាពបច្ចេកទេស និងច្បាប់ ហើយបន្តអភិវឌ្ឍប្រព័ន្ធគ្រប់គ្រងមូលដ្ឋានទិន្នន័យចុះបញ្ជីវិញ្ញាបនបត្រវាស់វែង ព្រមទាំងបន្តអភិវឌ្ឍប្រព័ន្ធគ្រប់គ្រងមូលដ្ឋានទិន្នន័យចុះបញ្ជីដីរដ្ឋ ។ នៅក្នុងកិច្ចការងារនេះដែរ អគ្គនាយកដ្ឋាន នឹងបន្តគាំទ្របច្ចេកទេសប្រព័ន្ធគ្រប់គ្រងមូលដ្ឋានទិន្នន័យចុះបញ្ជីដីធ្លី និងការថែទាំងសម្ភារៈព័ត៌មានវិទ្យាដល់គ្រប់នាយកដ្ឋានចំណុះឱ្យអគ្គនាយកដ្ឋានសុរិយោដី និងភូមិសាស្ត្រ និងមន្ទីររាជធានី ខេត្ត ៕
Account
Security
Favourite Content